.jpg)
ក្រុមសមត្ថកិច្ចដែលដោះមីនក្នុងស្រុកបន្ទាយស្រីកន្លងមក ។ រូបថត ស្រុកបន្ទាយស្រី
សៀមរាបៈ មន្ត្រីខេត្តសៀមរាប និងអាជ្ញាធរមីនបានអះអាងថា ភូមិត្រពាំងថ្មទាំងមូលដែលស្ថិតក្នុងឃុំឃុនរាម ស្រុកបន្ទាយស្រី ខេត្តសៀមរាបត្រូវបានរំដោះចេញពីហានិភ័យនៃគ្រាប់មីន និងគ្រប់មិនទាន់ផ្ទុះជាស្ថាពរ តាមរយៈកិច្ចគាំទ្រពីអង្គការ Peaceland ដោយប្រើពេលជាង ១០ ខែ និងមានគ្រាប់យុទ្ធភណ្ឌជាង ១០០ គ្រាប់ត្រូវបានកម្ទេច។
លោក ឃឹម ហ្វីណង់ អភិបាលស្រុកបន្ទាយស្រីបានប្រាប់ភ្នំពេញប៉ុស្ដិ៍កាលពីថ្ងៃអង្គារថា ប្រតិបត្តិការបោសសម្អាតគ្រាប់មីននេះ គាំទ្រដោយអង្គការ Peaceland និងមានកិច្ចសហការជាមួយអាជ្ញាធរមីនចាប់តាំងពីខែសីហា ឆ្នាំ ២០១៩ រហូតដល់ខែមិថុនា ឆ្នាំ ២០២០ ដើម្បីឲ្យពលរដ្ឋរស់នៅតំបន់នេះរួចផុតពីបញ្ហាលំបាកពីគ្រាប់មីន ឬគ្រាប់មិនទាន់ផ្ទុះ។
លោកបន្តថា តាមការកំណត់របស់ក្រុមការងារបានជ្រើសរើសយកភូមិត្រពាំងថ្ម ឃុំឃុនរាម ស្រុកបន្ទាយស្រីធ្វើជាគោលដៅដំបូង ដើម្បីបន្សាបគ្រាប់មីន និងគ្រាប់យុទ្ធភណ្ឌមិនទាន់ផ្ទុះ ដោយសារតំបន់នេះគឺជាអតីតសមរភូមិក្តៅកាលពីសម័យសង្គ្រាមដែលមានទីតាំងខ្លះអាចបន្សល់នូវគ្រាប់មីន និងយុទ្ធភណ្ឌមិនទាន់ផ្ទុះ។
លោកបានបញ្ជាក់ថា៖ «ដោយសារប្រវត្តិទីតាំងធ្លាប់មានសង្គ្រាមរ៉ាំរ៉ៃ អ្នកភូមិឧស្សាហ៍ប្រទះឃើញគ្រាប់មីនព្រមទាំងមានការរាយការណ៍ពីប្រជាពលរដ្ឋស្នើឲ្យអាជ្ញាធរជួយរំដោះគ្រាប់ទាំងនេះ។ ពលរដ្ឋជាង ២០០ គ្រួសារមានការបារម្ភខ្លាំងពីបញ្ហាគ្រាប់មីនដែលបន្សល់ទុកតាំងពីសម័យសង្គ្រាមដោយស្ទើរតែមិនហ៊ានចូលទៅធ្វើស្រែចម្ការនៅលើដីរបស់ខ្លួន»។
លោកបញ្ជាក់បន្ថែមថា៖ «ចាប់ពីពេលនេះទៅអ្នកភូមិបានរួចផុតពីបញ្ហាលំបាកមួយទៀត គាត់អាចរស់នៅបានដោយធម្មតាដូចតំបន់ដទៃទៀតហើយ។ តំបន់ដែលរងហានិភ័យពីគ្រាប់មីន ឬគ្រាប់មិនទាន់ផ្ទុះនេះបានជះឥទ្ធិពលយ៉ាងខ្លាំងទៅលើជីវភាពប្រចាំថ្ងៃ និងការប្រើប្រាស់ដីធ្លីរបស់អ្នកភូមិ»។
តាមលោក ឃឹម ហ្វីណង់ ក្នុងរយៈពេលជាង ១០ ខែនេះជាលទ្ធផលគ្រាប់មីនចំនួន ៤០ គ្រាប់ និងគ្រាប់មិនទាន់ផ្ទុះចំនួន ៦៧ គ្រាប់ត្រូវបានរកឃើញ និងកម្ទេចចោលនៅក្នុងភូមិត្រពាំងថ្មទាំងមូល។ ប៉ុន្តែលោកអះអាងថា អាជ្ញាធរ គ្រោងនឹងរៀបចំឲ្យមានប្រតិបត្តិការដោះមីននៅតាមឃុំផ្សេងៗទៀតក្នុងស្រុកបន្ទាយស្រីនៅដើមឆ្នាំខាងមុខ។
លោក ហ្វីណង់ បានស្នើឲ្យពលរដ្ឋចូលរួមសហការ និងរាយការណ៍ប្រាប់សមត្ថកិច្ចពីតំបន់មានមីន ឬគ្រាប់យុទ្ធភណ្ឌមិនទាន់ផ្ទុះផ្សេងៗទៀតដើម្បីឲ្យអាជ្ញាធរអាចកំណត់គោលដៅអាទិភាពចុះទៅធ្វើប្រតិបត្តិការមុនគេចៀសវាងបង្កគ្រោះថ្នាក់ណាមួយដល់អ្នកភូមិ។
លោក ឈីវ លីម អគ្គលេខាធិការរងអាជ្ញាធរមីនកម្ពុជាដែលជាអ្នកសម្របសម្រួលការងារក្នុងតំបន់នេះផ្ទាល់បានប្រាប់ភ្នំពេញប៉ុស្តិ៍កាលពីថ្ងៃអង្គារថា ក្នុងគម្រោងនេះបានចំណាយអស់ទឹកប្រាក់ប្រមាណ ១៨ ម៉ឺនដុល្លារដែលទទួលបានពីអង្គការ Peaceland។ លោកបន្តថា ចំពោះផ្ទៃដីដែលបានរំដោះមីនក្នុងភូមិត្រពាំងថ្មទាំងមូលគឺមានជាង ៦០ ហិកតា។
លោកបញ្ជាក់ថា៖ «យើងឃើញថា គម្រោងនេះបានផលដល់ប្រជាពលរដ្ឋក្នុងតំបន់គ្រប់បែបគ្រប់យ៉ាង ហើយការប្រកបកសិកម្មរបស់ពលរដ្ឋក៏បានល្អដែរ។ ការដោះមីនទូទាំងប្រទេសរបស់អាជ្ញាធរមីននៅតែបន្ត ប៉ុន្តែកិច្ចសហការជាមួយអង្គការ Peaceland យើងឈប់បណ្តោះអាសន្នសិន ដោយសារតែមានបញ្ហាកូវីដ១៩។ យើងនឹងចាប់ផ្តើបន្តជាមួយអង្គការនេះនៅដើមឆ្នាំ ២០២១»៕
