ភ្នំពេញៈភ្លុកដំរីចំនួន ៣,៥ តោន ដែលដឹកមកប្រទេសកម្ពុជា ត្រូវបានរឹបអូស ដោយអាជ្ញាធរ ក្នុងប្រទេសម៉ូសំប៊ិចកាលពីចុងសប្តាហ៍មុន។ នេះបើតាមអង្គការ CITES ដែលជាអង្គការអនុសញ្ញា ស្តីពីពាណិជ្ជកម្មអន្តរជាតិចំពោះពពួកសត្វនិងរុក្ខជាតិជិតផុតពូជ។
ព័ត៌មានរបស់អង្គការ CITES គឺផ្អែកទៅលើរបាយការណ៍ ពីក្លឹបសារព័ត៌មានម៉ូសំប៊ិច និងរបាយការណ៍របស់ប្រព័ន្ធផ្សព្វផ្សាយដទៃៗទៀត។ ចំនួនភ្លុកនេះ ដំបូងត្រូវបានរាយការណ៍ថា មានចំនួន ១,៥ តោន ប៉ុន្តែក្រោយមក កើនឡើងដល់ ៣,៥ តោន ដោយលាក់នៅខាងក្រោមដបប្លាស្ទិក។
មន្រ្តីគយ នៅប្រទេសម៉ូសំប៊ិច មិនបានឆ្លើយតប នឹងសំណើសុំអត្ថាធិប្បាយ កាលពីល្ងាចថ្ងៃពុធ ហើយអង្គការ CITES ក៏មិនបានឆ្លើយតប នឹងសំណើសុំអត្ថាអប្បាយដែរ។
ការចុះបង្ក្រាបនេះ បានធ្វើឡើង កាលពីថ្ងៃទី ១២ ខែមេសា នៅកំពង់ផែ Maputo ។ នេះបើតាមការរាយការណ៍របស់ប្រព័ន្ធផ្សព្វផ្សាយ។
លោក អេង ទូច ដែលជាតំណាងមន្រ្តីគយកម្ពុជា មិនអាចទាក់ទងសុំអត្ថាធិប្បាយបានទេ កាលពីថ្ងៃពុធ ខណៈមន្រ្តីមួយចំនួនទៀត នៅក្រសួងបរិស្ថាន ក៏មិនបានឆ្លើយតបនឹងសំណើសុំអត្ថាធិប្បាយផងដែរ។
នាប៉ុន្មានឆ្នាំកន្លងមកនេះ កម្ពុជា ធ្លាប់មានករណីចាប់ភ្លុកដំរីធំៗមួយចំនួន ក្នុងនោះជនជាតិចិនចំនួនពីរនាក់ ត្រូវបានចាប់ខ្លួន ពាក់ព័ន្ធនឹងការរឹបអូសភ្លុកដំរីកាលពីខែសីហា និងខែវិច្ឆិកា ឆ្នាំមុន។
ទោះយ៉ាងណាក្តី មិនមានការចាប់ខ្លួនធ្វើឡើងទេ នៅក្នុងការចាប់ភ្លុកដំរីនាពេលថ្មីៗបំផុតក្នុងប្រទេសកម្ពុជា ដែលបានកើតឡើង កាលពីខែធ្នូ នៅកំពង់ផែស្វយ័តក្រុងព្រះសីហនុ ដែលភ្លុកដំរីជិត ៣០០ ភ្លុកដែលត្រូវបានរត់ពន្ធត្រូវបានចាប់។
ភ្លុកដំរីទាំងនោះ ត្រូវបានរកឃើញ នៅក្នុងកុងតឺន័រ ដែលនាំចូលពីប្រទេសម៉ូសំប៊ិច ដោយក្រុមហ៊ុន Cam Transit Import ដែលជាប់ពាក់ព័ន្ធនឹងការដឹកភ្លុកដទៃៗទៀតដែលរត់ពន្ធមកប្រទេសកម្ពុជា កាលពីអតីតកាល។
ក្រុមអ្នកសង្កេតការ បានហៅប្រទេសកម្ពុជាថា ជាចំណុចផ្ទេរទំនិញ សម្រាប់ការត់ពន្ធភ្លុកដំរីចាប់តាំងពីឆ្នាំ ២០១៣។
កាលពីដើមឆ្នាំ ២០១៧ ក្រសួងបរិស្ថាន បានប្រកាសថា កម្ពុជា ចង់បន្តរឹបអូសភ្លុកដំរីសម្រាប់ការស្រាវជ្រាវវិទ្យាសាស្រ្ត និងតាំងពិព័រពណ៌ បើទោះបីជាវាត្រូវការមានការអនុញ្ញាត ពីតុលាការក៏ដោយ។
សេចក្តីសម្រេចនេះ បានធ្វើឲ្យមានការរិះគន់ ពីក្រុមអ្នកអភិរក្សបរិស្ថាន ដែលបានធ្វើទឡ្ហីករណ៍ជាយូរមកហើយថា វាល្អជាងប្រសិនបើកម្ទេចភ្លុកដែលត្រូវបានរឹបអូសទាំងនោះ ដើម្បីការពារមិនឲ្យមានអ្នករត់ពន្ធនាពេលខាងមុខទៀត ហើយបារម្ភថា ភ្លុកនេះ នឹងមិនមានសុវត្ថិភាព ខណៈវាស្ថិតនៅក្រោមការរក្សាទុកដោយរដ្ឋាភិបាល។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានថ្លែងកាលពីថ្ងៃពុធថា លោកនៅមិនទាន់ប្រាកដនៅឡើយថា តុលាការ នឹងអនុញ្ញាតឲ្យក្រសួងបរិស្ថាន រក្សាទុកភ្លុកនោះ ឬអត់នោះទេ ជាជាងដុតភ្លុកទាំងនោះ ដូចប្រទេសដទៃៗភាគច្រើនបំផុតដែលបានធ្វើ។
លោកបានថ្លែងថា៖ «ចំពោះករណីនេះ ខ្ញុំត្រូវការពិនិត្យជាមួយនាយកដ្ឋានជំនាញ»៕ PS