.jpg)
ព្រះសង្ឃខ្លះក្នុងចំណោមព្រះសង្ឃទាំងនេះត្រូវបានហាមមិនឲ្យចូលរួមតវ៉ា។ រូបថត ហ្វេសប៊ុក
ភ្នំពេញៈ ព្រះសង្ឃចំនួន ៨ អង្គ មកពីខេត្តបាត់ដំបងត្រូវបានអាជ្ញាធរហាមឃាត់មិនឲ្យចូលរួមជាមួយសកម្មភាពតវ៉ារបស់ក្រុមយុវជន ដើម្បីទាមទារឲ្យមានការដោះលែងលោក រ៉ុង ឈុន ខណៈដែលការតវ៉ាកាលពីម្សិលមិញមានការប៉ះទង្គិចគ្នា និងត្រូវបានបំបែកដោយកម្លាំងសមត្ថកិច្ច។
កាលពីយប់ថ្ងៃទី ៤ ខែសីហា អាជ្ញាធរខណ្ឌចំការមនបាននិមន្ត និងហាមឃាត់ព្រះសង្ឃចំនួន ៨ អង្គ ដែលបាននិមន្តមកពីខេត្តបាត់ដំបងក្នុងគោលបំណងចូលរួមសកម្មភាពតវ៉ា ដើម្បីទាមទារឲ្យមានការដោះលែងលោក រ៉ុង ឈុន ប្រធានសហភាពសហជីពកម្ពុជា និងជាតំណាងក្រុមប្រឹក្សាឃ្លាំមើលកម្ពុជា បន្ទាប់ពីត្រូវបានសមត្ថកិច្ចចាប់ខ្លួន និងត្រូវបានតុលាការចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍។
លោក រ៉ុង ឈុន ត្រូវបានឃាត់ខ្លួនបន្ទាប់ពីលោកបានចេញសេចក្តីថ្លែងការណ៍មួយកាលពីថ្ងៃទី ២១ ខែកក្កដា ដោយបានលើកឡើងថា ក្រុមការងាររបស់លោកបានចុះទៅពិនិត្យបង្គោលព្រំដែនលេខ ១១៤ ដល់ ១១៩ ក្នុងភូមិសាស្ត្រឃុំត្រពាំងផ្លុង ស្រុកពញាក្រែក ខេត្តត្បូងឃ្មុំកាលពីថ្ងៃទី ២០ ខែកក្កដា ហើយរកឃើញភាពមិនប្រក្រតីជាច្រើនដែលធ្វើឱ្យដីអាស្រ័យផលរបស់ពលរដ្ឋនៅភូមិសាស្ត្រនោះជាច្រើនរយហិកតាបាត់បង់ទៅខាងភាគីវៀតណាម។
លោក ថេង សុថុល អភិបាលខណ្ឌចំការមនបានប្រាប់ភ្នំពេញប៉ុស្តិ៍កាលពីម្សិលមិញថា ព្រះសង្ឃទាំង ៨ អង្គ ដែលឡើងមកពីខេត្តបាត់ដំបងនេះគឺត្រូវបានឃាត់ព្រះកាយឲ្យគង់នៅវត្តបទុមវត្តីដោយរង់ចាំការសម្រេចពីគណៈសង្ឃ។
ប៉ុន្តែលោកមិនបានបញ្ជាក់ថា ការឃាត់ព្រះកាយព្រះសង្ឃទាំង ៨ អង្គនេះ ដោយមូលហេតុអ្វីនោះទេដោយគ្រាន់តែបញ្ជាក់ថា ការឃាត់ព្រះកាយព្រះសង្ឃនេះ គឺមិនមានករណីចាប់ផ្សឹកនោះទេ។ លោកបញ្ជាក់ប្រាប់ស្របពេលដែលលោកកំពុងចុះទប់ស្កាត់កម្លាំងបាតុកម្មរបស់ក្រុមយុវជនដែលប្រមូលផ្តុំដើរហែក្បួន ដើម្បីទាមទារឲ្យដោះលែងលោក រ៉ុង ឈុន យ៉ាងដូច្នេះថា៖ «យើងអត់មានបានផ្សឹកគាត់ទេ គឺព្រះសង្ឃទាំងអស់ គង់នៅវត្តបទុមវត្តី»។
កញ្ញា ឈឿន ដារ៉ាវី ដែលចូលរួមក្នុងការតវ៉ាទាមទារឲ្យដោះលែងលោក រ៉ុង ឈុន កាលពីម្សិលមិញបានលើកឡើងថា ចាប់តាំងពីព្រះសង្ឃទាំង ៨ អង្គ ត្រូវបានសមត្ថកិច្ចឃាត់ព្រះកាយកាលពីយប់ថ្ងៃអង្គារមករហូតមកដល់រសៀលថ្ងៃពុធម្សិលមិញ ក្រុមយុវជនមិនទាន់រកឃើញព្រះសង្ឃថា គង់នៅទីណាឲ្យពិតប្រាកដនៅឡើយទេ។
ចំណែកការប្រមូលផ្តុំការតវ៉ាកញ្ញាបានអះអាងថា ក្រុមយុវជនរួមទាំងប្រជាពលរដ្ឋមានគ្នាប្រមាណជាង ២០ នាក់ ត្រូវបានបំបែករហូតធ្វើឲ្យរងរបួស និងបាត់បង់សម្ភារមួយចំនួនបន្ទាប់ពីបានប្រមូលផ្តុំគ្នា ដើម្បីតវ៉ាទាមទារឲ្យដោះលែងលោក រ៉ុង ឈុន។
កញ្ញាបញ្ជាក់ថា៖ «ពួកខ្ញុំនៅតែបន្តគឺមិនរួញរាទេ បើទោះជាគេវ៉ៃ ទាត់ធាក់ ឬចាប់ពួកខ្ញុំដាក់គុកទៀតក៏ខ្ញុំនៅតែបន្តតវ៉ាដែរ ព្រោះដើម្បីយុត្តិធម៌ក្នុងសង្គម ខ្ញុំមិនចង់នៅប្រើផ្នត់គំនិតចាស់ ដែលនៅតែខ្លាចដដែលជាដដែល ដែលធ្វើឲ្យពួកមនុស្សអាក្រក់មានឱកាសជិះជាន់ប្រជាជន។ ពួកខ្ញុំលែងនៅស្ងៀមទៀតហើយខ្ញុំសុខចិត្តដាក់ជីវិតក្នុងការទាមទារនេះ»។
អ្នកនាំពាក្យក្រសួងយុត្តិធម៌កាលពីថ្ងៃទី ៣ ខែសីហា បានចេញសេចក្តីប្រកាសព័ត៌មានមួយដោយព្រមានចាត់វិធានការតាមផ្លូវច្បាប់ ចំពោះក្រុមអ្នកតវ៉ា ប្រសិនបើមិនព្រមបញ្ឈប់ធ្វើការតវ៉ាទេនោះ។
សេចក្តីប្រកាសព័ត៌មានបញ្ជាក់ថា៖ «អ្នកនាំពាក្យក្រសួងយុត្តិធម៌អំពាវនាវដល់បងប្អូនដែលកំពុងធ្វើសកម្មភាពខុសច្បាប់ខាងលើនេះ សូមបញ្ឈប់ជាបន្ទាន់នូវរាល់សកម្មភាពរបស់ខ្លួនមុននឹងអាជ្ញាធរមានសមត្ថកិច្ចចាត់វិធានការតាមច្បាប់»៕
