.jpg)
លោក ទុយ សេរីវឌ្ឍនា ដែលជាតួអង្គសំខាន់ក្នុងខ្សែភាពយន្ត«ពូដំរី»។ រូបថត សហការី
ភ្នំពេញ៖ «ពូដំរី [Uncle Elephant]» គឺជាខ្សែភាពយន្តខ្នាតតូចមួយ ដែលនិយាយអំពីកិច្ចខិតខំប្រឹងប្រែងរបស់កម្ពុជា ក្នុងការអភិរក្សសត្វដំរីអាស៊ី និង ធនធានធម្មជាតិដ៏សំបូរបែប ក្នុងតំបន់ ព្រៃឡង់ នឹងត្រូវបានគេនាំយកទៅចាក់បញ្ចាំងនៅក្នុងកម្មវិធី World Wildlife Film Festival Day 2020 ដែលនឹងប្រព្រឹត្តទៅនៅទីក្រុង New York សហរដ្ឋអាមេរិក នាថ្ងៃទី ០៣ ខែមីនា ខាងមុខ។
លោក ទុយ សេរីវឌ្ឍនា នាយកកម្មវិធីនៃអង្គការ Wild Earth Allies (Cambodia) និងដែលជាតួអង្គសំខាន់នៃខ្សែភាពយន្តនេះ បានប្រាប់ភ្នំពេញប៉ុស្តិ៍ តាមសារអេឡិចត្រូនិកនៅថ្ងៃអង្គារថា ខ្សែភាពយន្តដែលមានចំណងជើងថា ពូដំរី [Uncle Elephant Film] ត្រូវបានក្រុមការងារនៃអង្គការ Wild Earth Allies (Cambodia) ផលិតឡើងនៅដើមឆ្នាំ ២០១៩ ហើយវាត្រូវបានក្រុមគណៈកម្មការ Wildlife Conservation Film Festival បោះឆ្នោតជ្រើសរើសឲ្យជាប់ចំណាត់ថ្នាក់ Silverback Film កាលពីខែតុលាឆ្នាំមុន។
លោកបញ្ជាក់ថា៖ «ពូដំរី គឺជាខ្សែភាពយន្តដំបូងបំផុតមួយ របស់យើង ដែលត្រូវបានជ្រើសរើសយកទៅចាក់បញ្ចាំងនៅក្នុងមហោស្រពភាពយន្តរបស់អង្គការសហប្រជាជាតិ ស្ដីពីការអភិរក្សបរិស្ថានធម្មជាតិនិងសត្វព្រៃ ក្នុងទីក្រុង New York។ វាពិតជារំភើបចិត្តណាស់ ដែលស្នាដៃរបស់យើងត្រូវបានបង្ហាញលើឆាកអន្តរជាតិ»។
ខ្សែភាពយន្ត «ពូដំរី» ដែលមានរយៈពេលតិចជាង ៥ នាទីនេះ ក៏បានបង្ហាញអំពីកិច្ចសហប្រតិបត្តិការល្អរវាងអង្គការ Wild Earth Allies (Cambodia) និងស្ថាប័នពាក់ព័ន្ធនានារបស់រដ្ឋាភិបាលកម្ពុជា រួមទាំងសហគមន៍ជនជាតិដើមភាគតិចកួយក្នុងតំបន់ ព្រៃឡង់។
សកម្មភាពទាំងនោះ ភាគច្រើនផ្ដោតសំខាន់ទៅលើកិច្ចការពារអភិរក្សធនធានធម្មជាតិ និងសត្វព្រៃនៅកម្ពុជា ពិសេសសត្វដំរីអាស៊ី ដែលកំពុងរងគ្រោះជិតផុតពូជ ដោយសារការប្រមាញ់ និងការកាប់បំផ្លាញព្រៃឈើ ដែលជាទីជម្រករបស់វា។
លោក សេរីវឌ្ឍនា ដែលកាលពីនៅកុមារភាព មានក្ដីសុបិនចង់ក្លាយជាអ្នកការពារ និងអភិរក្សព្រៃឈើនិងសត្វព្រៃ ជាពិសេស ចង់ធ្វើការងារ ដែលពាក់ព័ន្ធនឹងការសិក្សាស្រាវជ្រាវ នៅក្នុងព្រៃជ្រៅៗ ដែលមនុស្សភាគច្រើនបំផុតមិនអាចទៅដល់ បាននិយាយថា នៅពេលនេះ លោកបានសម្រេចក្ដីសុបិនរបស់លោកហើយគឺចូលទៅក្នុងតំបន់ ព្រៃឡង់ នៃប្រទេសកម្ពុជា ជាទីដែលលោកកំពុងធ្វើការងារការពារនិងអភិរក្សសត្វដំរីអាស៊ី ក្រោមកិច្ចសហការជាមួយរដ្ឋាភិបាល និងសហគមន៍ជនជាតិភាគតិចកួយ។
តាមរយៈខ្សែភាពយន្តរឿង «ពូដំរី» នោះដែរ តំបន់ព្រៃឡង់ នៃប្រទេសកម្ពុជា ត្រូវបានគេប៉ាន់ប្រមាណថា មានវត្តមានសត្វដំរីអាស៊ីប្រមាណ ៤០ ក្បាលប៉ុណ្ណោះ។ ការថយចុះនៃចំនួនសត្វដំរីអាស៊ីនៅកម្ពុជាទាមទារឲ្យមានការចូលរួមពីគ្រប់ភាគីពាក់ព័ន្ធ ក្នុងកិច្ចការពារ អភិរក្ស ដើម្បីស្ដារឡើងវិញ នូវចំនួនសត្វដំរីអាស៊ី ដែលកំពុងរងគ្រោះ និងជិតផុតពូជនេះ។
លោក សេរីវឌ្ឍនា ដែលត្រូវបានអញ្ជើញឲ្យចូលរួមនៅក្នុងពិធីបើកសម្ពោធនៃការចាក់បញ្ចាំងខ្សែភាពយន្តរឿង «ពូដំរី» នៅក្នុងមហោស្រពភាពយន្តជាអន្តរជាតិ ស្ដីពីបរិស្ថានឆ្នាំ ២០២០ នេះ បានបញ្ជាក់ថា៖ «ខ្ញុំនឹងធ្វើដំណើរទៅទីក្រុង វ៉ាស៊ីនតោន នៅខែ មីនា ដើម្បីចូលរួមមហោស្រពភាពយន្តបរិស្ថាននេះ ហើយខណៈពេលដែលនៅអាមេរិក ខ្ញុំនឹងចំណាយពេលជាមួយមិត្តភក្តិអ្នកគាំទ្រ និងសហសេវិក រួមទាំងដំណើរទស្សនកិច្ចទៅកាន់ទីស្នាក់ការកណ្តាលរបស់ National Geographic ដើម្បីនិយាយអំពីការងារអភិរក្សរបស់យើងនៅក្នុងប្រទេសកម្ពុជា»។ បើតាមលោកសេរីវឌ្ឍនា នៅថ្ងៃទី ១៤ ខែមីនា ខាងមុខនេះ «ពូដំរី» ក៏នឹងត្រូវគេយកទៅចាក់បញ្ចាំងនៅឯ The Naval Heritage Center ផងដែរ៕
