.jpg)
ព្រះមហាក្សត្រនរោត្តម សីហមុនី នៃកម្ពុជា និងអគ្គលេខាធិការបក្សកុម្មុយនីស្តវៀតណាម លោក Nguyen Phu Trong។ រូប AKP
ភ្នំពេញ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងលោកនាយករដ្ឋមន្ត្រី ហ៊ុន សែន ផ្ញើសារអបអរសាទរចំពោះលោក Nguyen Phu Trong ដែលត្រូវបានបោះឆ្នោតជ្រើសតាំងសាជាថ្មី ជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាមអាណត្តិទី១។
ព្រះរាជសាររបស់ព្រះមហាក្សត្រចុះថ្ងៃទី ១ ខែកុម្ភៈ មានខ្លឹមសារថា៖ «ក្នុងនាមប្រជារាស្ត្រនៃព្រះរាជាណាចក្រកម្ពុជា និងក្នុងនាមខ្ញុំផ្ទាល់ ខ្ញុំមានសេចក្តីសោមនស្សរីករាយ និងសូមអបអរសាទរចំពោះឯកឧត្តម Nguyen Phu Trong ដែលត្រូវបានមហាសន្និបាតបក្សកុម្មុយនីស្តវៀតណាមលើកទី១៣ បោះឆ្នោតជ្រើសតាំងបន្តជាអគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាមសម្រាប់អាណត្តិទី១៣ កាលពីថ្ងៃទី ៣១ ខែ មករា ឆ្នាំ ២០២១»។
ព្រះរាជសារបន្តថា៖ «ខ្ញុំមានជំនឿយ៉ាងមុតមាំថា ក្រោមការដឹកនាំដ៏ឈ្លាសវៃរបស់ឯកឧត្តមនឹងមានការអភិវឌ្ឍរីកចម្រើន ជឿនលឿនលើគ្រប់វិស័យ និងរក្សាបាននូវតួនាទីដ៏សំខាន់នៅក្នុងតំបន់ និងនៅក្នុងពិភពលោក។ ខ្ញុំសង្ឃឹមថា ប្រជាជាតិទាំង ២ កម្ពុជា-វៀតណាមនឹងកាន់តែមានទំនាក់ទំនងជិតស្និទ្ធ ហើយបន្តរក្សានូវសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍជាតិបានកាន់តែល្អប្រសើរថែមទៀត»។
ជាមួយគ្នានេះ លោកនាយករដ្ឋមន្ត្រី ហ៊ុន សែន ជឿជាក់យ៉ាងមុតមាំថា ស្ថិតនៅក្រោមភាពជារដ្ឋបុរស និងការដឹកនាំដ៏ឈ្លាសវៃ របស់លោក Nguyen Phu Trong បក្សកុម្មុយនីស្តវៀតណាមនឹងអនុវត្តនូវរាល់គោលមាគ៌ានយោបាយ និងសេចក្តីសម្រេចដែលត្រូវបានអនុម័តក្នុងមហាសន្និបាតបក្សកុម្មុយនីស្តវៀតណាមលើកទី១៣ ដោយជោគជ័យ ដើម្បីប្រែក្លាយវៀតណាមទៅជាប្រជាជាតិដ៏ខ្លាំងមួយ ប្រកបដោយសមធម៌ ប្រជាធិបតេយ្យ និងអារ្យធម៌។ នេះបើតាមសេចក្តីប្រកាសព័ត៌មានស្តីពីខ្លឹមសារកិច្ចសន្ទនារវាងថ្នាក់ដឹកនាំទាំង ២ ដែលបានចុះថ្ងៃទី ៣ ខែ កុម្ភៈ ឆ្នាំ ២០២១។
លោក ហ៊ុន សែន សង្កត់ធ្ងន់ថា ក្រោមទស្សនវិស័យដ៏ត្រឹមត្រូវរបស់បក្សកុម្មុយនីស្តវៀតណាមសម្រេចបាននូវសមិទ្ធផលធំៗជាច្រើនក្នុងការអភិវឌ្ឍសេដ្ឋកិច្ចសង្គមប្រកបដោយជោគជ័យ និងការរក្សាបាននូវសន្តិភាព ស្ថិរភាព និងវិបុលភាព។
តាមរយៈការសន្ទនាតាមទូរស័ព្ទ រវាងប្រធានគណបក្សប្រជាជនកម្ពុជា លោក ហ៊ុន សែន និងអគ្គលេខាធិការមជ្ឈិមបក្សកុម្មុយនីស្តវៀតណាម លោក Nguyen Phu Trong បានវាយតម្លៃខ្ពស់ចំពោះទំនាក់ទំនងជាប្រវត្តិសាស្ត្រយូរអង្វែង។
លោកបានកត់សម្គាល់ ដោយការពេញចិត្តយ៉ាងខ្លាំង ចំពោះការរីកចម្រើនកាន់តែរឹងមាំនៃភាពជាដៃគូ និងកិច្ចសហប្រតិបត្តិការជិតស្និទ្ធរវាងគណបក្សកំពុងដឹកនាំ ក៏ដូចជារវាងប្រទេសទាំង ២ នៅលើគ្រប់វិស័យ។ ភាពជាដៃគូនេះនាំមកនូវផលប្រយោជន៍ទៅវិញទៅមកកាន់តែច្រើនថែមទៀតជូនប្រជាជនកម្ពុជា និងវៀតណាម។
ថ្នាក់ដឹកនាំទាំង ២ បានរំឭកឡើងវិញដោយការដឹងគុណដ៏ជ្រាលជ្រៅចំពោះការជួយឧបត្ថម្ភគាំទ្រគ្នាទៅវិញទៅមកក្នុងអំឡុងពេលនៃការរំដោះជាតិ និងដំណើរការកសាងជាតិ។
បើតាមសេចក្តីប្រកាសព័ត៌មាន ថ្នាក់ដឹកនាំទាំង ២ បានបញ្ជាក់សាជាថ្មីនូវការប្តេជ្ញាចិត្តយ៉ាងមុតមាំនឹងបន្តធ្វើការយ៉ាងជិតស្និទ្ធ ដើម្បីពូនជ្រំទំនាក់ទំនងទ្វេភាគីឱ្យកាន់តែល្អប្រសើរ។ លើកកម្ពស់កិច្ចសហប្រតិបត្តិការពហុវិស័យតាមរយៈការអនុវត្តរាល់កិច្ចព្រមព្រៀងទាំងអស់ឱ្យមានប្រសិទ្ធភាព និងឱ្យបានទាន់ពេលវេលាក្នុងគោលបំណងលើកតម្កើងទំនាក់ទំនងទ្វេភាគីឱ្យបានខ្ពស់មួយកម្រិតទៀត ដើម្បីជាផលប្រយោជន៍ទៅវិញទៅមកសម្រាប់ប្រទេសទាំង ២ ក៏ដូចជាតំបន់ និងពិភពលោក។
ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា លោក គិន ភា ប្រាប់ ភ្នំពេញ ប៉ុស្តិ៍ ពីម្សិលមិញថា ការសម្តែងនូវការអបអរសាទររបស់ថ្នាក់ដឹកនាំកម្ពុជា គឺឆ្លុះបញ្ចាំងពីទំនាក់ទំនងរវាងប្រទេសទាំង ២ ក្នុងឋានៈជាអ្នកជិតខាងល្អនឹងគ្នា បើទោះបីជាកន្លងមក ភាគីទាំង ២ មានបញ្ហាបន្តិចបន្តួចក្តី។ លោកថ្លែងថា៖ «បើយើងមើលក្របខ័ណ្ឌឯកសារ និងសេចក្តីប្រកាសនានាដែលធ្វើឡើង [ដោយ] ប្រទេសទាំង ២ គឺធ្វើឡើងក្រោមទំនាក់ទំនងប្រពៃណីក្នុងនាមជាអ្នកជិតខាងល្អ ទោះបីជាក់ស្តែងមិនយល់គ្នាបន្តិចបន្តួចពាក់ព័ន្ធបញ្ហាព្រំដែន។ ប៉ុន្តែបើយើងវាយតម្លៃជារួមទៅទំនាក់ទំនងរវាងប្រទេសទាំង ២ គឺជាទំនាក់ទំនងជាអ្នកជិតខាងល្អ»។
លោក Nguyen Phu Trong អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាមធ្លាប់បានមកបំពេញទស្សនកិច្ចនៅកម្ពុជាកាលពីថ្ងៃទី ២៥-២៦ កុម្ភៈ ឆ្នាំ ២០១៩ និងបានចេញសេចក្តីថ្លែងការណ៍រួមថា កម្ពុជា-វៀតណាមបានអរគុណគ្នាទៅវិញទៅមក ចំពោះការជួយគ្នាទាំងក្នុងអតីតកាល រហូតដល់បច្ចុប្បន្ន និងបានសម្តែងនូវក្តីរីករាយចំពោះការរីកចម្រើននៃចំណងមិត្តភាព និងកិច្ចសហប្រតិបត្តិការគ្រប់ជ្រុងជ្រោយក្នុងរយៈពេលប៉ុន្មានឆ្នាំកន្លងមកដែលបានរួមចំណែកក្នុងការធានាសន្តិភាព ស្ថិរភាព និងនាំមកនូវផលប្រយោជន៍ជាក់ស្តែងជូនប្រជាជននៃប្រទេសទាំង ២៕
