The Phnom Penh Post Search

Search form




Logo of Phnom Penh Post newspaper Phnom Penh Post - ភរិយាជន​គំរាម​សម្លាប់​លោក​ សុខ ​ទូច បាន​រិះគន់​សាលក្រម​តុលាការ

ភរិយាជន​គំរាម​សម្លាប់​លោក​ សុខ ​ទូច បាន​រិះគន់​សាលក្រម​តុលាការ

Content image - Phnom Penh Post
ផង់ សីហា នៅ​សាលា​ដំបូង​ភ្នំពេញ​​កន្លង​មក។ ផា លីណា

ភរិយាជន​គំរាម​សម្លាប់​លោក​ សុខ ​ទូច បាន​រិះគន់​សាលក្រម​តុលាការ

ភ្នំពេញៈ ភរិយា​យុវជន​ដែល​គំរាម​សម្លាប់​លោក សុខ ទូច ប្រធាន​ក្រុម​ស្រាវជ្រាវ​ព្រំដែន​កម្ពុជា​ចាត់​ទុក​សាលក្រម​តុលាការ​ផ្តន្ទាទោស​ស្វាមី​របស់​ខ្លួន​ចំនួន ១៨ ខែ​ថា​ជា​រឿង​អយុត្តិធម៌ និង​បាន​ស្នើឱ្យ​តុលាការ​ទម្លាក់​រាល់​ការ​ចោទប្រកាន់ និង​លើក​លែង​ការ​ផាក​ពិន័យ​បើ​ទោះ​ជា​សាលក្រម​ប្រកាស​ថា​នឹង​ត្រូវ​ដោះលែង​ឱ្យ​នៅ​ក្រៅ​ឃុំ​នៅ​ដើម​ខែ​មីនា​ក្តី។

ប្រធាន​ក្រុម​ប្រឹក្សា​ជំនុំជម្រះ​សាលា​ដំបូង​រាជធានី​កាលពី​ល្ងាច​ថ្ងៃ​អង្គារ​បាន​ប្រកាស​សាលក្រម​ផ្តន្ទាទោស​យុវជន​ជា​អ្នក​ធ្វើការ​សំណង់​នៅ​ប្រទេស​ថៃ​លោក ផង់ សីហា អាយុ ២៧ ឆ្នាំ​ដាក់​ពន្ធនាគា​រយៈពេល​ ១៨ ​ខែ​តែ​អនុវត្ត​ទោស​ត្រឹម ៦ ខែ​ប៉ុណ្ណោះ និង​ពិន័យ​ជា​ប្រាក់​មួយ​លាន​រៀល​ពី​បទ​គំរាម​កំហែង​សម្លាប់​តាម​មាត្រា ២៣៣ នៃ​ក្រម​ព្រហ្មទណ្ឌ។

យោង​តាម​សាលក្រម​លោក ផង់ សីហា នឹង​ត្រូវ​ដោះលែង​ឲ្យ​មាន​សេរីភាព​វិញ​នៅ​ថ្ងៃ​ទី ៧ ខែ​មីនា ឆ្នាំ ២០១៦ ខាង​មុខ​នេះ។

អ្នកស្រី ម៉ៅ សុភ័ក្ត្រ ភរិយា​លោក ផង់ សីហា បាន​ប្រាប់​ភ្នំពេញ​ប៉ុស្តិ៍​ថា​ការ​សម្រេច​របស់​ចៅក្រម​ហាក់​បី​ដូចជា​អយុត្តិធម៌​សម្រាប់​ស្វាមី​របស់​នាង​នៅពេល​ដែល​អ្នក​ផ្សេង​ទៀត​ដែល​គំរាម​ប្រមាថ​អាយុ​ជីវិត​លោក​នាយករដ្ឋមន្ត្រី ហ៊ុន សែន និង លោក​ឧបនាយក​រដ្ឋមន្ត្រី ស ខេង ដូចគ្នា ប៉ុន្តែ​តុលាការ​ពុំ​បាន​ចោទ​ប្រកាន់ និង​ផ្តន្ទាទោស​នោះ​។

អ្នកស្រី​បាន​អំពាវនាវ​ដល់​ចៅក្រម​ឱ្យ​ទម្លាក់​ការ​ចោទ​ប្រកាន់​ទាំងអស់​ដើម្បី​ឱ្យ​ជន​ជាប់​ចោទ​មាន​សេរីភាព​រួច​ផុត​ការ​ឃ្លាំមើល​របស់​តុលាការ​ជាពិសេស​លើក​លែង​ការ​ផាក​ពិន័យ​។

អ្នកស្រី​ថា៖ «ខ្ញុំ​យល់​ថា​តុលាការ​កាត់​ក្តី​អយុត្តិធម៌​ចុះ​អ្នក​ដទៃ​​ដែល​ធ្វើ​ដូច​ប្តី​ខ្ញុំ​ដែរ​មិន​បាន​ចាប់​ដាក់​ពន្ធនាគារ​ផង​ចម្លែក​តែ​ប្តី​ខ្ញុំ​ចាប់​ដាក់​ពន្ធនាគារ ៦ ខែ ហើយ និង​ពិន័យ​ជា​ប្រាក់ ១ លាន​​រៀល​ទៀត»។ អ្នកស្រី​បន្ថែម​ថា​ខណៈ​ដែល​ប្តី​របស់​អ្នកស្រី​ជាប់​ពន្ធនាគារ​ធ្វើឲ្យ​គ្រួសារ​មាន​ជីវភាព​ដុនដាប​ថែម​ទៀត​ខ្វះ​មុខ​ខ្វះ​ក្រោយ។

អ្នកស្រី​បាន​រៀបរាប់​ទាំង​កំពុង​បំបៅ​កូន​បាន​ជាង ២ ខែ ថា៖ «​គ្រួសារ​នាង​ខ្ញុំ​ក្រីក្រ​តាំង​ពី​គេ​ចាប់​ប្តី​ខ្ញុំ​ទៅ​ថែម​ទាំង​ពពោះ​ហើយ​ទើប​ឆ្លង​ទន្លេ​បាន​ជាង ២ ខែ​ពុំ​មាន​ថវិកា​ដើម្បី​បង់​ការ​ផាក​ពិន័យ​ចូល​រដ្ឋ​នោះ​ទេ​អ៊ីចឹង​ហើយ​សូម​តុលាការ​លើកលែង​ការ​ផាក​ពិន័យ​ផង»។

យុវជន ផង់ សីហា មាន​ស្រុក​កំណើត​នៅ​ឃុំ​ស្តៅកោង ស្រុក​បាភ្នំ ខេត្ត​ព្រៃវែង​តែ​ជា​កម្មករ​សំណង់​នៅ​ប្រទេស​ថៃ។ លោក​ត្រូវ​បាន​នគរបាល​សន្តិសុខ​ផ្ទៃ​ក្នុង​ក្រសួង​មហាផ្ទៃ​ឃាត់​ខ្លួន​កាលពី​ល្ងាច​ថ្ងៃ​ទី ៥ ខែ​កញ្ញា ឆ្នាំ​ ២០១៥ នៅ​ច្រក​​ព្រំដែន​ប៉ោយប៉ែត ខេត្ត​បន្ទាយមានជ័យ​បន្ទាប់ពី​បុរស​រូប​នេះ​បាន​ឆ្លង​ដែន​ពី​ប្រទេស​ថៃ​ចូល​មក​កម្ពុជា​។ ការ​ចាប់​ខ្លួន​នេះ​ក្រោយពី​លោក​បាន​សរសេរ​នៅក្នុង​គណនី​ហ្វេសប៊ុក​ដោយ​មាន​ភ្ជាប់​នឹង​រូបភាព​កាំភ្លើង និង​រូប​លោក សុខ ទូច ថា ​«ទុក​បាញ់​ក្បាល សុខ ទូច អាបណ្ឌិត​ខួរ​ឆ្កែ​អាបណ្ឌិត​កែ​ប្រវត្តិសាស្ត្រ អាបណ្ឌិត​លក់​ក្បាល​ឱ្យ​យួន​»។

បើ​ទោះ​ជា​បែប​នេះ​ក្តី​លោក សុខ ទូច បាន​សរសេរ​នៅ​លើ​ហ្វេសប៊ុក​របស់​លោក​ថា៖ «​ការ​កាត់​ទោស​ជន​ម្នាក់​ដែល​គំរាម​សម្លាប់​រូប​ខ្ញុំ​គឺជា​នីតិវិធី​របស់​តុលាការ​រូប​ខ្ញុំ​មិន​បាន​ប្តឹង​គាត់​នោះ​ទេ​ទាំង​រដ្ឋ​ប្បវេណី​ និង​ព្រហ្មទណ្ឌ​ប៉ុន្តែ​ក្រោយ​ការ​កាត់​ទោស​ប្រសិន​មាន​ការ​ស្នើសុំ​ពី​ក្រុម​គ្រួសារ​ខ្ញុំ​នឹង​ពិនិត្យ​លទ្ធភាព​»។

ស្រដៀង​ករណី​នេះ​ដែរ​ជា​ការ​កត់សម្គាល់​នៅលើ​បណ្តាញ​សង្គម​ហ្វេសប៊ុក​មាន​បុរស​ម្នាក់​បាន​គំរាម​សម្លាប់​ប្រធាន​ស្តីទី​គណបក្ស​សង្គ្រោះ​ជាតិ​លោក​ កឹម សុខា ប៉ុន្តែ​មក​ទល់​ពេល​នះ​មិន​ទាន់​មាន​ការ​​នាំ​ខ្លួន​មក​កាន់​តុលាការ​ដើម្បី​សាកសួរ​ឡើយ​។

ប្រធាន​បចេ្ចកទេស​ស៊ើប​អង្កេត​នៃ​អង្គការ​សិទ្ធិ​មនុស្ស​លីកាដូ​លោក អំ សំអាត បាន​ថ្លែង​ថា​ការ​សម្រេច​របស់​តុលាការ​ហាក់​បី​ដូច​មិន​មាន​យុត្តិធម៌​ខណៈ​ករណី​ប្រហាក់​ប្រហែល​គ្នា​នេះ​ពុំ​ឃើញ​តុលាការ​នាំ​ខ្លួន​ជន​ទាំង​នោះ​មក​ផ្តន្ទាទោស​។

លោក​ថា៖ «យើង​មើល​ទៅ​លើ​ករណី​ផ្សេងៗ​ទៀត​ដូចជា​ការ​​គំរាម​សម្តេច​នាយក​រដ្ឋមន្ត្រី លោក ស ខេង និង​លោក កឹម សុខា ជាដើម​ពួកគេ​ទាំងអស់​នោះ​ឃើញ​ថា​អ្នក​ខ្លះ​មិន​ត្រូវ​បាន​ចាប់ ឬ​មិន​រក​ខ្លះ​ទៀត​ឃើញ​ហើយ​ប៉ុន្តែ​ជាប់​ឃុំ​រយៈពេល​ខ្លី​ហើយ​ត្រូវ​បាន​ដោះលែង​វិញ»​។

លោក​ថា​ដោយ​ឡែក​ឃើញ​មាន​តែ​ករណី​នេះ​ទេ​ដែល​តុលាការ​ផ្តន្ទាទោស​ដែល​​នេះ​គឺជា​រឿង​អយុត្តិធម៌​សម្រាប់​ក្រុម​គ្រួសារ​ពួកគេ៕

អត្ថបទគួរចាប់អារម្មណ៍