The Phnom Penh Post Search

Search form

Logo of Phnom Penh Post newspaper Phnom Penh Post - ព្រះមហាក្សត្រ​ប្រទាន​រាជ​ដំណាក់​មួយ​កន្លែង​​ឲ្យ​មន្ទីរពេទ្យ​គន្ធបុប្ជា




ព្រះមហាក្សត្រ​ប្រទាន​រាជ​ដំណាក់​មួយ​កន្លែង​​ឲ្យ​មន្ទីរពេទ្យ​គន្ធបុប្ជា

ក្មេង​ប្រុស​ម្នាក់​កំពុង​ដើរ​តាម​ផ្លូវ​មុខ​ព្រះរាជ​ដំណាក់​ជាប់​មាត់សមុទ្រ​នៅ​ខេត្ត​កោះកុង​កាលពី​ពេល​ថ្មីៗ​នេះ​។
ក្មេង​ប្រុស​ម្នាក់​កំពុង​ដើរ​តាម​ផ្លូវ​មុខ​ព្រះរាជ​ដំណាក់​ជាប់​មាត់សមុទ្រ​នៅ​ខេត្ត​កោះកុង​កាលពី​ពេល​ថ្មីៗ​នេះ​។ រូបថត សហការី

ព្រះមហាក្សត្រ​ប្រទាន​រាជ​ដំណាក់​មួយ​កន្លែង​​ឲ្យ​មន្ទីរពេទ្យ​គន្ធបុប្ជា

ភ្នំពេញៈ ព្រះមហាក្សត្រ​ នរោត្តម សីហមុនី និង​ព្រះវររាជ​មាតា នរោត្តម មុនិនាថ សីហនុ បាន​ប្រោស​ប្រទាន​រាជទ្រព្យ​ជា​ព្រះរាជ​ដំណាក់​មួយ​កន្លែង​ស្ថិត​​នៅ​ទឹកដី​ខេត្ត​កោះកុង​ជូន​ដល់​មន្ទីរពេទ្យ​គន្ធបុប្ផា​ដើម្បី​ជួយ​សម្រាល​ដល់​ការ​ចំណាយ​លើ​ផ្នែក​ហិរញ្ញវត្ថុ​ដែល​មន្ទីរពេទ្យ​កំពុង​ជួប​ប្រទះ​សព្វថ្ងៃ​ក្នុង​​ការ​​បន្ត​ជួយ​សង្គ្រោះ​ដល់​អាយុ​ជីវិត​របស់​កុមារ​កម្ពុជា​។

ដោយ​ទត​ឃើញ​​ពី​ការ​លំបាក​ផ្នែក​ថវិកា​ដំណើរការ​ទាំង​នៅក្នុង​មន្ទីរពេទ្យ​គន្ធបុប្ផា​នា​រាជធានី​ភ្នំពេញ និង​នៅ​ខេត្ត​សៀមរាប​ព្រះមហាក្សត្រ សម្តេច​ព្រះបរមនាថ នរោត្តម​ សីហមុនី និង​សម្តេច​ព្រះមហាក្សត្រិយ៍ នរោត្តម មុនិនាថ សីហនុ បាន​ប្រោស​ព្រះរាជទាន​នូវ​ «ព្រះរាជ​ដំណាក់​ដែល​ជា​ទ្រព្យ​ផ្ទាល់​របស់​ព្រះករុណា​ព្រះ​បាទ​សម្តេច​ព្រះ​នរោត្តម សីហនុ ព្រះ​មហាវីរក្សត្រ​ស្ថិត​នៅក្នុង​ទឹកដី​នៃ​ក្រុង​ខេមរភូមិន្ទ​ខេត្ត​កោះកុង​គឺជា​សំណង់​បន្សល់​ពី​សម័យ​សង្គម​រាស្ត្រនិយម​ទសវត្សរ៍​ឆ្នាំ​ ១៩៦០ ជូន​ដល់​មន្ទីរពេទ្យ​គន្ធបុប្ផា។ នេះ​បើ​តាម​សារលិខិត​របស់​ព្រះមហាក្សត្រ​ និង​សម្តេច​ម៉ែ​ចុះ​ថ្ងៃ​ទី ១៧ តុលា​ជូន​លោក​វេជ្ជបណ្ឌិត Beat Richner នាយក​មន្ទីរពេទ្យ​គន្ធបុប្ផា។

សារ​លិខិត​បាន​គូស​បញ្ជាក់​ថា​៖ «ខ្ញុំ​ជឿ​ជាក់​ថា​ព្រះរាជ​អំណោយ​នេះ​នឹង​ជួយ​រំលែក និង​ដោះស្រាយ​ការ​លំបាក​ផ្នែក​ហិរញ្ញវត្ថុ​នៃ​មន្ទីរពេទ្យ​គន្ធបុប្ផា និង​បម្រើ​ផលប្រយោជន៍​ជូន​កុមារ​ទី​ទ័លក្រ​នៃ​ព្រះរាជាណាចក្រ​កម្ពុជា»។

មន្ត្រី​ព្រះបរមរាជ​វាំង​មិន​អាច​ទាក់ទង​សុំ​ការ​អធិប្បាយ​បន្ថែម​ទាក់ទង​នឹង​ព្រះរាជ​អំណោយ​​នេះ​បាន​ទេ​កាលពី​ម្សិលមិញ។

ចំណែក​លោក Denis Laurent នាយក​រង​មន្ទីរពេទ្យ​គន្ធបុប្ផា​បដិសេធ​ធ្វើ​អធិប្បាយ​លើ​បញ្ហា​នេះ​ដោយ​និយាយ​យ៉ាង​ខ្លី​ថា៖ «នេះ​ជា​អំណោយ​មក​មន្ទីរពេទ្យ​យើង»។

ក្នុង​មួយ​ឆ្នាំៗ​មន្ទីរពេទ្យ​គន្ធបុប្ផា​បាន​​ចំណាយ​ថវិកា​សម្រាប់​ការ​ព្យាបាល​កុមារ​នៅ​កម្ពុជា​ដោយ​មិន​យក​កម្រៃ​​អស់​​ទឹកប្រាក់​ប្រមាណ ៤៣ លាន​ដុល្លារ​អាមេរិក​ហើយ​រដ្ឋាភិបាល​កម្ពុជា​បាន​ផ្តល់​ថវិកា​បដិភាគ​នៅ​ឆ្នាំ​ ២០១៥ នេះ​ចំនួន ៥ លាន​ ២ សែន​ដុល្លារ​ហើយ​នឹង​បន្ថែម​ឲ្យ​ដល់​ ៦ លាន​ដុល្លារ​នៅ​ឆ្នាំ​ ២០១៦ ។

លោក ប៊ុន លើត អភិបាល​ខេត្ត​កោះកុង​បាន​ឲ្យ​ដឹង​កាលពី​ម្សិលមិញ​ថា​ដី​ព្រះរាជ​ដំណាក់​ដែល​​ស្ថិត​នៅ​ជាប់​មាត់​ឆ្នេរសមុទ្រ​គឺ​មាន​ទំហំ​ជាង ១ ហិកតា​ជា​សំណង់​ទំនេរ​មិន​មាន​មនុស្ស​រស់នៅ​នោះ​ឡើយ។

ប៉ុន្តែ​លោក ដាត់ កុយណូ ស្នងការ​រង​ខេត្ត​កោះកុង​បាន​ថ្លែង​ថា​សព្វថ្ងៃ​នេះ​មាន​ប្រជាពលរដ្ឋ​ពី ៣ ទៅ​ ៤ គ្រួសារ​កំពុង​រស់នៅ​ទី​នេះ​ហើយ​ពួកគេ​នឹង​ចាកចេញ​បើ​សិន​ទីតាំង​នេះ​មាន​អ្នក​គ្រប់គ្រង​​ថ្មី​។

លោក នៅ ស៊ីណា ជា​គ្រូបង្រៀន​វិទ្យាល័យ​មួយ​នៅ​ក្រុង​ខេមរភូមិន្ទ​ដែល​​ស្នាក់នៅ​ព្រះរាជ​ដំណាក់​នេះ​បាន​ឲ្យ​ដឹង​កាលពី​ម្សិលមិញ​ថា​មាន​ប្រជាពលរដ្ឋ​ជា​មន្ត្រី​រាជការ​ស៊ីវិល​ប្រមាណ ១០ គ្រួសារ​បាន​ស្នាក់​នៅ​ក្នុង​ព្រះ​រាជដំណាក់​ដោយសារ​ជា​គ្រួសារ​ក្រីក្រ​គ្មាន​​ផ្ទះ​សម្បែង​រស់នៅ​ដោយ​ពួកគេ​បាន​ចុះ​ឈ្មោះ​ប្រាប់​ដំណឹង​ដល់​អាជ្ញាធរ​ភូមិ​ឃុំ​នៅ​ទី​នោះ។

លោក​​បញ្ជាក់​ថា៖ «មាន​អ្នក​រស់នៅ​ទី​នេះ​ជាង​ ១០ ​ឆ្នាំ​មក​ហើយ​អ៊ីចឹង​ដោយសារ​យើង​គ្មាន​ជម្រក​ទើប​យើង​​មក​សុំ​អាជ្ញាធរ​ស្នាក់នៅ​ទី​នេះ។ យើង​ធ្លាប់​ដឹង​ថា ​ពីរ​បី​ឆ្នាំ​មុន​មាន​ខាង​គណៈកម្មការ​ខេត្ត​បាន​​ចុះ​ស្រង់​ព័ត៌មាន​ពី​ចំនួន​គ្រួសារ​ហើយ​ក៏​ស្ងាត់​វិញ​ទៅ​ហើយ​យើង​​គិត​ថា​យើង​នឹង​ត្រូវ​ឲ្យ​ចាកចេញ​»។

លោក​បាន​បន្ត​ថា៖ «បើ​គេ​ឲ្យ​យើង​ចាកចេញ​យើង​គ្មាន​ផ្ទះ​ឯណា​នៅ​ទេ​សូម​អាជ្ញាធរ​គិតគូរ​ដោះស្រាយ​ឲ្យ​ពួកយើង​ផង»៕

អត្ថបទគួរចាប់អារម្មណ៍