.jpg)
អ្នកជំងឺគ្រុនឈីកសម្រាកព្យាបាលនៅមន្ទីរពេទ្យបង្អែកស្រុកមង្គលបុរី។ រូបថត សហការី
បន្ទាយមានជ័យៈ មន្ត្រីនៃមន្ទីរសុខាភិបាលខេត្តបន្ទាយមានជ័យបានឲ្យដឹងថា នៅភូមិអូរស្ងួត ឃុំអូរប្រាសាទ ស្រុកមង្គលបុរីមានករណីផ្ទុះជំងឺគ្រុនឈីក (Chikunnguya) ដែលធ្វើឲ្យមនុស្សប្រមាណ ៥០ នាក់ មានអាការក្តៅខ្លួន ឈឺសន្លាក់ដៃជើង ឈឺសាច់ដុំ ចេញកន្ទួលលើស្បែក ខណៈជំងឺនេះកំពុងបន្តរាលដាលទៅភូមិ ៤ ទៀតដែលនៅជិតនោះ។
លោក ឡេ ច័ន្ទសង្វាត ប្រធានមន្ទីរសុខាភិបាល ខេត្តបន្ទាយមានជ័យបានប្រាប់ភ្នំពេញប៉ុស្តិ៍ពីម្សិលមិញថា កាលពីយប់ថ្ងៃទី ៧ កញ្ញា មានករណីផ្ទុះជំងឺឈីកជាថ្មីទៀតនៅក្នុងខេត្តនេះដោយក្រុមការងារចុះត្រួតពិនិត្យបន្ទាន់ បានឃើញករណីសង្ស័យចំនួន ៤៩ នាក់ ស្រី ២៧ នាក់ ប្រុស ២២ នាក់ ក្នុងនោះមានកុមារ ៣៥ នាក់។
លោកបន្តថា បន្ទាប់ពីរកឃើញយ៉ាងដូច្នេះក្រុមការងារបានបញ្ជូនអ្នកជំងឺទាំងនោះមកមន្ទីរពេទ្យមិត្តភាពកម្ពុជា ជប៉ុនមង្គលបុរីចំនួន ២៣ នាក់ (កុមារ ១៥ នាក់)។ ពួកគេមានរោគសញ្ញាក្តៅខ្លួន ៣៩ ដល់ ៤០ អង្សាសេ ឈឺសន្លាក់ដៃជើង ឈឺសាច់ដុំ ចេញកន្ទួលលើស្បែក វិលមុខ ក្អួតចង្អោរ។
លោកបានបញ្ជាក់ថា៖ «បន្ទាប់ពីបានបញ្ជូនក្រុមឆ្លើយតបបន្ទាន់ (RRT) ចុះស្រាវជ្រាវ និងអន្តរាគមន៍ព័ត៌មានបឋម ក្រុមការងារឃើញករណីសង្ស័យ ចំនួន ៤៩ នាក់ ។ តាមការចុះពិនិត្យ និងការត្រួតពិនិត្យសុខភាពនៅមន្ទីរពេទ្យ ឃើញថា មិនមានសភាពធ្ងន់ធ្ងរទេ តែនៅមានក្តៅខ្លួន ឈឺក្បាល ឈឺសន្លាក់ដៃជើង ហើយគ្រូពេទ្យបន្តការតាមដានសភាពអ្នកជំងឺ យ៉ាងយកចិត្តទុកដាក់»។
បន្ថែមពីនេះលោក ឡេ ច័ន្ទសង្វាត បានឲ្យដឹងទៀតថា ក្រោយបញ្ចប់ការងារ និងបន្តតាមដានករណីគ្រុនឈីកនៅភូមិអូរស្ងួតនេះ ក្រុមការងារក៏កំពុងសង្ស័យថា មានការរីករាលដាលនៃជំងឺនេះទៅភូមិដែលនៅក្បែរៗនោះចំនួន ៤ ភូមិទៀតដែរ។
លោកថា ការអន្តរាគមន៍បន្ទាន់កំពុងបន្តស្រាវជ្រាវករណីសង្ស័យបន្ថែមទៀតដើម្បីបញ្ជូនរកសេវាព្យាបាល និងថែទាំ និងបូមឈាមរកករណីសង្ស័យផ្សេងទៀត ដើម្បីស្រាវជ្រាវមេរោគគ្រុនឈីក។
លោកបញ្ជាក់បន្ថែមថា៖ «មកទល់ពេលនេះមានករណីថ្មីកើតមានទៀត តែមិនច្រើនទេ។ ក្រុមការងារយើងកំពុងចុះអប់រំផ្សព្វផ្សាយនូវសារសុខភាព ការបង្ការ និងការលុបបំបាត់ជម្រកមូសដោយសហការជាមួយអាជ្ញាធរមូលដ្ឋាន និងផ្នែកពាក់ព័ន្ធ ពិសេសការចុះដាក់អាបែតបន្ថែម និងការបាញ់ថ្នាំមូសតំបន់គោលដៅ»។
កាលពីខែកក្កដា នៅខេត្តនេះក៏មានផ្ទុះជំងឺគ្រុនឈីកនេះដែរ ដោយមានពលរដ្ឋជិត ២០០ នាក់ រស់នៅភូមិក្បាលកោះ ភូមិអូរជ្រៅ ភូមិប៉ោយប៉ែត ភូមិព្រៃគប់ ភូមិអូរនាង និងអូរឫស្សីនៃសង្កាត់ប៉ោយប៉ែត បានកើតជំងឺនេះ។ គិតត្រឹមខែកក្កដា ជំងឺគ្រុនឈីកបានផ្ទុះឡើងដល់ ១៥ ខេត្តនៅកម្ពុជា និងមានអ្នកសង្ស័យឆ្លងជំងឺនេះបានកើនដល់ជិត ២ ០០០ នាក់។ នេះបើយោងតាមលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។
ក្រសួងសុខាភិបាលកាលពីខែ កក្កដា បានប្រកាសថា ជំងឺគ្រុនឈីកគឺជាជំងឺបង្កឡើងដោយវីរុសឈីកដែលចម្លងតាមរយៈមូសខ្លាញីខាំ ជាពិសេសខាំនៅពេលថ្ងៃ។ រោគសញ្ញាជំងឺនេះស្រដៀងនឹងជំងឺគ្រុនឈាមដែរ ដោយគ្រាន់តែអ្នកផ្ទុកជំងឺគ្រុនឈីកមានអាការក្តៅខ្លួន ឡើងកន្ទួលក្រហម និងឈឺសន្លាក់រាងកាយ។
តែជំងឺគ្រុនឈីកមិនប៉ះពាល់ដល់អាយុជីវិតទេ ដោយវានឹងជាសះវិញក្នុងអំឡុងពេល ១ សប្តាហ៍ ឬយូរជាងនេះដោយគ្រាន់តែធ្វើឲ្យអ្នកជំងឺមានអាការឈឺសន្លាក់ដៃជើងយូរឆ្នាំ។ ប៉ុន្តែប្រសិនបើអ្នកជំងឺឈីកកើតក្នុងអំឡុងពេលមានជំងឺផ្សេងទៀតដូចជា ជំងឺគ្រុនឈាម គ្រុនចាញ់ នឹងអាចធ្វើឲ្យប៉ះពាល់ដល់អាយុជីវិតបាន។ នេះបើតាមក្រសួងសុខាភិបាល៕
