The Phnom Penh Post Search

Search form




Logo of Phnom Penh Post newspaper Phnom Penh Post - ព្រះ​អង្គ​ម្ចាស់​បញ្ជាក់​ពីការ​ទារ​សំណង $៣៦ ម៉ឺន

ព្រះ​អង្គ​ម្ចាស់​បញ្ជាក់​ពីការ​ទារ​សំណង $៣៦ ម៉ឺន

Content image - Phnom Penh Post
ព្រះ​អង្​គម្ចាស់ រណឫទ្ធិ នៅ​ព្រះ​អង្គ​ដងកើ​កាល​ពី​​ម្សិលមិញ។ ហេង ជីវ័ន

ព្រះ​អង្គ​ម្ចាស់​បញ្ជាក់​ពីការ​ទារ​សំណង $៣៦ ម៉ឺន

ភ្នំពេញៈ ព្រះ​អង្គ​ម្ចាស់ នរោត្តម រណឫទ្ធិ ប្រធាន​គណបក្ស ហ៊្វុន​ស៊ិន​ប៉ិច បាន​បដិសេធ​​ ចំពោះ​ព័ត៌មាន​ដែល​ថា ព្រះអង្គ បាន​​ទាមទារ​ប្រាក់​សំណង ៣៦ ម៉ឺន​​ដុល្លារ​ ប៉ុន្តែ​ថា គឺ​មេធាវី​​របស់​ទ្រង់​​ទៅ​វិញ​ទេ ដែល​ជា​អ្នក​ទាមទារ​សំណង​ពី​ជន​បង្ក​គ្រោះ​ថ្នាក់​ចរាចរណ៍​ដល់​ក្បួន​រថយន្ត​របស់​ទ្រង់ នៅ​ខេត្ត​កំពង់ចាម កាល​ពី​​ខែ​មេសា។

ក្នុង​ពិធី​លា​បំណន់​ព្រះអង្គ​ដងកើ កាល​ពី​ម្សិល​មិញ ដែល​ទ្រង់​ធ្លាប់​បន់ស្រន់​សូម​ឲ្យអ្នក​ម្នាង ផល្លា បានជា​សះស្បើយ​ពីរ​បួស ព្រះ​អង្គ​ម្ចាស់​ នរោត្តម រណឫទ្ធិ បាន​មាន​ព្រះបន្ទូល​ប្រាប់​អ្នក​សារព័ត៌មាន ដោយ​សំដៅ​ឆ្លើយតប​ទៅនឹង​ការ​ចុះ​ផ្សាយ​របស់​សារព័ត៌មាន​កន្លង​មក​ថា ព្រះអង្គ ​មិនបាន​ទាម​ទារ​សំណង ៣៦ ម៉ឺន​ដុល្លារ​នោះ​ទេ​ តែ​នេះ​ជាភារ​កិច្ច​របស់​មេធាវី​ព្រះអង្គ ដែល​​ស្នើឡើង​ តាមរយៈ​ការ​វាយតម្លៃ​លើ​ការ​ខូចខាត​នានា។

ព្រះអង្គថា៖ «ខ្ញុំ​បាន​ដឹង​ថា សារព័ត៌មាន​និយាយ​ថា មេធាវី​សម្តេច ក្រុមព្រះ ទារ​លុយ​គេ ៣៦ ម៉ឺន​ដុល្លារ ការ​ពិត​សម្តេចក្រុម​ព្រះ មិនបាន​ទារ​អី​ទេ តែបើ​យើង​គិតពី​ការ​ព្យាបាល​ជំងឺ​​នៅ​មន្ទីរពេទ្យ​ប្រទេស​ថៃ និង​ការ​ខូច​ខាត ច្រើន ជាង​ហ្នឹង​ឆ្ងាយ​ណាស់​អ៊ីចឹង​ការងារ​នេះ អាស្រ័យ​លើ​មេធាវី និង​តុលាការ​ជា​អ្នក​សម្រេច​តែ​ប៉ុណ្ណោះ»។

បើតាម​ព្រះ​អង្គ​ម្ចាស់ អ្នក​ម្នាង ផល្លា នាពេល​នេះគឺ​បាន​ធូរស្បើយ​របួស​ច្រើន​ហើយ តែ​នៅ​បន្ត​ការថែទាំ​នៅ​ឡើយ។

ក្នុង​សំណុំ​រឿងនេះ ជន​សង្ស័យ​ឈ្មោះ ឈឿន ស៊ី ជា​ព្រូ​រថយន្ត​ដឹក​ដី ដែល​បាន​បុក​ទៅលើ​ក្បួន​ព្រះទីនាំង​ របស់​ព្រះ​អង្គ​ម្ចាស់​ និង​បាន​បង្ក​ឲ្យ​របួស​អ្នកមា្នង អ៊ុក ផល្លា និង​កង​អង្គរក្ស មាន​របួសធ្ងន់​ស្រាល​រហូត​ដល់ ៨ នាក់។

ឈឿន ស៊ី ត្រូវ​បានសា​លាដំបូង​ខេត្ត​កំពង់ចាម បើក​សវនាការ​កាត់​ក្តី​កាល​ពី​ថ្ងៃ​អង្គារ ទី ២២ ខែ​ កញ្ញា និង​គ្រោង​ប្រកាស​សាលក្រម​ នៅ​ថ្ងៃទី ២០ ខែ​តុលា​ ខាង​មុខ​។

បើតាម​លោក មាន ព្រហ្ម​មុនី អ្នកស៊ើប​អង្កេត​សមាគម​សិទ្ធិ​មនុស្ស​អាដ​ហុក​ខេត្ត​កំពង់ចាម ​ដែល​ធ្លាប់​ត្រូវបាន​ក្រុម​គ្រួសារ​ជន​សង្ស័យ ពឹង​សុំ​សេវា​មេធាវី​ការពារ​ធ្លាប់​បាន​ឲ្យ​ដឹងថា លោក ឈឿន ស៊ីមិន​គួរ​ត្រូវបាន​ចោទ​ប្រកាន់​ឡើយ ព្រោះ​មិន​មែន​ជា​អ្នក​បើកបរ ខណៈ​អ្នក​បើកបរ​នា​គ្រា​នោះ បាន​រត់​គេចខ្លួន​បាត់ ក្រោយ​ពី​បង្ក​ហេតុ៕

អត្ថបទគួរចាប់អារម្មណ៍