.jpg)
ព្រះមហាក្សត្រព្រះបាទ នរោត្តម សីហមុនី និងសម្ដេចម៉ែកាលពីកន្លងមក។ ហេង ជីវ័ន
ភ្នំពេញៈ សម្ដេចព្រះមហាក្សត្រី នរោត្តម មុនីនាថ សីហនុ និងព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានប្រកាសបរិច្ចាគព្រះរាជទ្រព្យក្នុង ១ ព្រះអង្គ ១ លានដុល្លារដល់គណៈកម្មការជាតិប្រយុទ្ធនឹងជំងឺកូវីដ ១៩ ដែលជាការបរិច្ចាគលើកទី ២ ចាប់ពីមានជំងឺកូវីដ ១៩ មក ។
ការបរិច្ចាគព្រះរាជទ្រព្យលើកទី ២ នេះគឺធ្វើឡើងតាមរយៈព្រះរាជសាររបស់ព្រះអង្គទាំង ២ ផ្ញើទៅកាន់លោកនាយករដ្ឋមន្ត្រី ហ៊ុន សែន ប្រធានគណៈកម្មការជាតិប្រយុទ្ធនឹងជំងឺកូវីដ១៩ ដែលចេញផ្សាយកាលពី ២៤ មិថុនា ដើម្បីគាំទ្រក្នុងសកម្មភាពបង្ការ និងទប់ស្កាត់ការរាតត្បាតជំងឺកូវីដ ១៩ ដែលកំពុងរាលដាលនៅក្នុងពេលបច្ចុប្បន្ននេះ។
កាលពីខែមីនាកន្លងទៅ ព្រះអង្គទាំងទ្វេក៏បានបរិច្ចាគទឹកប្រាក់ ៣ សែនដុល្លារទៅដល់គណៈកម្មការជាតិនេះផងដែរ។
លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ថា ទឹកប្រាក់ឧបត្ថម្ភដែលរដ្ឋាភិបាលទទួលបានពីសប្បុរសជននានាពីព្រះមហាក្សត្រ និងព្រះមហាក្សត្រីដែលពុំបានចាយវាយអស់ក្នុងសកម្មភាពប្រយុទ្ធនឹងជំងឺកូវីដ១៩គឺនឹងត្រូវបរិច្ចាគទៅកាន់មន្ទីរពេទ្យគន្ធបុប្ផា និងការចំណាយទៅលើវិស័យសុខាភិបាលដែលមិនពាក់ព័ន្ធនឹងជំងឺកូវីដ ១៩។
នៅថ្ងៃ ២៤ មិថុនាក្រសួងសុខាភិបាលបានប្រកាសអ្នកជាសះស្បើយពីជំងឺកូវីដ១៩ម្នាក់ទៀតដែលជាបុរសជនជាតិខ្មែរអាយុ ២១ ឆ្នាំ ដែលបានឆ្លងជំងឺនេះបន្ទាប់ពីធ្វើដំណើរពីប្រទេសម៉ាឡេស៊ី។ អ្នកជាសះស្បើយសរុបកើនដល់ ១២៨ នាក់ ក្នុងចំណោមអ្នកឆ្លងជំងឺនេះ ១៣០ នាក់។
កាលពីថ្ងៃទី ២១ មិថុនា ក្រសួងសុខាភិបាលបានក្រើនរំឭកឱ្យពលរដ្ឋត្រូវបន្តអនុវត្តនូវវិធានការនានារបស់ក្រសួងឱ្យបានខ្ជាប់ខ្ជួនដូចជា ការធ្វើអនាម័យដៃស្អាត ពាក់ម៉ាស់ ឬប្រើក្រមានៅពេលក្អក ឬកណ្ដាស់ និងត្រូវរក្សាចន្លោះសុវត្ថិភាពសង្គម និងបុគ្គលដើម្បីបញ្ចៀសការកើតឡើងរលកទី ២ នៃការចម្លងជំងឺកូវីដ ១៩ នេះ។
ដោយឡែកលោក ឃួង ស្រេង អភិបាលរាជធានីភ្នំពេញបានប្រាប់ភ្នំពេញប៉ុស្ដិ៍កាលពីថ្ងៃ ២៤ មិថុនា ដែរថា សាលាក្រុងនឹងប្រើប្រាស់សាលារៀនចំនួន ២ បន្ថែមទៀត គឺអនុវិទ្យាល័យគោកបញ្ជាន់នៅខណ្ឌពោធិ៍សែនជ័យ និងវិទ្យាល័យឫស្សីកែវនៅខណ្ឌឫស្សីកែវសម្រាប់ធ្វើចត្តាឡីស័កពលរដ្ឋខ្មែរដែលមកពីក្រៅប្រទេសក្នុងករណីមានការខ្វះខាត។
លោកថា៖ «នៅសាលាទាំង ២ ហ្នឹង យើងបានត្រៀមគ្រែ ភួយ ខ្នើយ សម្រាប់បងប្អូនប្រជាពលរដ្ឋដែលត្រូវធ្វើចត្តាឡីស័ក។ បន្ទប់ទឹក និងកន្លែងស្នាក់នៅគឺយើងនឹងរៀបចំឱ្យបានល្អដើម្បីធ្វើយ៉ាងណាឱ្យពួកគាត់ធ្វើចត្តាឡីស័កប្រកបដោយសុខុមាលភាព»។
រដ្ឋាភិបាលបានចាប់ផ្ដើមធ្វើចត្តាឡីស័ករាល់អ្នកដំណើរមកពីបរទេសទាំងអស់ចាប់តាំងពីថ្ងៃទី ២០ ខែឧសភា។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានប្រាប់អ្នកសារព័ត៌មានកាលពីថ្ងៃទី ២៣ ខែមិថុនា ថា កម្ពុជានៅតែទទួលអ្នកដំណើរមកពីក្រៅប្រទេសដោយអ្នកដំណើរជនជាតិខ្មែរត្រូវធ្វើចត្តាឡីស័កនៅមណ្ឌលចត្តាឡីស័កដែលរៀបចំដោយរដ្ឋាភិបាលក្នុងករណីធ្វើដំណើរជាមួយអ្នកឆ្លងជំងឺកូវីដ ហើយសម្រាប់ជនបរទេសគឺត្រូវបញ្ជូនទៅធ្វើចត្តាឡីស័កនៅតាមសណ្ឋាគារ។
លោកបញ្ជាក់ថា មកដល់ពេលនេះមណ្ឌលចត្តាឡីស័កទាំង ៣ នៅភ្នំពេញដែលអាចដាក់មនុស្សបាន ៤០០ នាក់ គឺនៅមានសល់គ្រែទៀត ដោយសារមានពលរដ្ឋខ្លះត្រូវបានបញ្ជូនទៅធ្វើចត្តាឡីស័កនៅតាមបណ្ដាខេត្ត។
លោកស្រីថា៖ «សម្រាប់ជនបរទេសក៏យើងអត់ខ្វះសណ្ឋាគារទេដោយសារឥឡូវនេះម្ចាស់សណ្ឋាគារគាត់សហការជាមួយក្រសួងសុខាភិបាលហើយសម្រាប់ (អ្នកដំណើរ) ជាពលរដ្ឋខ្មែរគឺយើងនៅតែបង្វិលបាននៅឡើយគឺយើងអាចដាក់នៅមណ្ឌលចត្តាឡីស័កជម្ពូវ័នបាន ២០០ នាក់ នៅមូលដ្ឋានកងទ័ពអាកាសដាក់បាន ១០០ នាក់ និងនៅមណ្ឌលសុខភាពចាក់អង្រែក្រោមដាក់បាន ១០០ នាក់។ អ៊ីចឹង!យើងបានត្រៀម ៤០០ នាក់សម្រាប់វិលជុំ»។
លោកស្រីបញ្ជាក់ថា គិតមកទល់ថ្ងៃទី ២៣ មិថុនា មានអ្នកដំណើរតាមជើងយន្តហោះជាង ១ ម៉ឺន ២ ពាន់នាក់ ត្រូវបានយកសំណាកទៅធ្វើតេស្ដ។
លោកស្រីបានបញ្ជាក់ថា៖ «ក្រុមការងាររបស់យើងធ្វើការងារ ២៤ ម៉ោង ទោះយន្តហោះចុះនៅម៉ោង ៤ ទៀបភ្លឺក៏នៅតែមានក្រុមការងារយើងប្រចាំការជានិច្ចគឺអ្នកដំណើរចុះពីលើយន្តហោះទាំងអស់ត្រូវឆ្លងកាត់ចត្តាឡីស័កតាមរយៈកាមេរ៉ាសុវត្ថិភាពស្គែនកម្ដៅ ហើយបើមានកម្ដៅហ្នឹងសង្ស័យគឺយើងចាប់គាត់នៅកន្លែងនោះភ្លាម»៕
