.jpg)
ជនសង្ស័យ ត្រូវបានសមត្ថកិច្ចបញ្ជូនដល់តុលាការខេត្តកាលពីថ្ងៃទី ៦ ខែមីនា ក្រោយពីការចាប់ខ្លួន។ រូបថត ប៉ូលីស
បន្ទាយមានជ័យៈ ព្រះរាជអាជ្ញានៃតុលាការខេត្តបន្ទាយមានជ័យកាលពីម្សិលមិញ បានចាប់ផ្ដើមបើកការសាកសួរទៅលើបុរសជាជនសង្ស័យម្នាក់មានអាយុ ៣៨ ឆ្នាំពាក់ព័ន្ធក្នុងអំពើឃាតកម្ម ក្រោយពីធ្វើសកម្មភាពរំលោភលើនារីម្នាក់នៅក្រុងប៉ោយប៉ែតកាលពីដើមខែមីនា ក្រោយពីចាប់ខ្លួនបានកាលពីថ្ងៃទី ៤ ខែមីនា។
លោក ភឿង ម៉ាន់សិង្ហ នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបន្ទាយមានជ័យ បានឲ្យដឹងកាលពីម្សិលមិញថា ជនសង្ស័យឈ្មោះ រឿន ធារិនអាយុ ៣៨ ឆ្នាំរស់នៅភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ត្រូវបានសមត្ថកិច្ចបញ្ជូនដល់តុលាការខេត្តកាលពីថ្ងៃទី ៦ ខែមីនា ក្រោយពីការចាប់ខ្លួន។
លោកថ្លែងថា៖ «រឿងនេះមានលោកព្រះរាជអាជ្ញា ២ រូបសួរចម្លើយជនសង្ស័យ។ តុលាការចាប់ផ្តើមសួរជនសង្ស័យពីថ្ងៃទី ៦ មីនា ប៉ុន្តែសួរមិនទាន់ចប់តុលាការបានផ្ញើនៅការិយាល័យខ្ញុំ ១ យប់ហើយថ្ងៃនេះ (ថ្ងៃទី ៧ មីនា) ខ្ញុំដឹកគាត់ទៅតុលាការបន្តទៀត»។
លោក ភឿង ម៉ាន់សិង្ហ បានថ្លែងដោយយោងតាមចម្លើយសារភាពរបស់ជនសង្ស័យឲ្យដឹងថា ជនសង្ស័យបានចាប់នារីរងគ្រោះរំលោភបានសម្រេចម្តង ប៉ុន្តែដោយសារតែខ្លាចជនរងគ្រោះប្តឹងឲ្យសមត្ថកិច្ចចាប់ផងនោះ ទើបជនសង្ស័យយកកូនកាំបិតចាក់ឆ្កៀលបំពង់ករបស់នារីរងគ្រោះរហូតស្លាប់។
បន្ទាប់ពីសម្លាប់ជនរងគ្រោះរួចជនសង្ស័យបានយកទូរស័ព្ទម៉ាក OPPO ១ គ្រឿង ចិញ្ចៀន ២ វង់ ខ្សែក ១ ខ្សែ ប្រាក់ ១២០ ដុល្លារ និងប្រាក់បាតថៃចំនួន ៦ ពាន់បាត ហើយគេចខ្លួន។ បន្ទាប់ពីធ្វើការស្រាវជ្រាវ សមត្ថកិច្ចក៏ចាប់ជនសង្ស័យបាននៅផ្ទះសំណាក់មួយក្នុងខេត្តសៀមរាបកាលពីថ្ងៃទី ៤ មីនា៕
