ភ្នំពេញៈ ក្រោយមានការប្តូរឈ្មោះ គណបក្ស កែមឡី បានប្តូរឈ្មោះទៅជាគណបក្សខ្មែរតែមួយ និងប្តូរស្លាកសញ្ញាពីរូបលោក កែម ឡី ទៅជារូបមនុស្ស ៣ នាក់ឈរកាន់ដៃគ្នាជំនួសវិញ ដើម្បីឲ្យស្របតាមច្បាប់ស្តីពីគណបក្សនយោបាយដ៏ចម្រូងចម្រាស អ្នកស្រី ប៊ូ រចនា ភរិយារបស់លោក បានស្វាគមន៍ចំពោះការប្តូរនេះ ដោយសារជាសិទ្ធិរបស់បុគ្គលម្នាក់ៗ។
ដោយមិនធ្វើអធិប្បាយច្រើន លោកស្រីគ្រាន់តែឆ្លើយប្រាប់ ភ្នំពេញ ប៉ុស្តិ៍យ៉ាងខ្លីថា «រឿងបង្កើតគណបក្សគឺជាសិទ្ធិរបស់មនុស្សម្នាក់ៗ សំខាន់កុំឲ្យតែយកឈ្មោះស្វាមីខ្ញុំទៅដាក់គឺបានហើយ»។
ការប្តូរឈ្មោះនេះគឺដើម្បីធ្វើឱ្យគណបក្សមួយនេះស្របទៅតាមការធ្វើវិសោធនកម្មច្បាប់ដែលបានអនុម័តកាលពីឆ្នាំមុនដែលពីដំបូងត្រូវបានគេបង្កើតឡើងដើម្បីកំណត់គោលដៅទៅលើមេដឹកនាំគណបក្សប្រឆាំងលោក សម រង្ស៊ី ដែលហាមឃាត់ការប្រើឈ្មោះបុគ្គលដាក់ឈ្មោះគណបក្សនយោបាយ ឬប្រើប្រាស់រូបរបស់បុគ្គលនៅក្នុងស្លាកសញ្ញាគណបក្ស។
អ្នកនាំពាក្យគណបក្សលោក គួច លី បានថ្លែងថាលោកបានដាក់ពាក្យស្នើសុំចុះបញ្ជីកាលពីព្រឹកថ្ងៃសុក្រ ទី ២៣ មីនាឆ្នាំ ២០១៨ ដើម្បីប្តូរឈ្មោះ និងស្លាកសញ្ញាគណបក្ស។
លោក កែម ឡី ត្រូវបានបាញ់សម្លាប់ កាលពីខែ កក្កដា ឆ្នាំ ២០១៦ ជាអ្វីដែលគេជឿថា ជាឃាតកម្មរឿងនយោបាយ។
លោក លី ថ្លែងថា៖ «ស្លាកសញ្ញាថ្មីគឺជារូបមនុស្ស ៣ នាក់ឈរកាន់ដៃគ្នា។ វាគឺជានិមិត្តរូបនៃការរួបរួមគ្នារវាងខ្មែរ និងខ្មែរ»។
លោកលើកឡើងថា៖ «នេះមានន័យថា មិនមានការរើសអើងប្រឆាំងខ្មែរលើខ្មែរក្រោម ឬខ្មែរកណ្តាលទេ»។
វិសោធនកម្មច្បាប់ស្តីពីគណបក្សនយោបាយនេះក៏បានធ្វើឲ្យគណបក្សសង្គ្រោះជាតិដែលត្រូវបានរំលាយប្តូរស្លាកសញ្ញារបស់ខ្លួនផងដែរ ហើយគណបក្ស សម រង្ស៊ី បានប្តូរទៅជាគណបក្សភ្លើងទៀនចំណែកឯ គណបក្សហ៊្វុនស៊ិនប៉ិចប្តូររូបស្លាកសញ្ញារបស់ខ្លួនដែលពីមុនគឺស្លាកសញ្ញាមានរូបមេដឹកនាំគណបក្ស គឺព្រះអង្គម្ចាស់នរោត្តម រណឫទ្ធិ។ ប៉ុន្តែទោះយ៉ាងណាក៏ដោយ ច្បាប់នេះហាក់ដូចជាអនុវត្តមិនទាន់បានជាក់លាក់នោះទេ៕ NS