.jpg)
ភ្នាក់ងារទេសចរដែលទើបបញ្ចប់វគ្គបណ្ដុះបណ្ដាល។ រូប អាជ្ញាធរជាតិអប្សរា
សៀមរាប: ភ្នាក់ងារទេសចរចំនួន ១៥៥ នាក់ ត្រូវបានបញ្ចប់វគ្គបណ្ដុះបណ្ដាលស្ដីពីប្រវត្តិសាស្ត្រទូទៅទាក់ទងនឹងឧទ្យានអង្គរ ការអភិរក្ស និងការជួសជុលប្រាសាទ ទីតាំងមានហានិភ័យ និងវិធានការការពារសុវត្ថិភាពជូនភ្ញៀវទេសចរបន្ទាប់ពីសិក្សារយៈពេល ១ ខែដើម្បីឱ្យពួកគាត់ចូលរួមអង្កេតផ្តល់ព័ត៌មាន និងរួមចំណែករាយការណ៍ពីហានិភ័យនៅតាមប្រាសាទ។
លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យនៃអាជ្ញាធរជាតិអប្សរាបានថ្លែងថា នាយកដ្ឋានអភិវឌ្ឍន៍ទេសចរណ៍អង្គរ សហការជាមួយនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ និងមជ្ឈមណ្ឌលបណ្តុះបណ្តាលអង្គរនៃអាជ្ញាធរជាតិអប្សរាបានបណ្ដុះបណ្ដាលដោយផ្ដោតសំខាន់ពីហានិភ័យប្រាសាទក៏ដូចជា របៀបពន្យល់ពីប្រវត្តិសាស្ត្រអង្គរទៅកាន់ភ្ញៀវទេសចរ។ កម្មវិធីនេះត្រូវបានរៀបចំឡើងរយៈពេល ១ ខែ ហើយទើបតែបញ្ចប់កាលពីថ្ងៃទី ៣០ ខែ កញ្ញា ឆ្នាំ ២០២០ ថ្មីៗនេះ។
លោកបានបញ្ជាក់ថា៖ «យើងបានរៀបចំវគ្គបណ្ដុះបណ្ដាលជាច្រើនលើក ច្រើនវគ្គរួចមកហើយ ប៉ុន្ដែមិនមែនមុខជំនាញដដែលៗទេ គឺយើងផ្លាស់ប្ដូរមុខវិជ្ជាប្លែកៗដែលចាំបាច់តាមតម្រូវការបច្ចុប្បន្ន ដែលយើងមើលឃើញថា មន្ត្រីយើងនៅមានចំណុចខ្វះខាត។ យើងនៅបន្តបើកវគ្គបណ្ដុះបណ្ដាលបន្ថែមទៀតហើយរកគ្រូឧទ្ទេសជាតិ និងអន្តរជាតិមកបង្ហាត់បង្រៀនសិក្ខាកាមយើងដែលប្រឡូកផ្ទាល់ជាមួយភ្ញៀវទេសចរ»។
លោក លឹម ស្រ៊ូ ប្រធានភ្នាក់ងារទេសចរណ៍ក្នុងតំបន់អង្គរបានឱ្យដឹងកាលពីថ្ងៃទី ៤ តុលា ថា វគ្គបណ្តុះបណ្តាលអំពីហានិភ័យប្រាសាទនេះមានភ្នាក់ងារទេសចរចូលរួមចំនួន ១៥៥ នាក់ ដែលសុទ្ធតែជាប្រធាន និងអនុប្រធានក្រុមប្រចាំគោលដៅសំខាន់ៗដូចជា ក្រុមគោលដៅប្រចាំប្រាសាទអង្គរវត្ត ប្រាសាទបាយ័ន ប្រាសាទតាព្រហ្ម ប្រាសាទប្រែរូប និងប្រាសាទបាគងជាដើម។
លោកបន្តថា វគ្គបណ្តុះបណ្តាលនេះ បង្រៀនសិក្ខាកាមពីតួនាទីរបស់ភ្នាក់ងារទេសចរដែលមានការពន្យល់ពីអ្នកជំនាញជាតិ-អន្តរជាតិ អំពីប្រវត្តិសាស្ត្រទូទៅនៃឧទ្យានអង្គរប្រវត្តិនៃការអភិរក្ស និងការជួសជុលប្រាសាទ ការចុះពិនិត្យទីតាំងដែលមានហានិភ័យខ្ពស់ និងវិធានការការពារប្រាសាទនានាដើម្បីជួយសង្គ្រោះប្រាសាទក្នុងតំបន់អង្គរ។
លោក លឹម ស្រ៊ូ បានបញ្ជាក់ថា៖ «តាមរយៈមេរៀនទាំងនេះគឺដើម្បីឱ្យភ្នាក់ងារទេសចរមានមូលដ្ឋានជាគ្រឹះខ្លះៗ អាចចូលរួមអង្កេតផ្តល់ព័ត៌មាន និងរួមចំណែកផ្តល់សញ្ញាព័ត៌មានដល់ភ្ញៀវទេសចរបានជ្រាប និងទប់ស្កាត់ហានិភ័យផ្សេងៗនៅតាមប្រាសាទ។ លើសពីនេះបង្រៀនពីរបៀបសង្គ្រោះបឋមចំពោះភ្ញៀវទេសចរ ដែលមានបញ្ហាសុខភាពក្នុងអំឡុងពេលដើរទស្សនាតំបន់អង្គរ»។
ទាក់ទងនឹងការបណ្ដុះបណ្ដាលនេះ ភ្នំពេញប៉ុស្ដិ៍បានទាក់ទងទៅសិក្ខាកាមមួយចំនួនក្នុងចំណោម ១៥៥ នាក់នោះ ប៉ុន្តែពួកគាត់បានស្នើសុំមិនធ្វើអត្ថាធិប្បាយជុំវិញកម្មវិធីនេះទេកាលពីម្សិលមិញ។
លោក សុខ សង្វារ អគ្គនាយករងអាជ្ញាធរជាតិអប្សរាទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរបានថ្លែងក្នុងឱកាសបិទវគ្គបណ្តុះបណ្តាលនេះ នៅប្រាសាទបាគងកាលពីថ្ងៃទី ២ ខែតុលា ដោយលោកបានអរគុណចំពោះគ្រូឧទ្ទេសទាំងអស់ដែលបានចូលរួមចែករំលែកចំណេះដឹង និងបទពិសោធដល់ក្រុមការងារភ្នាក់ងារទេសចរនេះ។
ជាមួយនេះដែរលោកបានរំពឹងថា ភ្នាក់ងារទេសចរដែលទទួលបានការបណ្តុះបណ្តាលទាំងនេះនឹងយកចំណេះដឹងទៅប្រើប្រាស់ និងចែករំលែកបន្តទៀតប្រកបដោយផ្លែផ្កាល្អក្នុងការងារប្រចាំថ្ងៃរបស់ខ្លួន ដើម្បីភាពល្អប្រសើរក្នុងតំបន់អង្គរ៕
