កំពង់ស្ពឺៈ អ្នកស្រី នួន ច័ន្ទមករា ភាគីដែលមានជម្លោះដីធ្លីជាមួយប្រជាពលរដ្ឋអស់រយៈពេល ៥ ឆ្នាំមកហើយ បានសន្យានៅចំពោះមុខអាជ្ញាធរខេត្តកំពង់ស្ពឺ និងជំនួយការលោកនាយករដ្ឋមន្ត្រី ហ៊ុន សែន ថានឹងប្រគល់ដីទៅឱ្យប្រជាពលរដ្ឋដែលជាអ្នកទិញដីចំនួនជាង ៣០ គ្រួសារវិញ។ នេះបើតាមលោក វ៉ី សំណាង អភិបាលខេត្តកំពង់ស្ពឺ។
លោក វ៉ី សំណាង បានប្រាប់ភ្នំពេញប៉ុស្ដិ៍នៅថ្ងៃទី ២៥ ខែឧសភា ថា អ្នកស្រី ច័ន្ទមករា បានប្រកាសនៅចំពោះមុខមន្ត្រីជាច្រើនរូបនៅក្នុងសន្និសីទកាសែតមួយនៅថ្ងៃទី ២៥ ខែឧសភា ថា អ្នកស្រីនឹងរង់ចាំដោះស្រាយប្រគល់ដីជូនក្រុមពលរដ្ឋដែលបានទិញដីរបស់អ្នកស្រីទំហំ ១ ១០០ ហិកតា កាលពីឆ្នាំ ២០១៦ ស្ថិតនៅក្នុងភូមិទឹកល្អក់ ឃុំដំបូករូង ស្រុកភ្នំស្រួច។
លោកថា៖ «គាត់បានសន្យានៅនឹងមុខក្រុមការងារដែលមានឯកឧត្តម ដួង តារា ជំនួយការផ្ទាល់របស់សម្ដេចតេជោ ហើយខ្ញុំនៅហ្នឹងរួមទាំងក្រុមការងារជាច្រើនទៀតគឺគាត់ប្រកាសជាឱឡារិកថា គាត់នឹងឈរដោះស្រាយវិវាទជាមួយបងប្អូនដែលបានទិញដីតាមរយៈគាត់ហ្នឹង ជាលុយក៏បាន ជាដីវិញក៏បាន។ អ្នកត្រូវការដី គាត់ឱ្យដី អ្នកត្រូវការលុយ គាត់ឱ្យលុយហើយគាត់មិនរត់ទៅណាទេ គឺឈរដោះស្រាយឱ្យ»។
កាលពីថ្ងៃទី ២១ ខែឧសភា លោក ដួង តារា ជំនួយការផ្ទាល់លោក ហ៊ុន សែន បានបង្ហោះនៅលើទំព័រហ្វេសប៊ុកថា អ្នកស្រី នួន ច័ន្ទមករា ដែលមានជម្លោះដីធ្លីជាង ១ ១០០ ហិកតា អស់រយៈពេល ៥ ឆ្នាំនៅតុលាការជាមួយប្ដីដែលមិនបានចុះលិខិតអាពាហ៍ពិពាហ៍ឈ្មោះ Rainer Maria Wollny ជាជនជាតិអាល្លឺម៉ង់គឺភាគីទាំង ២ បានសម្រេចបញ្ចប់រឿងនៅតុលាការ ដើម្បីទទួលដំណោះស្រាយឈ្នះៗរបស់លោក ហ៊ុន សែន ដោយឯកភាពគ្នាទទួលយកដីនេះចំនួន ៥០ ភាគរយម្នាក់។
ប៉ុន្តែកាលពីថ្ងៃទី ២២ ខែឧសភា ពលរដ្ឋចំនួន ៣៨ គ្រួសារ ដែលអះអាងថាបានទិញដីជាង ៧៧៩ ហិកតា ក្នុងតម្លៃជាង ១ លាន ១ សែនដុល្លារ នៅភូមិទឹកល្អក់ ពីអ្នកស្រី នួន ច័ន្ទមករា បានដាក់ញត្តិសុំកិច្ចអន្តរាគមន៍ទៅលោក ហ៊ុន សែន បន្ទាប់ពីពួកគាត់ដឹងថា លោកស្រី ច័ន្ទមករា និងប្ដីបានព្រមព្រៀងគ្នាចែកដីគ្នា ៥០% ម្នាក់ហើយមិនបានដោះស្រាយដីជាមួយពួកគាត់។
ក្នុងញតិ្តនោះពលរដ្ឋបានបន្តថា ដីជាង ៧ រយហិកតានោះ គឺបានទិញដោយមានមេភូមិ-មេឃុំ និងស្រុកទទួលស្គាល់ និងបានកាន់កាប់អស់រយៈពេល ៤ ឆ្នាំ ដោយបានធ្វើផ្លូវក្រួសក្រហម ភ្ជួររាស់ ជីកប្រឡាយ ជីកស្រះ និងដាំដំណាំផ្សេងៗ ដែលគិតជាទឹកប្រាក់អស់ប្រមាណ ៦ លាន ២ សែនដុល្លារថែមទៀត។
ពលរដ្ឋទាំងនេះបន្តថា ប៉ុន្តែនៅខែមេសា ឆ្នាំ ២០១៩ លោក Rainer Maria Wollny ប្រធានក្រុមហ៊ុន Delta W Trading Co. Ltd បានប្ដឹងពួកគាត់សុំទាមទារយកដីទាំងនោះវិញ និងថែមទាំងបានប្ដឹងប្រពន្ធរបស់ខ្លួនថា បានក្លែងឯកសារ ដើម្បីលួចលក់ដីទាំងនោះ។
ភ្នំពេញប៉ុស្ដិ៍មិនអាចសុំការបញ្ជាក់បន្ថែមពីអ្នកស្រី ច័ន្ទមករា បានទេដោយអ្នកស្រីថ្លែងថាជាប់រវល់ធ្វើដំណើរ។
ចំណែកលោក ផុន ធារិន មេធាវីលោក Rainer Maria Wollny បានបញ្ជាក់ថា ដោយសារក្ដីស្រឡាញ់ប្រទេសកម្ពុជា កូនក្ដីរបស់លោកបានធ្វើដំណើរមករស់នៅកម្ពុជាតាំងពីឆ្នាំ ២០០៤ ហើយបានបើកក្រុមហ៊ុនមួយ ដើម្បីវិនិយោគលើវិស័យកសិកម្ម ដោយបានទិញដីជាង ១ ១០០ ហិកតា នៅក្នុងខេត្តកំពង់ស្ពឺ។
លោកថា អ្នកស្រី ច័ន្ទមករា គឺបានបម្រើការងារជាអ្នកគ្រប់គ្រងទូទៅ និងទទួលបន្ទុកខាងផ្នែកហិរញ្ញវត្ថុនៅក្នុងក្រុមហ៊ុន Delta W Trading Co. Ltd ព្រមទាំងបានស្រឡាញ់ និងរស់នៅជាមួយលោក Rainer Maria Wollny។
លោកបន្ថែមថា ប្ដីប្រពន្ធដែលមិនបានចុះលិខិតអាពាហ៍ពិពាហ៍នេះបានកើតមានវិវាទរឿងដីធ្លីជាមួយគ្នា បន្ទាប់ពីមានករណីលួចឯកសាររបស់ក្រុមហ៊ុនទាំងអស់រួមទាំងឯកសារបណ្ណកម្មសិទ្ធិដីផងកាលពីចុងឆ្នាំ ២០១៥ ហើយក្រោយមកខាងភាគីប្រពន្ធបានក្លែងឯកសារថា ក្រុមហ៊ុនបានប្រគល់សិទ្ធិឱ្យខ្លួនឈរឈ្មោះលក់ដីទាំងនោះ។
លោកមេធាវីបញ្ជាក់ថា មូលហេតុដែលកូនក្ដីរបស់លោកព្រមទទួលយកដំណោះស្រាយយកដីតែ ៥០% មកវិញគឺដោយសារលោក Rainer Maria Wollny មានវ័យកាន់តែចាស់ និងចង់ប្រើប្រាស់ពេលវេលាចុងក្រោយនៃជីវិតដើម្បីផ្ដោតទៅលើការវិនិយោគវិស័យកសិកម្មដែលលោកស្រឡាញ់។
លោកថា៖ «ខាងខ្ញុំដោយសារយកគោលការណ៍សុខដុមបនីយកម្មគឺបានឯកភាពដើម្បីបញ្ចប់រឿង ដោយសារគាត់មានអាយុ ៧៤ ឆ្នាំហើយ។ គាត់គិតថា គាត់ចង់ប្រើប្រាស់ពេលវេលា ឬជីវិតចុងក្រោយទៅលើរឿងក្ដីក្ដាំនៅតុលាការទៀតទេ ដោយសុខចិត្តត្រឡប់មកចូលរួមអភិវឌ្ឍរួមចំណែកជាមួយប្រទេសកម្ពុជាវិញ ជាពិសេសលើវិស័យកសិកម្ម»។
លោក វ៉ី សំណាង បញ្ជាក់ទៀតថាខាងខេត្តនឹងរង់ចាំជួយដោះស្រាយបន្តទៀត នៅពេលមានសំណើពីពលរដ្ឋជាង ៣០ គ្រួសារ ដែលកំពុងទាមទារដីពីអ្នកស្រី ច័ន្ទមករា មកវិញ៕