.jpg)
ភ្ញៀវទេសចរជាតិ និងអន្តរជាតិ កំពុងដើរគយគន់ពីភាពដ៏មហាអស្ចារ្យនៃប្រាសាទអង្គរវត្តកាលពីពេលកន្លងមក។ ហេង ជីវ័ន
ភ្នំពេញៈ នៅក្នុងខួប ២៨ ឆ្នាំ នៃការដាក់បញ្ចូលរមណីយដ្ឋានអង្គរទៅក្នុងបញ្ជីបេតិកភណ្ឌពិភពលោក ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី និងលោកនាយករដ្ឋមន្ត្រី ហ៊ុន សែន បានផ្តល់តម្លៃខ្ពស់ចំពោះព្រឹត្តិការណ៍នេះ និងបានប្តេជ្ញាចិត្តយ៉ាងមុតមាំក្នុងការបន្តអភិរក្សបេតិកភណ្ឌដ៏អស្ចារ្យនេះ ខណៈបច្ចុប្បន្នអង្គរវត្តបានក្លាយជាគោលដៅទេសចរណ៍លេខ ១ នៅលើពិភពលោក។
រមណីយដ្ឋានអង្គរត្រូវបានដាក់បញ្ចូលក្នុងបញ្ជីបេតិកភណ្ឌពិភពលោករបស់អង្គការយូណេស្កូអស់រយៈពេល ២៨ ឆ្នាំ មកហើយគិតត្រឹមថ្ងៃម្សិលមិញ (១៤ ធ្នូ ១៩៩២-១៤ ធ្នូ ២០២០)។
កាលពីថ្ងៃម្សិលមិញព្រះមហាក្សត្រព្រះបាទនរោត្តម សីហមុនី បានចេញព្រះសារលិខិតអបអរសាទរខួបអនុស្សាវរីយ៍លើកទី ២៨ នៃការដាក់បញ្ចូលក្រុមប្រាសាទអង្គរ ចូលជាសម្បត្តិបេតិកភណ្ឌពិភពលោក។
ព្រះមហាក្សត្រមានព្រះរាជបន្ទូលថា៖ «កូនចៅប្រជានុរាស្ត្រទូទាំងព្រះរាជាណាចក្រកម្ពុជា សូមព្រះបរមរាជានុញ្ញាតក្រាបបង្គំថ្វាយនូវអំណរព្រះរាជគុណ និងមហាព្រះរាជកុសល ថ្វាយព្រះវិញ្ញាណក្ខន្ធ ព្រះករុណាព្រះបរមរតនកោដ្ឋ ព្រះវររាជបិតាស្ថាបនាជាតិ ជាទីគោរពសក្ការៈដ៏ខ្ពង់ខ្ពស់បំផុតដែលព្រះអង្គបានត្រួសត្រាយផ្លូវដ៏សំខាន់ក្នុងកិច្ចការពារលើកតម្កើងកិត្តិនាមដ៏ឧត្តុង្គឧត្តមនៃក្រុមប្រាសាទអង្គរ ការពារអភិរក្ស និងអភិវឌ្ឍន៍រមណីយដ្ឋានអង្គរ ដើម្បីទុកជាសម្បត្តិដ៏មានតម្លៃពុំអាចកាត់ថ្លៃបានជូនដល់កូនចៅជំនាន់ក្រោយនៃប្រជាជាតិកម្ពុជា»។
ជាមួយគ្នានេះលោកនាយករដ្ឋមន្ត្រីក៏បានបង្ហោះសារអបអរសាទរខួបលើកទី២៨ នៃការដាក់បញ្ចូលរមណីយដ្ឋានអង្គរក្នុងបញ្ជីបេតិកភណ្ឌពិភពលោកនេះផងដែរដោយលោកបានកត់សម្គាល់ថា នេះគឺជាការរំឭកស្មារតីកូនខ្មែរគ្រប់រូបឱ្យចេះស្រឡាញ់ និងចូលរួមថែរក្សាបេតិកភណ្ឌ ជាពិសេសគឺសម្តែងនូវការដឹងគុណដ៏ជ្រាលជ្រៅដល់បុព្វបុរសខ្មែរ ដែលបានពលិកម្មដើម្បីបុព្វហេតុអរិយធម៌ដ៏រុងរឿងរបស់ខ្មែរ នាសម័យអតីតកាល និងការតស៊ូជាបន្តបន្ទាប់របស់ថ្នាក់ដឹកនាំប្រទេសក្នុងការជម្នះរាល់ឧបសគ្គទាំងឡាយ ដើម្បីការពារឱ្យបាននូវសម្បត្តិបេតិកភណ្ឌដ៏មានតម្លៃរបស់ជាតិ និងពិភពលោកទាំងមូល។
លោក ហ៊ុន សែន លើកឡើងថា៖ «រដ្ឋាភិបាលកម្ពុជាបានប្តេជ្ញាចិត្តយ៉ាងមុតមាំក្នុងការអភិរក្សបេតិកភណ្ឌមួយដ៏អស្ចារ្យនេះ។ បច្ចុប្បន្នអង្គរវត្តបានក្លាយជាគោលដៅទេសចរណ៍លេខ ១ នៅលើពិភពលោកដោយបានទាក់ទាញភ្ញៀវទេសចរអន្តរជាតិរាប់លាននាក់មកទស្សនា និងបានស្គាល់ពីសម្បតិ្តវប្បធម៌ប្រទេសកម្ពុជា»។ លោកនាយករដ្ឋមន្ត្រីបានសង្កត់ធ្ងន់ថា កិច្ចការពារសម្បត្តិបេតិកភណ្ឌវប្បធម៌ ជាភារកិច្ចរបស់កូនខ្មែរគ្រប់ៗរូប។
ទិដ្ឋភាពប្រាសាទអង្គរ បន្ទាប់ពីថ្ងៃលិចកន្លងមក។ហេង ជីវ័ន
ក្រុមប្រាសាទអង្គរត្រូវបានដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូនៅថ្ងៃទី ១៤ ខែធ្នូ ឆ្នាំ ១៩៩២ នាទីក្រុងសាន់តាហ្វេ សហរដ្ឋអាមេរិកក្រោមព្រះរាជតម្រិះរបស់ព្រះករុណា ព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ ព្រះអង្គបានធ្វើការអំពាវនាវទៅកាន់អង្គការយូណេស្កូ សុំឱ្យជួយស្រោចស្រង់ការពារក្រុមប្រាសាទអង្គរ។
ឆ្លើយតបទៅតាមការអំពាវនាវរបស់ព្រះបរមរតនកោដ្ឋ បន្ទាប់ពីការដាក់បញ្ចូលតំបន់រមណីយដ្ឋានអង្គរចូលក្នុងបញ្ជីបេតិកភណ្ឌពិភពលោក សន្និសីទអន្តរជាតិមួយបានប្រារព្ធធ្វើឡើងនៅទីក្រុងតូក្យូចាប់ពីថ្ងៃទី ១២-១៣ ខែតុលា ឆ្នាំ ១៩៩៣ ក្រោមការផ្តួចផ្តើមគំនិតរបស់រាជរដ្ឋាភិបាលជប៉ុន ដោយមានការគាំទ្រពីប្រទេសបារាំង និងអង្គការយូណេស្កូ ដើម្បីដាក់ចេញនូវយុទ្ធសាស្ត្រ និងផែនការសកម្មភាពនានាជាប្រយោជន៍ដល់កិច្ចការពារអភិរក្ស និងអភិវឌ្ឍន៍រមណីយដ្ឋានអង្គរ ហើយដើម្បីសម្រេចគោលដៅនេះ គណៈកម្មាធិការសម្របសម្រួលអន្តរជាតិ ហៅកាត់ថា អាយស៊ីស៊ីអង្គរ (ICC-Angkor) ត្រូវបានបង្កើតឡើងនាខែធ្នូ ឆ្នាំ ១៩៩៣។
នៅថ្ងៃម្សិលមិញនេះដែរអាជ្ញាធរជាតិអប្សរាក៏បានបង្ហាញនូវវីដេអូខ្លីមួយពីរមណីយដ្ឋានអង្គរ ដើម្បីអបអរសាទរខួបអនុស្សាវរីយ៍លើកទី ២៨ នៃការដាក់បញ្ចូលក្រុមប្រាសាទអង្គរក្នុងបញ្ជីបេតិកភណ្ឌពិភពលោក។
អាជ្ញាធរជាតិអប្សរាបានចាត់ទុកថា ជាការរំឭកនូវស្មារតីកូនខ្មែរគ្រប់រូបឱ្យចេះស្រឡាញ់ និងចូលរួមថែរក្សាបេតិកភណ្ឌ ជាពិសេសគឺសម្តែងនូវការដឹងគុណដ៏ជ្រាលជ្រៅដល់បុព្វបុរសខ្មែរ ដើម្បីបុព្វហេតុអរិយធម៌ដ៏រុងរឿងរបស់ខ្មែរនាសម័យអតីតកាល និងការតស៊ូជាបន្តបន្ទាប់របស់ថ្នាក់ដឹកនាំប្រទេសក្នុងការជម្នះរាល់ឧបសគ្គទាំងឡាយ ការពារឱ្យបាននូវសម្បត្តិបេតិកភណ្ឌដ៏មានតម្លៃរបស់ជាតិ និងពិភពលោកទាំងមូល៕
