.jpg)
ទេសភាពនៅតំបន់ឆ្នេរខេត្តកែបកាលពីថ្ងៃទី ២ មករា ២០២១។ ហ៊ាន រង្សី
ភ្នំពេញៈ ភ្ញៀវទេសចរភាគច្រើនដែលទៅលេងកម្សាន្តក្នុងពិធីបុណ្យឆ្លងឆ្នាំសកល ២០២០ ឈានចូល ២០២១ នៅតាមបណ្តាខេត្តជាប់មាត់សមុទ្រមានការយល់ដឹងច្រើន និងបានវេចខ្ចប់ទុកដាក់សំរាមបានត្រឹមត្រូវ ថែមទាំងមានឥរិយាបថល្អក្នុងការចូលរួមថែរក្សាបរិស្ថាន និងអនាម័យលើកលែងតែភ្ញៀវទេសចរមួយចំនួនតូចប៉ុណ្ណោះ ដែលនៅតែបន្តបោះចោលសំរាម។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុប្រាប់ភ្នំពេញប៉ុស្ដិ៍ពីម្សិលមិញថា ភ្ញៀវទេសចរមកលេងកម្សាន្តក្នុងថ្ងៃបុណ្យឆ្លងឆ្នាំសកលកាលថ្ងៃទី ៣១ ខែ ធ្នូ ឆ្នាំ ២០២០ និងថ្ងៃទី ១ មករា ឆ្នាំ ២០២១ មានចំនួនសរុប ៧៤ ៩២៣ នាក់កើនឡើង ១៤, ៨៦% បើធៀបនឹងឆ្នាំ ២០១៩ ក្នុងនោះភ្ញៀវជាតិ ៧២ ៣៣០ នាក់ កើនឡើង ៣៩,២១% ភ្ញៀវបរទេស ២ ៥៩៣ នាក់ ថយចុះ ៨០,៤៥%។
លោកបានបន្តថា៖ «យើងសង្កេតឃើញថា បងប្អូនប្រជាពលរដ្ឋមានការចូលរួមក្នុងការសម្អាតបរិស្ថានតាមតំបន់ឆ្នេរ ជាពិសេសការទុកដាក់សំរាមដោយមានការវេចខ្ចប់កាកសំណល់សំរាមបានល្អ។ ពួកគាត់បានរៀបចំ វេចខ្ចប់សំរាមរួចជាស្រេចទុកដាក់នៅកន្លែងធុងសំរាម ឬកន្លែងទុកដាក់សំរាមសម្រាប់ឱ្យក្រុមការងារដឹកជញ្ជូនយកទៅទុកនៅទីលានដាក់សំរាម»។ សកម្មភាពរបស់ប្រជាពលរដ្ឋចំពោះការរៀបចំទុកដាក់សំរាមបានល្អបែបនេះគឺជាគំរូល្អមួយដែលបានបញ្ជាក់ពីការយល់ដឹងរបស់ប្រជាពលរដ្ឋ ជាពិសេសភ្ញៀវទេសចរក្នុងការថែរក្សាអនាម័យ បរិស្ថាន និងជួយលើកស្ទួយសោភណភាពតំបន់ឆ្នេរសមុទ្រ។
លោក ភារម្យ បញ្ជាក់ថា៖ «ក្នុងនាមអាជ្ញាធរខេត្ដព្រះសីហនុ យើងនៅតែពង្រឹងការសម្អាតឆ្នេរសមុទ្ររបស់យើង ដោយយើងមានក្រុមការងារសម្អាតឆ្នេរ មានម៉ាស៊ីនសម្រាប់សម្អាត រថយន្តសម្អាត និងបានធ្វើជាប្រចាំ»។
លោកបានអំពាវនាវដល់ប្រជាពលដ្ឋក៏ដូចជាភ្ញៀវទេសចរជាតិ អន្តរជាតិ ឱ្យចូលរួមសហការបន្ថែមទៀតក្នុងការជួយសម្អាតឆ្នេរសមុទ្រ ដើម្បីឱ្យធានាបាននូវអនាម័យ បរិស្ថាន គុណភាពឆ្នេរខ្សាច់ គុណភាពទឹក និងគុណភាពខ្យល់នៅតាមរមណីយដ្ឋាន និងតំបន់ឆ្នេរកម្សាន្តនានា។
អ្នកស្រី គួង សុខគៀង ពលរដ្ឋម្នាក់រស់នៅភ្នំពេញដែលបានទៅលេងកម្សាន្តនៅក្រុងព្រះសីហនុកាលថ្ងៃឆ្លងឆ្នាំសកលថ្លែងថា នៅថ្ងៃឆ្លងឆ្នាំមានមនុស្សច្រើនទៅលេងកម្សាន្តនៅឆ្នេរសមុទ្រក្រុងព្រះសីហនុ ហើយសំរាមក៏មានច្រើនដែរ។ ប៉ុន្ដែសំរាមទាំងនោះត្រូវបានរៀបចំទុកដាក់យ៉ាងមានសណ្ដាប់ធ្នាប់។ អ្នកស្រីប្រាប់ថា៖ «សុំសរសើរដែរព្រោះពេលយប់ឆ្លងឆ្នាំមនុស្សច្រើនណាស់សំរាមក៏ច្រើន តែព្រឹកឡើងមើលនៅតាមឆ្នេរឡើងស្អាត សំរាមទោះជញ្ជូនមិនទាន់អស់ក៏បានរៀបចំជាគំនរយ៉ាងមានរបៀប»។
លោក អ៊ឹង វុទ្ធី នាយករដ្ឋបាលខេត្ដកែបថ្លែងពីម្សិលមិញដែរថា ភ្ញៀវទេសចរក្នុងថ្ងៃពិធីបុណ្យឆ្លងឆ្នាំសកលថ្ងៃទី ៣១ ខែ ធ្នូ ២០២០ និងថ្ងៃទី ១ មករា ២០២១ មានជាង ៥ ម៉ឺននាក់ក្នុងនោះទេសចរភាគច្រើនបានរៀបចំទុកដាក់សំរាមបានល្អ។ ប៉ុន្ដែនៅយប់ថ្ងៃទី ៣១ ខែធ្នូ មានភ្ញៀវទេសចរច្រើនបានទៅលេងតាមតំបន់ឆ្នេរក៏មានពលរដ្ឋមួយចំនួនមិនបានទុកដាក់សំរាមត្រឹមត្រូវដែរ។
លោកថ្លែងថា៖ «នៅយប់ឆ្លងឆ្នាំសកលមានបងប្អូនប្រជាពលរដ្ឋមកលេងកម្សាន្តនៅតាមតំបន់ឆ្នេរសមុទ្រច្រើន ហើយយើងក៏ឃើញមានសំរាមច្រើនដែលបងប្អូនប្រជាពលរដ្ឋមិនបានរៀបចំទុកដាក់បានល្អ ហើយមានសំរាមធ្លាក់ចូលសមុទ្រមួយចំនួន។ ប៉ុន្ដែយើងបានចាត់ឱ្យក្រុមការងារទៅប្រមូលសំរាមទាំងនោះអស់ហើយដែរ»។
បើតាមលោក វុទ្ធី រដ្ឋបាលខេត្ដកែបមានយន្តការរៀបចំសណ្ដាប់ធ្នាប់ និងបរិស្ថាននៅតាមតំបន់ឆ្នេរសមុទ្រដើម្បីថែរក្សាអនាម័យបរិស្ថាននៅតាមតំបន់ឆ្នេរ។ រដ្ឋបាលខេត្ដក៏បានបំពាក់ធុងសំរាមនៅតាមតំបន់កម្សាន្តនានា និងមានទីលានសម្រាប់ចាក់សំរាមក្នុងក្រុងផងដែរ។
ចំណែកលោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្ដកោះកុង ថ្លែងពីម្សិលមិញថា ភ្ញៀវទេសចរជាតិ និងអន្តរជាតិមកលេងកម្សាន្តតាមរមណីយដ្ឋាននានាក្នុងខេត្ដកោះកុងក្នុងពិធីបុណ្យឆ្លងឆ្នាំសកលចាប់ពីថ្ងៃទី ៣១ ខែ ធ្នូ ឆ្នាំ ២០២០ ដល់ថ្ងៃទី ២ ខែ មករា ឆ្នាំ ២០២១ ភ្ញៀវទេសចរជាតិមានចំនួន ២៦ ២៤៥ នាក់កើនឡើងចំនួន ៣ ៦៣៥ នាក់ស្មើនឹង ១៦ ភាគរយ បើធៀបនឹងឆ្នាំ ២០១៩។ ទេសចរអន្តរជាតិមានចំនួន ៧៤ នាក់ ថយចុះ ៨ ៣៧០ នាក់បើធៀបនឹងឆ្នាំ ២០១៩។
លោកបញ្ជាក់ថា៖ «ពលរដ្ឋយើងគាត់មានឥរិយាបថថា ការប្រមូលសំរាម ឬក៏ការសម្អាតបរិស្ថាន គឺជាបន្ទុករបស់អាជ្ញាធរ ឬជារបស់អ្នកទទួលបន្ទុកណាម្នាក់ គឺមិនមែនជាបន្ទុករបស់ពួកគាត់ នេះគឺជាឥរិយាបថទូទៅរបស់ប្រជាពលរដ្ឋមួយចំនួនក្នុងខេត្ដកោះកុង»៕
