.jpg)
ពន្ធនាគារខេត្តកណ្ដាល។ ហុង មិនា
ភ្នំពេញៈ ភ្នាក់ងារអង្គការសហប្រជាជាតិ (UN) ប្រចាំនៅកម្ពុជាអំពាវនាវដល់អគ្គនាយកដ្ឋានពន្ធនាគារឱ្យធ្វើការផ្សព្វផ្សាយព័ត៌មានទាក់ទងនឹងការរីករាលដាលជំងឺកូវីដ ១៩ នៅក្នុងពន្ធនាគារឱ្យមានតម្លាភាព ដូចការផ្សព្វផ្សាយក្នុងក្របខ័ណ្ឌផ្សេងដែរ បន្ទាប់ពីពួកគេមិនទទួលបានទិន្នន័យច្បាស់លាស់ពីការរីករាលដាលកូវីដ ១៩ នៅក្នុងពន្ធនាគារ។
យោងតាមសេចក្ដីប្រកាសព័ត៌មានរបស់អង្គការសហប្រជាជាតិប្រចាំនៅកម្ពុជា ចេញកាលពីថ្ងៃទី ២៨ ខែឧសភា បានឱ្យដឹងថា ភ្នាក់ងារអង្គការសហប្រជាជាតតិប្រចាំនៅកម្ពុជា បានធ្វើការងារ និងសហការយ៉ាងជិតស្និទ្ធ ជាមួយអគ្គនាយកដ្ឋានពន្ធនាគារដោយផ្អែកលើកាតព្វកិច្ចរបស់ភ្នាក់ងារនីមួយៗក្នុងគោលបំណងធានាថា សិទ្ធិរបស់មនុស្សនៅក្នុងការឃុំខ្លួន និងអ្នកដែលធ្វើការជាមួយជនជាប់ឃុំ ត្រូវបានការពារ ស្របតាមកាតព្វកិច្ចសិទ្ធិមនុស្សអន្តរជាតិរបស់ប្រទេសកម្ពុជា។
សេចក្ដីប្រកាសព័ត៌មានបញ្ជាក់ថា៖ «ភ្នាក់ងារអង្គការសហប្រជាជាតិប្រចាំនៅកម្ពុជា មិនមានព័ត៌មានជាក់លាក់អំពីចំនួនករណីវិជ្ជមាននៅក្នុងពន្ធនាគារនៅកម្ពុជាទេ។ ដូច្នេះយើងអំពាវនាវឱ្យមានតម្លាភាពកាន់តែប្រសើរឡើងចំពោះការផ្សព្វផ្សាយព័ត៌មាននៃការរកឃើញករណីវិជ្ជមានអ្នកជំងឺកូវីដ ១៩ នៅក្នុងពន្ធនាគារ ដើម្បីធានាថា ករណីរីករាលដាលជំងឺកូវីដ ១៩ នៅក្នុងពន្ធនាគារត្រូវបានផ្សព្វផ្សាយដូចទៅនឹងករណីរកឃើញវិជ្ជមានកូវីដ ១៩ ក្នុងក្របខ័ណ្ឌផ្សេងទៀតដែរ»។
អង្គការសហប្រជាជាតិនៅតែបន្តតស៊ូមតិ និងផ្តល់ជំនួយបច្ចេកទេសក្នុងការអនុវត្តជម្រើសផ្សេងៗចំពោះជនកំពុងជាប់ឃុំ ជាពិសេសនៅក្នុងបរិបទនៃការរីករាលដាលនៃជំងឺកូវីដ ១៩។ អង្គការសហប្រជាជាតិបានជំរុញដល់រាជរដ្ឋាភិបាលកម្ពុជា គួរតែប្រើមធ្យោបាយចុងក្រោយនូវវិធានការជំនួស ក្រៅពីការដាក់ពន្ធនាគារ ចំពោះជនត្រូវជាប់ឃុំ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារមិនអាចទាក់ទងសុំអត្ថាធិប្បាយបានទេនៅថ្ងៃទី ៣០ ឧសភា។ ប៉ុន្ដែលោកបានប្រាប់ភ្នំពេញប៉ុស្ដិ៍កាលពីថ្ងៃទី ២៧ ឧសភាថា លោកមិនទទួលបានគោលការណ៍ក្នុងការបង្ហាញទិន្នន័យបច្ចុប្បន្នភាព ជនជាប់ឃុំដែលឆ្លងជំងឺកូវីដ ១៩ នោះទេ ហើយរឿងនេះជាសមត្ថកិច្ចរបស់ក្រសួងសុខាភិបាល និងរដ្ឋបាលរាជធានី-ខេត្ដ។
លោកបន្តថា៖ «ប៉ុន្ដែបើព័ត៌មានផ្លូវការរបស់ក្រសួងសុខាភិបាលក៏ដូចជារដ្ឋបាលរាជធានី-ខេត្ដប្រចាំថ្ងៃ ដែលបានចេញផ្សាយនោះជាសមត្ថកិច្ចក្នុងការផ្សាយរបស់គេ»។
លោក អំ សំអាត នាយករងអង្គការ លីកាដូ ថ្លែងថាបច្ចុប្បន្ននេះចំពោះពត៌មានពីស្ថានភាពកូវីដនៅតាមពន្ធនាគារ គឺមិនមានភាពច្បាស់លាស់ និងមិនមានតម្លាភាពទេ ទើបធ្វើឱ្យក្រុមគ្រួសាររបស់ជនជាប់ឃុំមានការបារម្ភពីស្ថានភាពរបស់អ្នកដែលកំពុងជាប់ឃុំ ព្រោះពួកគេមិនបានជួបសួរសុខទុក្ខជាច្រើនខែមកហើយ ក្នុងអំឡុងពេលរីករាលដាលកូវីដ ១៩។ «ដូចនេះខ្ញុំគាំទ្រការលើកឡើងរបស់អង្គការសហប្រជាជាតិ ដែលសូមឱ្យអគ្គនាយកដ្ឋានពន្ធនាគារ និងពន្ធនាគារបង្ហាញនូវព័ត៌មានប្រកបដោយតម្លាភាពពីស្ថានភាពកូវីដ ១៩ ក្នុងពន្ធនាគារ ព្រោះពន្ធនាគារដែលមានភាពចង្អៀតណែនទូទាំងប្រទេសនេះ ជាហានិភ័យខ្ពស់សម្រាប់ស្ថានភាពពន្ធនាគារ»។
ប៉ុន្តែលោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងថា កន្លងមកការបង្ហាញព័ត៌មានអ្នកដែលវិជ្ជមាននៅខាងក្រៅ ពន្ធនាគារជាតំបន់ដែលផ្ទុះកូវីដខ្លាំង គឺដោយសារតែវាមានភាពចាំបាច់ដើម្បីលើកទឹកចិត្ដឱ្យអ្នកពាក់ព័ន្ធមកយកសំណាកទៅពិនិត្យ ដើម្បីទប់ស្កាត់ការឆ្លងកូវីដ។
លោកថា ប៉ុន្ដែចំពោះជនជាប់ឃុំ គឺពួកគេនៅតែជាប់ឃុំ គឺមិនមានទំនាក់ទំនងជាមួយអ្នកខាងក្រៅ ដូច្នេះជាការចាំបាច់ ឬមិនចាំបាច់កម្រិតណា ក្នុងការបង្ហាញអត្តសញ្ញាណ គឺអាស្រ័យទៅលើអគ្គនាយកដ្ឋានពន្ធនាគារជាអ្នកសម្រេច៕
វីដេអូ៖
