ភ្នំពេញ៖ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យ ផ្តល់នីតិសម្បទានយោបាយដល់ លោក ប៉ុល ហំម និងលោក ផាន់ ច័ន្ទសាក់ មន្ត្រីជាន់ខ្ពស់នៃអតីតគណបក្សសង្គ្រោះជាតិ ដើម្បីមានសិទ្ធិធ្វើនយោបាយឡើងវិញ។ នេះបើយោងតាមព្រះរាជក្រឹត្យចេញផ្សាយនៅថ្ងៃទី ២០ ខែ ឧសភា ឆ្នាំ ២០២១ នេះ។
លោក ប៉ុល ហំម និងលោក ផាន់ ច័ន្ទសាក់ បានដាក់សំណើទៅក្រសួងមហាផ្ទៃកាលពីថ្ងៃទី ១៧ ខែឧសភា ដើម្បីស្នើសុំនីតិសម្បទានយោបាយឡើងវិញ បន្ទាប់ពីត្រូវបានហាមធ្វើនយោបាយរយៈពេល ៥ ឆ្នាំ តាមអំណាចសាលដីកាលេខ ៣៤០ ចុះថ្ងៃទី ១៦ ខែ វិច្ឆិកា ឆ្នាំ ២០១៧ របស់តុលាការកំពូលរបស់កម្ពុជា។
លោក ឈឹម កាន អគ្គនាយករងនៃអគ្គនាយកដ្ឋានរដ្ឋបាលនៃក្រសួងមហាផ្ទៃបានឱ្យដឹងថា គិតត្រឹមថ្ងៃទី ២០ ខែឧសភានេះ មានអតីតមន្ត្រីគណបក្សសង្គ្រោះជាតិ ចំនួន ២៤ រូបហើយ ដែលត្រូវបានព្រះមហាក្សត្រផ្តល់នីតិសម្បទានយោបាយឡើងវិញ។
ភ្នំពេញ ប៉ុស្តិ៍ មិនអាចទាក់ទងលោក ប៉ុល ហំម សុំធ្វើអត្ថាធិប្បាបានទេ នៅថ្ងៃទី ២០ ខែឧសភានេះ ប៉ុន្តែ លោក ផាន់ ច័ន្ទសាក់ ឱ្យដឹងកាលពីថ្ងៃទី ១៨ ខែឧសភាថា ការដាក់ពាក្យស្នើសុំនីតិសម្បទានយោបាយនេះ ធ្វើឡើងក្នុងគោលបំណង ដើម្បីធ្វើនយោបាយឡើងវិញ ក្រោយពីសិទ្ធិនយោបាយរបស់លោកត្រូវបានព្យួរអស់រយៈពេល ៣ ឆ្នាំកន្លះមកនេះ។
លោក ផាន់ ច័ន្ទសាក់ បន្តថា នៅពេលដែលទទួលបាននីតិសម្បទានយោបាយឡើងវិញនេះ រូបលោកនឹងទៅចូលរួមអាជីពនយោបាយជាមួយលោក អ៊ូ ចាន់រ័ត្ន ដែលបានបង្កើតគណបក្សថ្មីរួចហើយ គឺគណបក្សកែទម្រង់កម្ពុជា និងបានចុះបញ្ជីនៅក្រសួងមហាផ្ទៃរួចហើយដែរនោះ។
លោក អ៊ូ ច័ន្ទរ័ត្ន អតីតមន្ត្រីជាន់ខ្ពស់ គណបក្សសង្គ្រោះជាតិ និងជាស្ថាបនិក គណបក្សកែទម្រង់កម្ពុជា យល់ឃើញថា រហូតមកដល់ពេលនេះ មិនមានអ្វីដែល ធ្វើឱ្យអតីតមន្ត្រីគណបក្សសង្គ្រោះជាតិរង់ចាំដំណោះស្រាយបន្តទៀតនោះទេ។
លោក អ៊ូ ចាន់រ័ត្ន ថ្លែងថា៖ «ដូច្នេះ អ្នកនយោបាយយល់ថា មិនអាចរង់ចាំតទៅមុខទៀតទេហើយ ក៏មិនមានច្រកអ្វីចេញក្រៅតែអំពីស្នើសុំសិទ្ធិធ្វើនយោបាយចូលរួមប្រកួតប្រជែងបោះឆ្នោតឡើងវិញទេ»។
ទោះជាយ៉ាងណា លោក អ៊ូ ច័ន្ទរិទ្ធិ អតីតថ្នាក់ដឹនាំគណបក្សសង្គ្រោះជាតិមួយរូបដែរនោះ បានសរសេរនៅលើបណ្តាញសង្គមហ្វេសប៊ុកនៅថ្ងៃទី ២០ ឧសភានេះថា លោកបានសម្តែងការសោកស្តាយចំពោះការដាក់សំណើសុំនីតិសម្បទានយោបាយឡើងវិញរបស់ លោក ប៉ុល ហំម ប៉ុន្តែលោក បានគោរពនូវការសម្រេចចិត្តនេះ៕
វីដេអូ៖