.jpg)
ព្រះរាជអាជ្ញារងខេត្តកោះកុង ដែលត្រូវបានព្យួរការងារ។ ហ្វេសប៊ុក
រតនគិរីៈ លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានប្រាប់ភ្នំពេញប៉ុស្តិ៍កាលពីម្សិលមិញថា ក្រសួងយុត្តិធម៌បានផ្អាកតួនាទី លោក ជា ពេជ្រ ព្រះរាជអាជ្ញានៃអយ្យការអមសាលាដំបូងខេត្តរតនគិរីបណ្តោះអាសន្ន ក្រោយពីរងការចោទពីភរិយាថា មានរឿងអាស្រូវផ្លូវភេទ។
លោក ម៉ាលីន ឲ្យដឹងថា លោក ជា ពេជ្រ មានវិវាទផ្ទាល់ខ្លួនជាមួយភរិយារបស់គាត់ ហើយភរិយារបស់គាត់បានប្តឹងគាត់ទៅតុលាការរាជធានីភ្នំពេញពីបទឯកព័ន្ធភាព (ប្តីមួយប្រពន្ធមួយ)។ មកដល់ពេលនេះតុលាការកំពុងដំណើរការសំណុំរឿងរបស់គាត់ពាក់ព័ន្ធបទល្មើសផិតតាមច្បាប់ឯកព័ន្ធភាព។
លោក ជិន ម៉ាលីន បញ្ជាក់ថា៖ «ជាគោលការណ៍ច្បាប់ កាលណាមន្ត្រីណាមួយជាប់បណ្ដឹងនៅតុលាការគឺ យើងព្យួរការងារគាត់បណ្តោះអាសន្នមួយរយៈសិន រង់ចាំរហូតដល់បញ្ចប់នីតិវិធីតុលាការ។ អ៊ីចឹង នេះមិនមែនជាការដកតំណែង បញ្ចប់មុខតំណែងគាត់ ឬក៏ជាការដាក់ទណ្ឌកម្មទេ (តែ) គ្រាន់តែផ្អាកការងារគាត់មួយរយៈ»។
លោក ម៉ាលីន បន្ថែមថា នៅពេលដែលតុលាការដោះស្រាយរឿងរបស់លោក ជា ពេជ្រ ចប់សព្វគ្រប់ហើយ ហើយបើរកឃើញថា មិនមានទោសកំហុសអ្វីនោះទេ គាត់នឹងទៅបំពេញការងារដូចដើម។ ប៉ុន្តែក្នុងករណីដែលលោក ជា ពេជ្រ ត្រូវបានរកឃើញថា មានទោសកំហុសតាមបទល្មើសដែលបានចោទនោះមែន គាត់នឹងទទួលទោសតាមផ្នែកច្បាប់ដែលបានបញ្ញត្តិតាមការសម្រេចរបស់តុលាការ ហើយមួយទៀតគាត់នឹងទទួលខុសត្រូវផ្នែកវិន័យ ដូចជាការបញ្ចប់មុខងារដោយលុបឈ្មោះចេញពីក្របខ័ណ្ឌជាដើម។
យោងតាមលិខិត លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌បានបានឲ្យដឹងថា ក្រសួងយុត្តិធម៌បានទទួលលិខិតរបស់អយ្យការអមសាលាដំបូងរាជធានីភ្នំពេញចុះថ្ងៃទី ២៤ ខែ កក្កដា ដែលបានជូនដំណឹងដល់ក្រសួងអំពីការចោទប្រកាន់លើលោក ជា ពេជ្រ ពីបទផិត ដែលបានប្រព្រឹត្តនៅខេត្តរតនគិរី និងរាជធានីភ្នំពេញ កាលពីឆ្នាំ ២០១៧ ដល់ឆ្នាំ ២០១៩។
លោកស្រី ហ៊ាន លក្ខិណា បានដាក់ពាក្យបណ្តឹងកាលពីខែកុម្ភៈ ទៅកាន់ព្រះរាជអាជ្ញាអមសាលាដំបូងរាជធានីភ្នំពេញ ដោយប្តឹងលោក ជា ពេជ្រ ពីបទផិត និងបានចោទលោក ជា ពេជ្រ ថាបានលួចលាក់មានស្រីកំណាន់។
លោក ជា ពេជ្រ មិនអាចទាក់ទងដើម្បីសុំការបញ្ជាក់បានទេ។
ក្រោយពីផ្អាកតួនាទី លោក ជា ពេជ្រ ក្រសួងយុត្តិធម៌នៅថ្ងៃដដែលនោះ បានតែងតាំង លោក ងិន ពេជ្រ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញឱ្យមកបំពេញមុខងារជាព្រះរាជអាជ្ញាស្តីទីនៃអយ្យការអមសាលាដំបូងខេត្តរតនគិរី រហូតដល់មានការតែងតាំងព្រះរាជអាជ្ញាជាផ្លូវការ។
នៅ ១ ថ្ងៃមុននៃការផ្អាកតួនាទី លោក ជា ពេជ្រ នេះដែរ គឺនៅថ្ងៃពុធ ( ២៤ កក្កដា) ព្រះរាជអាជ្ញារងនៃអយ្យការអមសាលាដំបូងខេត្តកោះកុង លោក អ៊ង រី ត្រូវបានផ្ទេរឲ្យមកបំពេញការងារនៅក្រសួងយុត្តិធម៌ជាបណ្ដោះអាសន្ន ដែរបន្ទាប់ពីរងការចោទថា មានរឿងអាស្រូវផ្លូវភេទ ខណៈប្រពន្ធតាមទាន់នាំស្រីកំណាន់ចូលផ្ទះសំណាក់៕
