The Phnom Penh Post Search

Search form




Logo of Phnom Penh Post newspaper Phnom Penh Post - ព្រះរាជពិធី​ច្រត់ព្រះនង្គ័ល​នឹង​ធ្វើ​នៅ​បាត់ដំបង

ព្រះរាជពិធី​ច្រត់ព្រះនង្គ័ល​នឹង​ធ្វើ​នៅ​បាត់ដំបង

ពិធី​ច្រត់ព្រះនង្គ័ល​នៅក្នុង​ខេត្ត​កំពង់ចាម​កាលពី​ឆ្នាំ ២០១៣ កន្លងមក​។
ពិធី​ច្រត់ព្រះនង្គ័ល​នៅក្នុង​ខេត្ត​កំពង់ចាម​កាលពី​ឆ្នាំ ២០១៣ កន្លងមក​។ ហេង ជីវ័ន

ព្រះរាជពិធី​ច្រត់ព្រះនង្គ័ល​នឹង​ធ្វើ​នៅ​បាត់ដំបង

ភ្នំពេញៈ ព្រះរាជពិធី​ច្រត់ព្រះនង្គ័ល​សម្រាប់​ឆ្នាំ ២០១៥ នេះ នឹង​​ប្រារព្ធ​ធ្វើ​ឡើង​នៅ​ថ្ងៃ​ទី ៦ ខែ​ឧសភា​ខាង​មុខ​នេះ នៅ​ទីលាន​បាល់ទាត់ វាល​បែកចាន ស្ថិត​ក្នុង​​ភូមិ​រំចេក​៤ សង្កាត់​រតនៈ ក្រុង​បាត់ដំបង ខេត្ត​បាត់ដំបង​។

អគ្គលេខាធិការ​គណៈកម្មាធិការ​​រៀបចំ​បុណ្យជាតិ និង​អន្តរជាតិ លោក ឈិន កេតនា បាន​ឲ្យ​ដឹង​ថា ព្រះរាជពិធី​ច្រត់ព្រះនង្គ័ល ដែល​តែងតែ​ត្រូវ​បាន​ប្រារព្ធ​ធ្វើ​ឡើង​ជា​រៀងរាល់​ឆ្នាំ​ក្នុង​ខែ​ពិសាខ​ដោយ​មាន​ការយាង និង​អញ្ជើញ​ចូលរួម​ពី​ព្រះមហាក្សត្រ​មន្ត្រី​ជាន់ខ្ពស់​រដ្ឋាភិបាល​ សមាជិក​ព្រឹទ្ធសភា រដ្ឋសភា និង​អង្គទូត​នានា​ផង​ដែរ។

លោក​ថា៖ «យើង​បាន​ដាក់​លិខិត​ទៅ​ប្រមុខ​រដ្ឋាភិបាល​សម្តេចនាយក​ដែរ តែ​មិន​ទាន់​មាន​ការឆ្លើយតប​នោះ​ទេ ព្រោះ​ក្នុង​ឆ្នាំ​ខ្លះ​គាត់​អាច​នឹង​ជាប់​រវល់»។

បើ​តាម​លោក ឈិន កេតនា ក្នុង​ព្រះរាជពិធី តំណាង​ព្រះរាជា ឬ​ហៅថា ស្តេចមាឃ នឹង​តំណាង​ដោយ​អភិបាល​ខេត្ត​បាត់ដំបង គឺ​លោក ច័ន្ទ សុផល ចំណែក​ភរិយា​របស់​លោក​សម្តែង​ជា​ព្រះអគ្គមហេសី ឬ​ហៅ​ថា នាង​មេហួ។

លោក​ថា៖ «ការធ្វើ​ពិធី​បុណ្យ​​នេះ​គឺ​ក្រុម​ការងារ​បាន​រៀប​ផែនការ​សម្រាប់ ៥ ឆ្នាំ​ម្តង​នៅ​ឆ្នាំ​ក្រោយ​យើង​នឹង​ធ្វើ​នៅ​ព្រៃវែង​ឆ្នាំ​ក្រោយ​ទៀត នៅ​ខេត្ត​តាកែវ ប៉ុន្តែ​ផែនការ​ទាំងនេះ អាច​ប្រែប្រួល​ទៅ​តាម​ស្ថានភាព​ជាក់ស្តែង»។

ពាក់ព័ន្ធ​សុវត្ថិភាព និង​សន្តិសុខ​​សាធារណៈ​សម្រាប់​ពិធី​បុណ្យ​នេះ អ្នក​នាំពាក្យ​កងរាជ​អាវុធហត្ថ​លើ​ផ្ទៃ​ប្រទេស លោក ខេង ទីតូ បាន​ឲ្យ​ដឹង​ថា រាជអាវុធហត្ថ​ខេត្ត​បាត់ដំបង បាន​ធ្វើ​ផែនការ​រួច​ហើយ ដោយ​ប្រើប្រាស់​កម្លាំង​សរុប ២១៧ នាក់ ប្រើប្រាស់​រថយន្ត​រួម ២៥ គ្រឿង ក្នុង​នោះ​មាន​រថយន្ត​ស៊ីរ៉ែន​នាំ​ក្បួន ១ គ្រឿង រថយន្ត​សង្គ្រោះ ១ គ្រឿង និង​រថយន្ត​បម្រើការ ២៣ គ្រឿង។

ស្នងការ​ខេត្ត​បាត់ដំបង លោក ស ថេត បាន​ឲ្យ​ដឹង​ថា សម្រាប់​នគរបាល​ជាតិ​វិញ ក៏​បាន​រៀបចំ​នូវ​ផែនការ​ដាក់​កម្លាំង​ការពារ និង​ការប្រើប្រាស់​រថយន្ត​នានា​ក្នុង​ពិធី​នេះ​ជាដើម តែ​របាយការណ៍​ជាក់លាក់​ពី​តួលេខ​នោះ គឺ​លោក​មិន​ទាន់​មាន​នៅ​ឡើយ​ទេ។ លោក​ថា៖ «យើង​បាន​រៀប​ផែនការ​រួចរាល់​ហើយ តែ​មិន​អាច​ប្រាប់​លម្អិត​ទេ»៕

អត្ថបទគួរចាប់អារម្មណ៍