ភ្នំពេញ៖ យ៉ាងហោចណាស់អាជ្ញាធរខេត្តចំនួន ៦ បានធ្វើការបិទទីតាំងថ្មីៗបន្ថែមទៀតជាបណ្តោះអាសន្ន បន្ទាប់ពីរកឃើញអ្នកមានវិជ្ជមានកូវីដ ១៩ ជាបន្តបន្ទាប់ ដើម្បីទប់ស្កាត់ការរីករាលដាលជំងឺនេះ។
កាលពីថ្ងៃទី ៥ ខែឧសភា រដ្ឋបាលខេត្តបន្ទាយមានជ័យបានចេញសេចក្តីសម្រេចបិទខ្ទប់ការធ្វើដំណើរចេញ និងចូលជាបណ្តោះអាសន្នទីតាំងក្នុងភូមិសាស្ត្រភូមិប្រជាធម្មលិច និងភូមិប្រជាធម្មកើត នៃក្រុងប៉ោយប៉ែតរយៈពេល ១៤ ថ្ងៃ គិតចាប់ពីថ្ងៃទី ៦ ខែឧសភា ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រដែលត្រូវបិទខ្ទប់ និងទប់ស្កាត់ជំងឺនេះមិនឲ្យឆ្លងរីករាលដាលទៅកាន់តំបន់ផ្សេងទៀត។
សេចក្តីសម្រេចនេះបញ្ជាក់ថា៖ «ក្នុងអំឡុងពេលនៃការអនុវត្តវិធានការបិទខ្ទប់ភូមិទាំងពីរនេះ បុគ្គលគ្រប់រូបត្រូវបានហាមឃាត់ការធ្វើដំណើរចេញពីលំនៅឋាន ឬទីសំណាក់បច្ចុប្បន្ន និងត្រូវបានហាមឃាត់រាល់សកម្មភាពការងារ មុខរបរ ឬអាជីវកម្ម ដែលមិនមែនជាតម្រូវការចាំបាច់ប្រចាំថ្ងៃ លើកលែងតែក្នុងករណីចាំបាច់»។
នៅថ្ងៃទី ៥ ខែឧសភា នេះផងដែរ រដ្ឋបាលខេត្តកំពង់ស្ពឺ បានចេញសេចក្តីសម្រេចផ្អាកជាបណ្តោះអាសន្នរយៈពេល ៥ ថ្ងៃ នូវភោជនីយដ្ឋាន អាហារដ្ឋាន តូបអាហារចល័ត ដែលបើកទទួលអតិថិជនចូលទទួលទានអាហារ ភេសជ្ជៈ នៅចន្លោះម៉ោង ៨ យប់ ដល់ម៉ោង ៣ ព្រឹក គិតចាប់ពីថ្ងៃទី ៦ ខែឧសភា។ ប៉ុន្តែទីតាំងអាជីវកម្មទាំងនោះអាចលក់ ជាលក្ខណៈ វេចខ្ចប់បាន។
សេចក្តីសម្រេចនេះបញ្ជាក់ថា៖ «ភោជនីយដ្ឋាន អាហារដ្ឋាន តូបអាហារចល័ត ដែលបើកទទួលអតិថិជនចូលទទួលទានអាហារមិនត្រូវលក់គ្រឿងស្រវឹងជាដាច់ខាត។ គ្រប់ផ្សាររដ្ឋ ផ្សារឯកជន ផ្សារម៉ាត ហាងលក់ភេសជ្ជៈ ត្រូវផ្អាកការលក់គ្រឿងស្រវឹងគ្រប់ប្រភេទ»។
សេចក្តីសម្រេចបន្តការជួបជុំជាលក្ខណៈគ្រួសារដែលមានការទទួលទានគ្រឿងស្រវឹងត្រូវបានផ្អាក ហើយរាល់ការធ្វើសកម្មភាពកីឡា ដែលមានលក្ខណៈជួបជុំ ឬការប្រមូលផ្តុំមនុស្សលើសពី ២ នាក់ក៏ត្រូវផ្អាកដែរ។
លោក កែវ គុចសី អ្នកនាំពាក្យសាលាខេត្តកំពង់ស្ពឺបានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែឧសភាថា រហូតមកដល់ពេលនេះ មានភូមិមួយចំនួនហើយត្រូវបានបិទខ្ទប់ ដែលភូមិខ្លះមានការបិទខ្ទប់មួយផ្នែក ហើយអ្នកដំណើរដែលធ្វើដំណើរទៅកាន់ខេត្តកំពង់ស្ពឺ មិនតម្រូវឱ្យធ្វើចត្តាឡីស័កនោះទេ។
លោកថ្លែងថា៖ «ក្នុងករណីគាត់មានពាក់ព័ន្ធផ្ទាល់ ឬប្រយោលជាមួយអ្នកមានវិជ្ជមានកូវីដ ១៩ បើយើងរកឃើញ គឺយើងយកគាត់ទៅធ្វើចត្តាឡីស័កនៅកន្លែងដែលយើងបានរៀបចំ»។
ដោយឡែករដ្ឋបាលខេត្តត្បូងឃ្មុំនៅថ្ងៃទី ៥ ខែឧសភានេះដែរ បានចេញសេចក្តីសម្រេចបិទខ្ទប់ជាបណ្តោះអាសន្នក្នុងទីតាំងភូមិតាកែវ និងភូមិសេដាសែនជ័យ ឃុំសេដា ស្រុកតំបែរ ខេត្តត្បូងឃ្មុំ ដើម្បីទប់ស្កាត់ការរាលដាលជំងឺកូវីដ ១៩ រយៈពេល ១៤ ថ្ងៃ ចាប់ពីថ្ងៃទី ៥ ខែឧសភា។
នៅថ្ងៃទី៦ ខែឧសភា រដ្ឋបាលខេត្តក្រចេះបានចេញសេចក្តីសម្រេចបិទការចេញ និងចូលជាបណ្តោះអាសន្ននូវទីតាំង បន្ទប់ពិគ្រោះព្យាបាលជំងឺទាវប៊ូ ឱសថស្ថានរងសុខខេន ហាងលីកាវ៉ាត ២៥oo, និងហាងមីហឹរសេអ៊ូល ៧ កំរិត ស្ថិតនៅសង្កាត់ក្រចេះ និងសង្កាត់អូឫស្សី ក្រុងក្រចេះ ខេត្តក្រចេះ ចាប់ពីថ្ងៃទី ៥ ខែឧសភា រហូតដល់មានសេចក្តីសម្រេចជាថ្មីមកជំនួស។
ចំណែកឯរដ្ឋបាលខេត្តព្រះវិហារនៅថ្ងៃទី ៥ ខែឧសភា បានចេញសេចក្តីសម្រេចផ្អាកអាជីវកម្ម ៣ ទីតាំង ដែលពាក់ព័ន្ធអ្នកវិជ្ជមានកូវីដ ១៩ កាលពីថ្ងៃទី ២៧ ខែមេសា គិតចាប់ពីថ្ងៃទី ៥ ខែឧសភា រហូតដល់មានការជូនដំណឹងជាថ្មី។ ទីតាំងទាំងនោះរួមមាន បន្ទប់ពិគ្រោះ និងព្យាបាលជំងឺ ហែម ភិរឹទ្ធ ស្ថិតនៅភូមិរវៀងត្បូង ឃុំរុងរឿង ស្រុករវៀង បន្ទប់ពិគ្រោះ និងព្យាបាលជំងឺ មុំ រឹទ្ធី ស្ថិតក្នុងភូមិឡអិដ្ឋ សង្កាត់កំពង់ប្រណាក ក្រុងព្រះវិហារ និងផ្ទះសំណាក់ គីម សិរីភា ស្ថិតក្នុងភូមិងណ្តូងពោធិ សង្កាត់កំពង់ប្រណាក ក្រុងព្រះវិហារ។
កាលពីថ្ងៃទី ៥ ខែឧសភា រដ្ឋបាលខេត្តកំពង់ធំបានចេញសេចក្តីសម្រេចផ្អាកជាបណ្តោះអាសន្ននូវការធ្វើចរាចរណ៍ក្នុងឃុំកំពង់ចិនត្បូង ឃុំកំពង់ចិនជើង ឃុំចំណារលើ និងឃុំសំពោច នៃស្រុកស្ទោង ខេត្តកំពង់ធំ នៅចន្លោះម៉ោង ៨ យប់ដល់ម៉ោង ៣ ព្រឹក ចាប់ពីថ្ងៃទី ៦ ខែឧសភា ដល់ថ្ងៃទី ១២ ខែឧសភា៕