ភ្នំពេញៈ ព្រះរាជអាជ្ញានៃមហាអយ្យការអមសាលាឧទ្ធរណ៍បានចេញដីកាកោះហៅ អ្នកស្រី ប៊ូ រចនា ភរិយាលោកបណ្ឌិត កែម ឡី ដើម្បីឲ្យចូលរួមក្នុងអង្គសវនាការជំនុំជម្រះជនជាប់ចោទ ជួប សម្លាប់ ដែលនឹងធ្វើឡើងនៅថ្ងៃទី ៣ ខែមេសាខាងមុខ ប៉ុន្តែអ្នកស្រីថាអ្នកស្រីមិនធ្លាប់បានប្ដឹងពីករណីនេះម្ដងណាទេ ខណៈមិនរំពឹងថាមានយុត្តិធម៌។
ក្នុងដីកាកោះចេញដោយព្រះរាជអាជ្ញា ហ៊ឹង ប៊ុនជា ចុះថ្ងៃទី ១៤ ខែមីនាឆ្នាំ ២០១៨ បានបង្គាប់ឲ្យអ្នកស្រី ប៊ូ រចនា ដែលដីកានេះដាក់ថា ជាដើមបណ្ដឹងរដ្ឋប្បវេណីឲ្យចូលទៅសាលាឧទ្ធរណ៍នៅថ្ងៃទី ៣ មេសា ឆ្នាំ ២០១៨ វេលាម៉ោង ២ រសៀលនៅបន្ទប់ទី ២ ជាកំណត់។
ដីកានោះក៏បានសរសេរដែរថា បុគ្គលពាក់ព័ន្ធត្រូវបានកោះហៅក្នុងឋានៈជាជនរងគ្រោះ ហើយក្នុងវង់ក្រចកបានសរសេរថា «ការមិនចូលបង្ហាញខ្លួននៅពេលសវនាការ ការមិនព្រមឆ្លើយឲ្យព័ត៌មានក្នុងឋានៈសាក្សី ឬការឆ្លើយឲ្យព័ត៌មានក្លែងក្លាយត្រូវផ្តន្ទាទោសតាមច្បាប់»។
លោក ទូច ថារិទ្ធិ អ្នកនាំពាក្យសាលាឧទ្ធរណ៍បានបញ្ជាក់ថា ដីកានោះពិតជាកោះហៅដោយលោកព្រះរាជអាជ្ញា ហ៊ឹង ប៊ុនជា ពិតប្រាកដមែន។ លោកបន្តថាសវនាការនឹងមានក្រុមប្រឹក្សា ៣ រូបរួមមានលោក ចាយ ច័ន្ទតារាវណ្ណ ជាប្រធានក្រុមប្រឹក្សា លោក ស៊ិន វិសាល និងលោកស្រី ទិត្យសុទ្ធី បូរ៉ាលក្ខណ៍ ជាចៅក្រមប្រឹក្សា។
អ្នកស្រី ប៊ូ រចនា ដែលបច្ចុប្បន្នកំពុងរស់នៅប្រទេសអូស្ត្រាលីក្នុងនាមជនភៀសខ្លួនថ្លែងថា អ្នកស្រីបានឃើញដីកាកោះនេះហើយ តែអ្នកស្រីនិយាយថាមិនធ្លាប់បានដាក់ពាក្យបណ្ដឹង ឬក៏មានគោលបំណងដាក់ពាក្យបណ្ដឹងដែរ។
អ្នកស្រីបានសរសេរសារនៅលើហ្វេសប៊ុករបស់អ្នកស្រីថា៖ «នាងខ្ញុំសុំបញ្ជាក់ថា តាំងពីស្វាមីនាងខ្ញុំត្រូវបានឃាតករបាញ់សម្លាប់រហូតមកដល់ពេលនេះ មានរយៈពេលជិត ២ ឆ្នាំហើយកុំថាឡើយចង់ទៅដាក់ពាក្យបណ្តឹង សូម្បីតែគិតថាទៅប្តឹងក៏មិនដែលគិតផងណា ពីព្រោះនាងខ្ញុំដឹងច្បាស់ហើយថាតុលាការនៅទីក្រុងភ្នំពេញគ្មានសមត្ថភាពចាប់ឃាតករពិត និងរកយុត្តិធម៌ឲ្យខ្ញុំបានឡើយ»។
លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ទាំងកណ្ដាលថ្ងៃ នៅក្នុងហាងស្តារម៉ាតកាល់តិច ស្តុបបូកគោ កាលពីថ្ងៃទី ១០ ខែកក្កដា ឆ្នាំ ២០១៦ ។ មានមនុស្សតែម្នាក់គត់ដែលអះអាងថា ខ្លួនឈ្មោះ ជួប សម្លាប់ ត្រូវបានចាប់ខ្លួនភ្លាមៗ និងកាត់ទោសដាក់ពន្ធនាគារមួយជីវិត។
ប៉ុន្តែមជ្ឈដ្ឋានជាច្រើនយល់ថា មានជនពាក់ព័ន្ធ ឬអ្នកនៅពីក្រោយនៃឃាតកម្មមួយនេះ។
មន្ដ្រីផ្នែកស៊ើបអង្កេតនៅសមាគមអាដហុកលោក សឹង សែងករុណា យល់ថា យុត្តិធម៌សម្រាប់លោក កែម ឡី មិនទាន់ត្រូវបានរកឃើញឡើយ។ លោកថ្លែងថា៖ «ហេតុផលនៃការសម្លាប់ដែលបានសារភាពមិនមានអ្វីដែលស៊ីចង្វាក់សោះ។ សាធារណជនមានមន្ទិលសង្ស័យច្រើនណាស់ថា តើរឿងនេះពិតជា ជួប សម្លាប់ អ្នកសម្លាប់មែនឬ? តើមានអ្នកណាខ្លះពាក់ព័ន្ធ និងសមគំនិតក្នុងករណីនេះ?»។
លោកថ្លែងបន្តថា៖ «បើដរាបណាធ្វើឡើងដើម្បីគម្រប់តែនីតិវិធីច្បាប់ វាមិនបានរកយុត្តិធម៌សម្រាប់ការស្លាប់លោកបណ្ឌិត កែម ឡី និងក្រុមគ្រួសារទេ»។
លោកមានចម្ងល់ថា បើជនជាប់ចោទបានសារភាពថា ខ្លួនបានសម្លាប់ពិតប្រាកដមែន ហេតុអ្វីបានជាត្រូវប្តឹងទៅតុលាការជាន់ខ្ពស់បន្តទៀត៕