The Phnom Penh Post Search

Search form




Logo of Phnom Penh Post newspaper Phnom Penh Post - ព្រះមហាក្សត្រ​ដំឡើង​ឋានៈ​មន្ត្រី​នគរបាល​ ២០ ​រូប

ព្រះមហាក្សត្រ​ដំឡើង​ឋានៈ​មន្ត្រី​នគរបាល​ ២០ ​រូប

ព្រះមហាក្សត្រ​ទ្រង់​យាង​សម្ពោធ​រូប​សំណាក​ព្រះបរមរតនកោដ្ឋ​កន្លង​មក​។
ព្រះមហាក្សត្រ​ទ្រង់​យាង​សម្ពោធ​រូប​សំណាក​ព្រះបរមរតនកោដ្ឋ​កន្លង​មក​។ ផា លីណា

ព្រះមហាក្សត្រ​ដំឡើង​ឋានៈ​មន្ត្រី​នគរបាល​ ២០ ​រូប

ភ្នំពេញៈ ព្រះមហាក្សត្រ​បាន​ត្រាស់​បង្គាប់​ឲ្យ​ដំឡើង​ឋានន្តរស័ក្តិ​ដល់​នាយ​នគរបាល​ថ្នាក់​ឧត្តមសេនីយ៍ និង​នាយ​នគរបាល​ជាន់​ខ្ពស់​ក្របខ័ណ្ឌ​មន្ត្រី​នគរបាល​ជាតិ​នៃ​ក្រសួង​មហាផ្ទៃ​ចំនួន ២០ រូប​ពី​ឧត្តម​សេនីយ៍​ផ្កាយ ១ ទៅ​ឧត្តម​សេនីយ៍​ផ្កាយ​ ២ និង​ពី​វរសេនីយ៍​ស័ក្តិ​ ៥ ទៅ​ឧត្តម​សេនីយ៍​ផ្កាយ ១។

យោង​តាម​ព្រះរាជ​ក្រឹត្យ​ចុះ​ថ្ងៃ​ទី ១ ខែ​សីហា ឆ្នាំ ២០១៥ ព្រះករុណ​ព្រះបាទ​សម្តេច​ព្រះបរមនាថ នរោត្តម សីហមុនី បាន​ត្រាស់​បង្គាប់​នាយ​នគរបាល​ថ្នាក់​ឧត្តមសេនីយ៍​ត្រី​ផ្កាយ ១ ចំនួន ១៧ រូប ត្រូវ​បាន​ដំឡើង​ឋានន្តរស័ក្តិ​ថ្នាក់​ឧត្តមសេនីយ៍​ទោ​ផ្កាយ ២ ចំណែក​នាយ​នគរបាល​ជាន់​ខ្ពស់​ក្របខ័ណ្ឌ​មន្ត្រី​នគរបាល​ជាតិ​កម្ពុជា​ចំនួន ៣ រូប​ត្រូវ​បាន​ដំឡើង​ឋានន្តរស័ក្តិ​ថ្នាក់​ឧត្តមសេនីយ៍ត្រី​ផ្កាយ​ ១។ មាត្រា ២ នៃ​ព្រះរាជ​ក្រឹត្យ​​នេះ​ក៏​បាន​ត្រាស់​បង្គាប់​​ឲ្យ​​ប្រមុខ​រដ្ឋាភិបាល​លោក​នាយករដ្ឋមន្ត្រី ហ៊ុន សែន ត្រូវ​ទទួល​បន្ទុក​ក្នុង​ការ​អនុវត្ត​ព្រះរាជក្រឹត្យ​នេះ​ចាប់​ពី​ថ្ងៃ​ឡាយ​ព្រះហស្តលេខា​ផង​ដែរ។

អនុប្រធាន​នាយកដ្ឋាន​បុគ្គលិក​នៃ​ក្រសួង​មហាផ្ទៃ លោក ហ៊ាន សារឿន បាន​ឲ្យ​ដឹង​ថា​បរមងារ​នេះ​គឺ​ត្រូវ​បាន​ទទួល​ដោយ​ស្វ័យប្រវត្តិ​បន្ទាប់​ទទួល​បាន​​ការ​ឡាយ​ព្រះហត្ថលេខា​ពី​ព្រះមហាក្សត្រ​ទោះបី​ជា​ពិធី​បំពាក់​ស័ក្តិ និង​ផ្កាយ​សម្រាប់​នាយ​នគរបាល​ទាំង ២០ ​រូប​នេះ​មិន​ទាន់​បាន​កំណត់​ក្តី។

លោក​បាន​បញ្ជាក់​ថា៖ «ការ​ទទួល​បាន​ស័ក្តិ និង​ផ្កាយ​នេះ​មិនមែន​មាន​ន័យ​ត្រូវ​ដំឡើង​តំណែង​ទាំងអស់​គ្នា​នោះ​ទេ​តែ​ការ​ដំឡើង​ឋានន្តរស័ក្តិ​នេះ​គឺ​ធ្វើ​ឡើង​តាម​លក្ខន្តិកៈ​មន្ត្រី​នគរបាល​ជាតិ​ប៉ុណ្ណោះ​ក្នុង​នោះ​ឋានន្តរស័ក្តិ​ជា​ឧត្តមសេនីយ៍ទោ​ភាគច្រើន​ជា​អនុប្រធាន​នាយកដ្ឋាន​អ៊ីចឹង​គាត់​មិន​អាច​ដំឡើង​​តំណែង​អី​ទៀត​ទេ»។

បើ​តាម​លោក ហ៊ាន សារឿន ថ្នាក់​ឧត្តមសេនីយ៍ត្រី​ផ្កាយ​ ១ ត្រូវ​បាន​ដំឡើង​ឋានន្តរស័ក្តិ​ទៅ​ថ្នាក់​ឧត្តម​សេនីយ៍ទោ​ផ្កាយ​ ២ សម្រាប់​អតីតភាព​ការងារ​ចន្លោះ​ពី ៣ ទៅ ៤ ឆ្នាំ។ ចំណែក​ថ្នាក់​វរសេនីយ៍ឯក​ទៅ​ថ្នាក់​ឧត្តមសេនីយ៍​ត្រី​ផ្កាយ ១ សម្រាប់​អតីត​ការងារ ៦ ឆ្នាំ ប៉ុន្តែ​ក៏​មាន​ករណី​លើក​លែង​ផង​ដែរ។

អ្នក​អធិប្បាយ​នយោបាយ​លោក អ៊ូ វីរៈ សង្កេត​ឃើញ​ថា​វប្បធម៌​នៃ​ការ​ប្រើប្រាស់​បរមងារ​តាមរយៈ​ការ​ដំឡើង​ស័ក្តិ និង​ផ្កាយ​របស់​ថ្នាក់​វរសេនីយ៍ និង​​ថ្នាក់​ឧត្តមសេនីយ៍​បច្ចុប្បន្ន​នេះ​គ្រាន់តែ​ជា​គ្រឿង​លម្អ​មួយ​ដែល​បង្ហាញ​ពី​អំណាច​របស់​មន្ត្រី​រាជការ​តែ​ប៉ុណ្ណោះ​មិន​បាន​​ឆ្លុះបញ្ចាំង​ពី​ការ​លើក​ទឹកចិត្ត​ពិតប្រាកដ​នោះ​ទេ។

លោក​ថា៖ «ខ្ញុំ​គិត​ថា​គួរ​កាត់បន្ថយ​ការ​ដំឡើង​ស័ក្តិ​នេះ​ពួកគាត់​គប្បី​ទទួល​បាន​ការ​ដំឡើង​ប្រាក់​ខែ​ដើម្បី​ជា​ការ​លើក​ទឹកចិត្ត​ព្រោះ​ការ​ដំឡើង​បរមងារ​នេះ​អាច​បង្ក​នូវ​ការ​ច្រណែន​គ្នា​ហើយ​បាន​បង្ហាញ​ពី​អំណាច​សម្រាប់​អ្នក​ដែល​មិន​ទទួល​បាន​នោះ»។

មួយ​រយៈ​កាល​ចុងក្រោយ​នេះ​អ្នក​តាមដាន​សង្គម​បាន​សង្កេត​ឃើញ​ថា​មាន​មន្ត្រី​ជាច្រើន​ត្រូវ​បាន​ដំឡើង​ឋានន្តរស័ក្តិ​ជា​បន្តបន្ទាប់​ដែល​បង្ហាញពី​ការ​លើក​ទឹកចិត្ត​ក្នុង​មុខ​តំណែង។

ទោះ​ជា​យ៉ាងណា​ក៏ដោយ​ក៏ លោក ហ៊ាន សារឿន អះអាង​ថា​របាយការណ៍​នៃ​តួលេខ​សរុប​របស់​មន្ត្រី​ថ្នាក់​វរសេនីយ៍ និង​ថ្នាក់​ឧត្តមសេនីយ៍​មិន​អាច​ត្រូវ​ផ្សព្វផ្សាយ​ជា​សាធារណៈ​នោះ​ទេ៕

អត្ថបទគួរចាប់អារម្មណ៍