ភ្នំពេញៈ ព្រះសង្ឃប្រមាណ១០០អង្គ កាលពីម្សិលមិញបាននិមន្តប្រោះព្រំដើម្បីរម្ងាប់ឧបទ្រពចង្រៃនៅ តាមដងផ្លូវចាប់តាំងពីវង្វង់មូលវិមានឯករាជ្យ រហូតដល់ស្ពានអាកាសក្បាលថ្នល់ តាមបណ្ដោយមហាវិថីព្រះនរោត្តម ខណៈតុលាការបញ្ជូននិស្សិតពេទ្យស្រីដែលបើករថយន្តបុករះទៅលើ ម៉ូតូនិងកង់ បណ្ដាលឲ្យស្លាប់កុមារ៣នាក់នឹងកន្លែងនិងរបួសមនុស្ស៨នាក់ទៀត ធ្ងន់ធ្ងរកាលពីថ្ងៃសុក្រ ទៅឃុំនៅពន្ធនាគារព្រៃស កាលពីល្ងាចមិញ។
ពិធីសូត្រធម៌ស្វាធ្យាយជយន្តោ ដើម្បីប្រោះព្រំបណ្តេញឧបទ្រពចង្រៃនេះ គឺដោយសារតែគ្រោះថ្នាក់ចរាចរណ៍ដ៏រន្ធត់ដែលបង្កដោយនិស្សិត ពេទ្យស្រីកាលពីថ្ងៃទី១ ខែមីនា នៅលើដងមហាវិថីមួយនេះ ហើយព្រះសង្ឃទាំង១០០អង្គ នៅវត្តឧណ្ណាលោម ត្រូវខាងបណ្តាញសង្គមហ្វេសប៊ុក ក្រុមព័ត៌មានជាតិដោយសេរី ថ្មីៗ និងប្រតិកម្មរហ័សនិមន្តមកប្រោះព្រំកម្ចាត់ឧបទ្រពចង្រៃ។ នេះបើតាមលោកតាអាចារ្យបានប្រាប់ឲ្យដឹងកាលពីថ្ងៃម្សិលមិញ។
ជាមួយនេះដែរ ក្រុមគ្រួសារនៃសពកុមាររងគ្រោះបាននាំគ្នាមករៀបចំពិធីបង្សុកូល ឧទ្ទិសកុសលឲ្យកូនៗ នៅកន្លែងកើតហេតុមុខក្រសួងមហាផ្ទៃ ហើយសមត្ថកិច្ចតុលាការសម្រេចចោទប្រកាន់និង បញ្ជូននិសិ្សតវ័យ២៣ឆ្នាំ ដែលបង្កហេតុម្នាក់នេះទៅឃុំខ្លួននៅពន្ធនាគារព្រៃស បន្ទាប់បានបញ្ចប់ការសាកសួរ។
អ្នកស្រី ឈុន ចន្ថា អាយុ៤៥ឆ្នាំ ជាម្ដាយសពកុមារា ស្រ៊ីម ប៊ុនហុង អាយុ៨ឆ្នាំដែលស្លាប់ក្នុងគ្រោះថ្នាក់ចរាចរណ៍នេះបានប្រាប់ ភ្នំពេញប៉ុស្តិ៍ពីម្សិលមិញថា គាត់នឹងមិនអត់ឱនឲ្យនិសិ្សតស្រីរូបនោះឡើយ បើទោះជាឪពុកម្ដាយរបស់នាងមកចូលបុណ្យសពកូនប្រុសគាត់ចំនួន២០០ ដុល្លារ និងបាននិយាយសម្រួលជាមួយគាត់ ដើម្បីជួយឲ្យកូនស្រីគាត់នៅក្រៅប្រព័ន្ធតុលាការក្ដី។
អ្នកស្រីបានថ្លែងថា៖«ខ្ញុំយល់ពីអារម្មណ៍ របស់គាត់ ដែលជាឪពុកម្ដាយ ប៉ុន្តែ ខ្ញុំមិនអាចសម្របសម្រួលបែបនេះបានទេ។ ពួកគាត់សុំឲ្យខ្ញុំកាត់ថ្លៃលើសំណងជំងឺចិត្តជំនួស ដើម្បីបញ្ចប់ការប្ដឹងប្ដល់ឡើងតុលាការ ប៉ុន្តែ ខ្ញុំមិនលក់ជីវិតកូនខ្ញុំទេ»។
អ្នកស្រីឲ្យដឹងថា៖«មកទល់ ពេលនេះ កូនស្រីខ្ញុំម្នាក់ទៀតឈ្មោះ ស្រ៊ីម ចាន់ថូ អាយុ១៧ឆ្នាំ ដែលជិះកង់ឌុបប្អូនប្រុសចេញពីរៀននោះ កំពុងស្ថិតក្នុងសភាពធ្ងន់ធ្ងរនិងកំពុងស្ថិតក្រោមការពិនិត្យពី គ្រូពេទ្យនៅឡើយ បន្ទាប់ពីត្រូវនិសិ្សតរូបនេះបុកឲ្យដួលរបួសក្បាល ធ្ងន់ធ្ងរ»។
ជាមួយគ្នានោះ អ្នកស្រី លាក់ សុគន្ធារិទ្ធ អាយុ៣៥ឆ្នាំ នៅភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដែលត្រូវជាម្ដាយរបស់សពក្មេងស្រីពីរនាក់ម្នាក់ឈ្មោះ រិន រចនា អាយុ៨ឆ្នាំ និងម្នាក់ទៀត ឈ្មោះ រិន បុប្ផា អាយុ១២ឆ្នាំ បានប្រាប់នៅកន្លែងបង្សុកូល មុខក្រសួងមហាផ្ទៃពីម្សិលមិញឲ្យដឹងដែរថា ឪពុកម្ដាយនិសិ្សតបង្កហេតុបានមកចូលបុណ្យសពកូនស្រី គាត់ទាំងពីរចំនួន៥០០ដុល្លារ។ ពួកគេក៏បានសុំឲ្យគ្រួសារគាត់អភ័យទោសនិងអត់ឱនឲ្យកូន ស្រីគេ។
អ្នកស្រីប្រាប់ថា៖«ខ្ញុំបានទាមទារឲ្យគាត់បង់សងជំងឺចិត្ត ចំពោះមរណភាពកូនស្រីទាំងពីររបស់ខ្ញុំក្នុងម្នាក់ៗចំនួនពីរម៉ឺនដុល្លារ»។
លោក រិន រិទ្ធី អាយុ៤៥ឆ្នាំ ជាស្វាមីអ្នកស្រី សុគន្ធារិទ្ធ បានបន្ទរថា គាត់នឹងធ្វើពាក្យប្តឹងនិសិ្សតស្រីរូបនោះនៅថ្ងៃចន្ទនេះ ឬយ៉ាងយូរក្រោយបុណ្យសពប្រាំពីរថ្ងៃកូនស្រីទាំងពីរ ដើម្បីឲ្យតុលាការផ្ដន្ទាទោស និស្សិតស្រីរូបនោះទៅតាមនីតិវិធីច្បាប់។
ប៉ុន្តែបើទោះជា មានការសម្របសម្រួលពីឪពុកម្តាយនិស្សិតស្រីបង្កហេតុក៏ដោយ តែការទាមទារសំណងរបស់គ្រួសារកុមាររងគ្រោះនោះ នៅមិនទាន់មានការឆ្លើយតបយ៉ាងណាដែរទេ។
តាមការឲ្យដឹង ពីសមត្ថកិច្ចប៉ូលិសកាន់សំណុំរឿងថា និស្សិតពេទ្យ គាមពិសិដ្ឋ ណារីតា ជាកូនរបស់លោក គាម ពិសិដ្ឋ អនុប្រធានមន្ទីរពេទ្យខេត្តកណ្តាល ដែលបានមកអះអាងថា កូនគាត់មានបញ្ហាសរសៃប្រសាទនិងធ្វើទុក្ខម្តងម្កាល ប៉ុន្តែ តាមខាងសមត្ថកិច្ចពិនិត្យដូចជាគ្មានបញ្ហាអ្វីទេ។
តាម សមត្ថកិច្ចរំឭកឲ្យដឹងថា និស្សិតពេទ្យឆ្នាំទី៦ ឈ្មោះ គាមពិសិដ្ឋ ណារីតា ភេទស្រី អាយុ ២៣ ឆ្នាំ បានបើកឡាន បុករះម៉ូតូ៩ គ្រឿងនិងកង់៤គ្រឿង បណ្តាលឲ្យកុមារ៣នាក់ស្លាប់ភ្លាម និងរបួសមនុស្ស៨នាក់ផ្សេងទៀត។ គ្រោះថ្នាក់ចរាចរណ៍នៅមុខ ក្រសួងមហាផ្ទៃ កាលពីម៉ោង៥ល្ងាច ថ្ងៃទី១ ខែមីនា ឆ្នាំ២០១៣ បង្កឡើងបន្ទាប់ពីនិស្សិតស្រីម្នាក់នេះបានបើកឡានបុកគេនៅ ភ្លើង ស្តុបខាងត្បូងវិមានឯករាជ្យ ហើយមិនឈប់ដោះស្រាយ ក៏បើករត់រហូតមកបង្កហេតុការណ៍ដ៏រន្ធត់បែបនេះ។ សមត្ថកិច្ចនគរបាលបានឃាត់ខ្លួននាងភ្លាមៗ ជាមួយមិត្តភក្តិ២នាក់ នៅលើរថយន្តបង្កហេតុ ប៉ុន្តែ អ្នកទាំងពីរនោះបានដោះលែងវិញព្រោះពុំពាក់ព័ន្ធ។
កញ្ញា វត្តី និស្សិតសាកលវិទ្យាល័យ បៀលប្រាយនិយាយថា៖ «សម្រាប់ករណីនេះ ខ្ញុំយល់ថា និស្សិតឆ្នាំទី៦ នៃសាលាពេទ្យម្នាក់នោះមិនគ្រាន់តែខ្វះសីលធម៌ក្នុងការរស់នៅទេ ថែមទាំងមិនចេះច្បាប់ចរាចរណ៍ទៀត»។
លោក ប៉ែន ឃុន ប្រធានការិយាល័យចរាចរណ៍ជើងគោករាជធានីភ្នំពេញ ពីម្សិលមិញបានប្រាប់ថា កញ្ញា គាមពិសិដ្ឋ ណារីតា ត្រូវចៅក្រមស៊ើបសួរសាលាដំបូងរាជធានីភ្នំពេញ លោក អ៊ី ថាវរៈ សម្រេចចោទប្រកាន់ពីបទ«បើកបរបង្កឲ្យអ្នកដទៃរងរបួស និងស្លាប់ ដោយចេតនា»តាមមាត្រា៨០ និង ៨២ នៃច្បាប់ចរាចរណ៍ផ្លូវគោក។
លោកបានប្រាប់បន្តទៀតថា៖«មកទល់ពេលនេះយើងបានបញ្ជូននាងទៅឃុំនៅពន្ធនាគារព្រៃសជាបណ្ដោះអាសន្នរួចហើយ តាមដីកាបង្គាប់ឲ្យឃុំខ្លួនរបស់សាលាដំបូងរាជធានីភ្នំពេញ»៕
