បាត់ដំបង៖ យ៉ាងហោចណាស់មានគ្រាប់កាំភ្លើងចំនួន ១០ កេស ដែលភាគច្រើនជាប្រភេទគ្រាប់កាំភ្លើងយន្តត្រូវបានព្រះសង្ឃប្រទះឃើញកប់ក្នុងដីនៃទីអារាមគាស់ក្រឡ នៅក្នុងភូមិមុខវត្តឃុំគាស់ក្រឡ ស្រុកគាស់ក្រឡ ខេត្តបាត់ដំបង បន្ទាប់ពីព្រះចៅអធិការបានឱ្យគ្រឿងចក្រកាយដីបម្រុងដាក់លូថ្មី ដើម្បីរៀបចំសាង់សង់បន្ទប់ទឹក។
ព្រះតេជព្រះគុណ អេង សុវណ្ណ លោកគ្រូចៅអធិការវត្តគាស់ក្រឡបានមានសង្ឃដីកាប្រាប់ ភ្នំពេញ ប៉ុស្ដិ៍ នៅថ្ងៃទ ២៣ មីនានេះថា គ្រាប់ទាំងអស់នេះ ត្រូវបានប្រទះឃើញកាលពីថ្ងៃ ២២ ខែ មីនា ឆ្នាំ ២០២១ នៅពេលព្រះអង្គឱ្យអីស្កាវាក់ទ័រកាយដីបម្រុងដាក់លូថ្មីក្នុងការសាងសង់បន្ទប់ទឹក ប៉ុន្តែនៅពេលឃើញគ្រាប់ច្រើនបែបនេះក៏ឱ្យបញ្ឈប់កាយនោះវិញ។
ព្រះតេជព្រះគុណ អេង សុវណ្ណ បានបន្តថា បន្ទាប់ពីឃើញបែបនេះព្រះអង្គក៏បានរាយការណ៍ទៅអង្គភាពស៊ីម៉ាក់ប្រចាំខេត្តបាត់ដំបងដើម្បីឱ្យជួយយកចេញ ដែលរហូតមកទល់ពេលនេះប្រមូលបានចំនួន ១៦ កេស ហើយបើគិតពីចំនួនគឺមានប្រមាណ ៤ ០០០ គ្រាប់។ ប៉ុន្តែ បើពិនិត្យមើលទៅលើស្ថានភាពដីគឺអាចមានច្រើនបន្តទៀត។
ព្រះតេជព្រះគុណអេងសុវណ្ណក៏បានបង្ហាញពីបារម្ភចំពោះការរកឃើញគ្រាប់ទាំងនេះ ខណៈមានពលរដ្ឋមកមើលច្រើនដែលមិនមានរក្សាគម្លាតសង្គម ប៉ុន្តែបញ្ហានេះអាជ្ញាធរបានអប់រំណែនាំពួកគាត់រួចហើយ។ យ៉ាងណាក៏ដោយ ព្រះអង្គនិងព្រះសង្ឃផ្សេងៗទៀតមិនត្រូវបានណែនាំឱ្យចេញពីវត្តដើម្បីសុវត្ថិភាពនោះទេ ព្រោះគ្រាប់ទាំងអស់នេះត្រូវបានអះអាងថា មិនធ្វើឱ្យផ្ទះទេ។
បើតាមសង្ឃដីការបស់ព្រះតេជព្រះគុណ អេង សុវណ្ណ ទីតាំងវត្តនេះ កាលពីសម័យសង្គ្រាម លន់ នល់ រហូតមកសម័យខ្មែរក្រហម ត្រូវបានគេជ្រើសរើសយកធ្វើជាបន្ទាយទាហាន និងកន្លែងដាក់គ្រាប់ សម្រាប់ធ្វើសង្គ្រាមនាសម័យនោះ។
ព្រះតេជព្រះគុណបានបញ្ជាក់ថា៖ «តាមមេភូមិបានប្រាប់ថាគាត់ចាំបានពេលសម័យសង្គ្រាមលន់នល់ត្រូវបានបញ្ចប់គឺទីអារាមនេះត្រូវគេយកធ្វើជាបន្ទាយទាហាន ហើយអាកន្លែងមានឃើញគ្រាប់ហ្នឹង ជាកន្លែងត្រង់សេ ដាក់ប៉ារ៉ាស់បាញ់ ហើយកាលពីសម័យខ្មែរក្រហមក៏យកវត្តហ្នឹងធ្វើជាបន្ទាយដែរ»។
លោក ប៉ាង ហ៊ាង អធិការស្រុកគាស់ក្រឡក៏បានទទួលស្គាល់ដែរថា ក្នុងទីអារាមនេះ កាលពីសម័យសង្គ្រាម គឺជាបន្ទាយទាហាន ហើយក៏បានបន្សល់នូវគ្រាប់ជាច្រើនបែបនេះ។ ដូច្នេះ នៅពេលព្រះសង្ឈជីកឬកាយដាក់លូសម្រាប់ធ្វើបន្ទប់ទឹក៏ប្រទះឃើញតែម្ដង។
លោកថ្លែងថា៖ «កាលពីសម័យសង្គ្រាម ត្រូវបានគេទម្លាក់កេសគ្រាប់ជាច្រើននៅក្នុងទីអារាមនេះ។ ខ្ញុំបានប្រគល់ឱ្យអង្គភាពស៊ីម៉ាក់ធ្វើការរុករក និងប្រមូឡយកគ្រាប់ឱ្យអស់ពីនោះ ទើបខ្ញុំធ្វើរបាយការណ៍ទៅថ្នាក់លើ ព្រោះឥឡូវធ្វើយ៉ាងម៉េច បើមិនទាន់ប្រមូលអស់ផង»។
លោក ប៉ាង ហ៊ាង បញ្ជាក់ថា គ្រាប់ទាំងនេះជាប្រភេទគ្រាប់កាំភ្លើងយន្តហើយខូចគុណភាពប្រមាណ ៩០% មិនគួរឱ្យព្រួយបារម្ភទេ ហើយលោកក៏មិនអាចស្មានថា មានគ្រាប់ច្រើនកប់ក្នុងទីអារាមនេះទេ ព្រោះវាកប់នៅក្នុងដីជ្រៅ។
ចំណែក លោក ឌី វន្ធី ប្រតិបត្តិករដោះមីន CMAC ប្រចាំខេត្តបាត់ដំបងបានថ្លែងថា បន្ទាប់ពីទទួលបានព័ត៌មាននេះពីព្រះសង្ឃភ្លាម លោកបានឱ្យក្រុមការងារបស់លោកចុះប្រមូលគ្រាប់ទាំងអស់នោះយកទៅរក្សាទុកនៅកន្លែងដែលមានសុវត្ថិភាព។ មកទល់ពេលនេះ ក្រុមការងារប្រមូលបានជាង ១០ កេស ដែលមានរាប់ពាន់គ្រាប់។
យ៉ាងណាក្ដី លោក ឌី វន្ធី មិនទាន់អាចសន្និដ្ឋានបានថា តើនៅមានគ្រាប់ប៉ុន្មានកេសទៀតដែលកំពុងកប់នៅក្នុងដីនេះ ព្រោះដីនៅទីនេះ មានសភាពរឹងមិនងាយនឹងកាប់និងកាយរាវរកយកគ្រាប់ចេញទេ។ បើពិនិត្យជាក់ស្តែងមានគ្រាប់មួយចំនួនដែលប្រមូលបាននេះអាចនៅប្រើប្រាស់ បានខ្លះតែភាគច្រើនខូចគុណភា ប៉ុន្តែលោកសន្យាថា នឹងយកគ្រាប់ចេញពីវត្តឱ្យទាល់តែអស់។
បើតាមលោក ឌី វន្ធី ករណីនេះលោកបានទូលព្រះសង្ឃដែលគង់នៅក្នុងវត្តនេះឱ្យប្រាប់ដល់ពលរដ្ឋកុំឱ្យទៅកាន់កន្លែងមានគ្រាប់នេះដើម្បីសុវត្ថិភាព រហូតដល់យកគ្រាប់ចេញពីនោះអស់៕