ភ្នំពេញៈ អ្នកស្រី ឡុង គឹមហ៊ាងនិងក្រុមសាច់ញាតិប្រហែលជា ១០ នាក់បានបន្តប្រមូលផ្ដុំគ្នាកាលពីម្សិលមិញនៅមុខស្ថានទូតរុស្ស៊ីជាលើកទី ៥ ដើម្បីសុំអន្តរាគមន៍ឲ្យមានការដោះលែងលោក រ៉ាត់ រ័ត្នមុនី ប្រធានសហព័ន្ធសហជីពកម្មករសំណង់កម្ពុជាដែលកំពុងជាប់ឃុំពាក់ព័ន្ធការផលិតភាពយន្តខ្លីរឿង «ម្ដាយខ្ញុំលក់ខ្ញុំ»។
មេធាវីរបស់លោក រ៉ាត់ រ័ត្នមុនី កាលពីថ្ងៃទី ៥ ខែកុម្ភៈ បានដាក់ពាក្យបណ្តឹងសារទុក្ខទៅតុលាការកំពូលរួចហើយ បន្ទាប់ពីសាលាឧទ្ធរណ៍បានប្រកាសសាលដីកាសម្រេចមិនអនុញ្ញាតឲ្យជនត្រូវចោទលោក រ៉ាត់ រ័ត្នមុនី នៅក្រៅឃុំ ដោយតម្កល់សាលក្រមរបស់សាលាដំបូងរាជធានីភ្នំពេញឲ្យនៅដដែល កាលពីថ្ងៃទី ៣១ ខែមករា ក្រោយពីជំនុំជម្រះកាលពីថ្ងៃទី ៣០ ខែមករា។
អ្នកស្រី ឡុង គឹមហ៊ាង ជាភរិយាលោក រ័ត្នមុនី បានថ្លែងថា ក្នុងអំឡុងពេលជាប់ឃុំខ្លួននៅក្នុងពន្ធនាគារព្រៃសនេះ ស្ថានភាពសុខភាពលោក រ៉ាត់ រ័ត្នមុនី កំពុងកើតរមាស់លើខ្លួន សាច់ឈាមស្លេកស្លាំង ស្គម ដេកមិនលក់ ព្រោះកន្លែងដែលគេងនោះមានទំហំតូចចង្អៀត។
អ្នកស្រីបញ្ជាក់ថា៖ «ខ្ញុំពិតជាបារម្ភខ្លាំងណាស់ពីសុខភាពគាត់ ខ្លាចឆ្លងជំងឺផ្សេងៗ ព្រោះគាត់មិនដែលមានជំងឺអ្វីទេ»។
អ្នកស្រីបញ្ជាក់ថា៖ «ខ្ញុំមកតាមដានញត្តិរបស់ខ្ញុំដែលបានផ្ញើតាមអ៊ីមែល ពីព្រោះលើកមុនគាត់ក៏អត់បានចេញមកទទួលញត្តិពីពួកយើងដែរ ហើយយើងបានដឹងថា ខាងស្ថានីយទូរទស្សន៍រុស្ស៊ីក៏បានផ្ញើលិខិតសុំឲ្យអន្តរាគមន៍ពីស្ថានទូតផងដែរ យើងចង់ដឹងថា គាត់បានធ្វើអ្វីខ្លះហើយ ដើម្បីជួយប្តីរបស់ខ្ញុំ?»។
លោក សំ ទិត្យសីហា មេធាវីការពារក្តីលោក រ៉ាត់ រ័ត្នមុនី កាលពីម្សិលមិញមិនទាន់អាចទាក់ទងសុំការបញ្ជាក់បានទេ ប៉ុន្ដែលោកបានប្រាប់ភ្នំពេញប៉ុសិ៍្តកាលពីថ្ងៃទី ៥ កុម្ភៈថា លោកបានយកពាក្យបណ្ដឹងជំទាស់ទៅដាក់នៅតុលាការកំពូលរួចហើយ ដោយកំពុងរង់ចាំការឆ្លើយតបពីតុលាការ។
លោកបន្តថា ការប្ដឹងជំទាស់នេះ គឺជាការសម្រេចចិត្តរបស់លោក រ៉ាត់ រ័ត្នមុនី ដែលមិនពេញចិត្តនឹងសេចក្ដីសម្រេចរបស់សាលាឧទ្ធរណ៍។
លោក ទិត្យសីហា បញ្ជាក់ថា៖ «បទល្មើសគាត់ហ្នឹងវាមិនមានព្យសនកម្មធ្ងន់ធ្ងរអ្វីដល់សណ្ដាប់ធ្នាប់ខ្លាំងទេ ហើយក៏មិនមានការគំរាមកំហែងដល់ជនណាម្នាក់ដែរ។ អ្វីដែលសំខាន់មួយទៀតនោះ គឺរឿងនីតិវិធីរបស់តុលាការនោះ គឺមិនចាំបាច់ទៅឃុំខ្លួនជនត្រូវចោទនោះទេ ដោយទុកគាត់ឲ្យនៅក្រៅឃុំ ហើយបន្តការស៊ើបអង្កេតតាមក្រោយទៀតទៅ»។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ កាលពីម្សិលមិញមិនទាន់អាចទាក់ទងសុំការបញ្ជាក់បានទេ។ ចំណែកភាគីតំណាងស្ថានទូតរុស្ស៊ីប្រចាំនៅប្រទេសកម្ពុជា ក៏មិនទាន់បានឆ្លើយតបតាមសារអេឡិចត្រូនិក ហើយក៏មិនបានចេញមកជួបក្រុមអ្នកតវ៉ានៅខាងមុខស្ថានទូតខ្លួនដែរ។
លោក ស៊ឹង សែនករុណា មន្ត្រីផ្នែកស៊ើបអង្កេតនៃសមាគមអាដហុក (ADHOC) បានអះអាងថា ចំពោះអ្នកទោសមនសិការដែលត្រូវបានគេចោទប្រកាន់ពីបទផ្សេងៗគ្នានោះ គឺគេសង្កេតឃើញតែងតែពន្យារពេលស៊ើបអង្កេត ព្រមទាំងភ័ស្ដុតាងនៅមានមតិសង្ស័យជាច្រើនដែលមិនអាចដាក់បន្ទុកដោយច្បាស់លាស់។
លោកបញ្ជាក់ថា៖ «យើងឃើញថា ឃុំមនុស្សហ្នឹង ៤ ឬ ៥ ឆ្នាំ ហើយរកទោសកំហុសមិនឃើញ ក៏ដោះលែងវិញ ធ្វើបែបនេះ វារំលោភលើសិទ្ធិពលរដ្ឋខ្លាំងណាស់»។
គួររំឭកថា លោក រ័ត្នមុនី ត្រូវបានអាជ្ញាធរថៃចាប់ខ្លួនកាលពីថ្ងៃទី ៧ ខែធ្នូ ឆ្នាំ ២០១៨ តាមការស្នើសុំពីអាជ្ញាធរកម្ពុជា ហើយបានបញ្ជូនមកកម្ពុជាវិញ ពាក់ព័ន្ធករណីផលិតភាពយន្តឯកសារដែលនិយាយអំពីការលក់ព្រហ្មចារី។
វីដេអូឯកសារនោះជាការប្រឌិតធ្វើឲ្យប៉ះពាល់ប្រពៃណីកម្ពុជា៕