.jpg)
ព្រះមហាក្សត្រ សម្តេចព្រះនរោត្តម សីហមុនី យាងជាព្រះរាជាធិបតីភាពក្នុងពិធីបើកសម័យប្រជុំព្រឹទ្ធសភានីតិកាលទី ៤ លើកដំបូង។ ហេង ជីវ័ន
ភ្នំពេញៈ ក្រោយពីឈ្នះអាសនៈទាំង ៥៨ ដោយមិនមានអតីតបក្សសង្គ្រោះជាតិដែលជាគូប្រកួតដ៏ស័ក្តិសមនឹងគ្នាសម្រាប់ការបោះឆ្នោតព្រឹទ្ធសភាពីខែកុម្ភៈ គណបក្សកាន់អំណាចដែលទទួលជ័យជម្នះបានបន្តគ្រប់គ្រងស្ថាប័ននីតិប្បញ្ញត្តិជាថ្មីដោយបើកសម័យប្រជុំលើកដំបូង នីតិកាលទី ៤ នៃព្រឹទ្ធសភាពីម្សិលមិញក្រោមព្រះរាជាធិបតីភាពព្រះមហាក្សត្រព្រះបាទសម្តេចព្រះនរោត្តម សីហមុនី ដែលព្រះអង្គអំពាវនាវឲ្យមានការធានាការពារយុត្តិធម៌ និងគោរពសិទ្ធិមនុស្ស និងរួមសាមគ្គីគ្នាជាធ្លុងមួយ។
ព្រះមហាក្សត្រនៃកម្ពុជាដែលយាងជាព្រះរាជអធិបតីបានអំពាវនាវឲ្យស្ថាប័នកំពូលមួយនេះ «ធានាការពារយុត្តិធម៌ និងគោរពសិទ្ធិមនុស្ស» ខណៈដែលលោក សាយ ឈុំ អនុប្រធានគណបក្សប្រជាជនកម្ពុជាដែលជាបក្សកាន់អំណាចជិត ៤០ ឆ្នាំមកហើយនេះត្រូវបានបោះឆ្នោតដោយសំឡេងឯកច្ឆ័ន្ទ ឲ្យលោកបន្តធ្វើជាប្រធានព្រឹទ្ធសភាសាជាថ្មីទៀត។
ក្នុងឱកាសនោះព្រះមហាក្សត្រ នរោត្តម សីហមុនី បានអានព្រះរាជសាររបស់ព្រះអង្គសម្ដែងនូវក្ដីអំណរសាទរជូនសមាជិក សមាជិកាព្រឹទ្ធសភាថ្មី និងអំពាវនាវឲ្យ «រួមសាមគ្គីគ្នាជាធ្លុងមួយ» ធានាការពារឯករាជ្យជាតិ អធិបតេយ្យ និងបូរណភាពដែនដី។
ព្រះអង្គមានព្រះរាជបន្ទូលថា៖ «តាមរយៈស្ថាប័នព្រឹទ្ធសភា ក្រុមប្រឹក្សាឃុំ-សង្កាត់ ប្រជាពលរដ្ឋ គណបក្សនយោបាយ ប្រព័ន្ធព័ត៌មាន និងសង្គមស៊ីវិលមានឱកាសកាន់តែច្រើនឡើងដើម្បីសម្ដែង និងឆ្លុះបញ្ចាំងយ៉ាងទូលំទូលាយនូវទស្សនៈ ជំហរនយោបាយ ឬបំណងប្រាថ្នារបស់ខ្លួនដែលញ៉ាំងលទ្ធិប្រជាធិបតេយ្យសេរីពហុបក្សរបស់យើងឲ្យកាន់តែមានជំហានរីកចម្រើនពីមួយថ្ងៃទៅមួយថ្ងៃថែមទៀត»។
ព្រះអង្គសង្កត់ធ្ងន់ថា៖ «ជាមួយគ្នានេះដែរព្រឹទ្ធសភាត្រូវធានាការពារយុត្តិធម៌ និងគោរពសិទ្ធិមនុស្ស ដើម្បីបង្កើតឡើងនូវសុខដុមរមនាយូរអង្វែងក្នុងសង្គមជាតិយើង»។
ដោយរំឭកពីប្រវត្តិសាស្ត្រដែលខ្មែរយើងធ្លាប់ជាប្រជាជាតិមួយដែលមានអរិយធម៌ដ៏ថ្លៃថ្លាថ្កុំថ្កើងរុងរឿង ព្រះមហាក្សត្រ បានអំពាវនាវយ៉ាងដូច្នេះថា៖ «យើងទាំងអស់គ្នាជាកូនចៅជំនាន់ក្រោយចាំបាច់ត្រូវតែរួមសាមគ្គីគ្នាជាធ្លុងមួយធានាការពារឯករាជភាពជាតិ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា ដើម្បីអភិវឌ្ឍប្រទេសជាតិយើងឲ្យឈានឡើងដោយឆាប់រហ័ស និងដើរទាន់ប្រទេសនានានៅលើសកលលោក»។
សមាជិកព្រឹទ្ធសភាមាន ៦២ រូបដែល ៥៨ រូបមកពីគណបក្សប្រជាជនកម្ពុជា ២ រូបជ្រើសតាំងដោយព្រះមហាក្សត្រ និង ២ រូបផ្សេងទៀត ជ្រើសតាំងដោយរដ្ឋសភាជាតិ។ ខណៈលោក សាយ ឈុំ ជាប់ជាប្រធានព្រឹទ្ធសភាសាជាថ្មី លោក នៃ ប៉េណា និងលោក ទេព ងន ដែលជាអតីតអនុប្រធានទី ១ និងទី ២ នៃព្រឹទ្ធសភាត្រូវបានសមាជិកព្រឹទ្ធសភាបោះឆ្នោតគាំទ្រដោយសំឡេង ៦២ លើ ៦២ សំឡេង។
លោក សាយ ឈុំ ថ្លែងថា៖ «ខ្ញុំក៏ដូចជាឯកឧត្តម អនុប្រធានទី ១ និងអនុប្រធានទី ២ សូមសង្ឃឹមជឿជាក់ថាព្រឹទ្ធសភាយើងនឹងខិតខំប្រឹងប្រែងបន្ថែមទៀតក្នុងការពង្រឹងកសាងកម្ពុជាជានីតិរដ្ឋក្នុងបរិយាកាសសាមគ្គីភាតរភាព យោគយល់អធ្យាស្រ័យ និងសហការជួយគ្នាទៅវិញទៅមកដោយស្មោះស្ម័គ្រដើម្បីរួមចំណែកឲ្យកាន់តែសកម្មថែមទៀតក្នុងការជំរុញអភិវឌ្ឍន៍គោលនយោបាយវិមជ្ឈការ និងវិសហមជ្ឈការនៅកម្ពុជា»។
លោក សម រង្ស៊ី អតីតប្រធានគណបក្សប្រឆាំង និងបច្ចុប្បន្នជាប្រធានចលនាសង្គ្រោះជាតិដែលកំពុងនិរទេសនៅក្រៅប្រទេសសម្ដែងការមិនពេញចិត្តចំពោះព្រឹទ្ធសភានីតិកាលថ្មីនេះ ដោយលោកចាត់ទុកជា «ការបំផ្លាញលទ្ធិប្រជាធិបតេយ្យនៅកម្ពុជា»។
លោកថ្លែងថា៖ «ការបង្កើតព្រឹទ្ធសភាថ្មី គឺគ្រាន់តែជាផ្នែកនៃការបំផ្លិចបំផ្លាញលទ្ធិប្រជាធិបតេយ្យនៅប្រទេសកម្ពុជាដែលប្រទេសនេះកំពុងវិលទៅរកការដឹកនាំតាមបែបប្រព័ន្ធឯកបក្សប៉ុណ្ណោះ»។
លោក សុខ ឥសាន អ្នកនាំពាក្យគណបក្សកាន់អំណាច និងជាសមាជិកព្រឹទ្ធសភាថ្មីបានច្រានចោលការរិះគន់នេះដោយលោកថា «ឆ្កែចេះតែព្រុស មនុស្សចេះតែដើរ» ហើយថាការរិះគន់នេះ «គ្មានប្រយោជន៍» ឬមាន «ឥទ្ធិពល» មកលើស្ថាប័ននីតិប្បញ្ញត្តិនេះទេ។
លោកថ្លែង៖ «វាជាការឆ្លុះបញ្ចាំងឲ្យឃើញពីសាមគ្គីឯកភាពគ្នាខ្ពស់នៅក្នុងស្ថាប័ននីតិប្បញ្ញត្តិ ដូច្នេះគ្មានសំរាមអី មករាំងស្ទះដល់ដំណើរការជាតិយើងទៀតទេ»។
លោក Phil Robertson អនុប្រធានអង្គការឃ្លាំមើលសិទ្ធិមនុស្សប្រចាំតំបន់អាស៊ីថ្លែងថា៖ «ការពិតគឺស្ថិតនៅក្រោមការគ្រប់គ្រងរបស់លោកនាយករដ្ឋមន្ត្រី ហ៊ុន សែន ព្រឹទ្ធសភាបានក្លាយជាឆាកកំប្លែង នីតិប្បញ្ញត្តិ និងពោរពេញទៅដោយអ្នកនយោបាយដែលអាចពឹងផ្អែកបានដើម្បីបោះឆ្នោតទៅតាមអ្វីដែលរដ្ឋាភិបាលចង់បាន និងទទួលបាននូវងារកិត្តិយស និងប្រាក់ខែច្រើនហើយធ្វើការងារតិច ឬគ្មានការងារធ្វើ។ នរណាដែលចង់បានយុត្តិធម៌ និងសិទ្ធិមនុស្សពីព្រឹទ្ធសភានេះនឹងខកចិត្តទាំងស្រុង ហើយអ្វីដែលពិបាកយល់ជាពិសេសគឺទំនងជារដ្ឋសភាដែលនឹងបើកសម័យប្រជុំ បន្ទាប់ពីការបោះឆ្នោតជាតិគួរឲ្យអាម៉ាស់របស់លោក ហ៊ុន សែន ដែលធ្វើឡើងក្នុងខែកក្កដា»៕
