កំពតៈ បុរសម្នាក់ដែលបម្រើការងារនៅកាស៊ីណូហាទៀងវេហ្គាស នៅច្រកព្រំដែនក្នុងស្រុកកំពង់ត្រាច បានឆេះស្លាប់នៅពេលអគារស្នាក់នៅរបស់បុគ្គលិកនៃកាស៊ីណូនេះបានឆាបឆេះឡើងកាលពីវេលាម៉ោង ៥ ទៀបភ្លឺថ្ងៃពុធ។
លោក ញាណ សារី អធិការរងស្រុកកំពង់ត្រាចទទួលបន្ទុកផ្នែកបង្ការ និងពន្លត់អគ្គិភ័យបានប្រាប់ភ្នំពេញប៉ុស្តិ៍នៅព្រឹកថ្ងៃព្រហស្បតិ៍ថា ជនរងគ្រោះនៅក្នុងហេតុការណ៍នេះឈ្មោះ ឆេង ម៉ាឡៃ អាយុ ២៩ ឆ្នាំជាបុគ្គលិកផ្នែកចែកបៀនៃកាស៊ីណូហាទៀងវេហ្គាស ដែលមានទីតាំងនៅច្រកទ្វារព្រំដែនអន្តរជាតិព្រែកចាកក្នុងឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
លោកបញ្ជាក់ថា៖ «យោងតាមការចុះពិនិត្យជាក់ស្ដែងនៅកន្លែងកើតហេតុ អគ្គិភ័យនោះបណ្ដាលមកពីការផ្ទុះឆ្លងចរន្តអគ្គិសនី»។ «តាមចម្លើយរបស់សាក្សីនៅពេលកើតហេតុ បុគ្គលិកទាំងអស់នាំគ្នារត់ចុះមកក្រោម ប៉ុន្តែគ្មាននរណាម្នាក់ដឹងថាជនរងគ្រោះដេកលង់លក់ក្នុងបន្ទប់រហូតដល់ឆេះស្លាប់នោះទេ។ ក្រោយហេតុការណ៍កើតឡើងសពជនរងគ្រោះត្រូវបានសាច់ញាតិ នាំយកទៅធ្វើបុណ្យនៅស្រុកកំណើតនាភូមិធម្មន័យ ឃុំលំចង់ ស្រុកសំរោង ខេត្តតាកែវ»។
បើតាមលោក សារី មុនពេលក្រុមកម្លាំងនគរបាលពន្លត់អគ្គិភ័យទៅដល់ក្រុមបុគ្គលិកកាស៊ីណូនោះបានគ្រប់គ្រងមិនឲ្យអណ្ដាតភ្លើងឆាបឆេះឆ្លងរាលដាលទៅបន្ទប់ផ្សេងទៀតដោយប្រើបំពង់ពន្លត់អគ្គិភ័យអស់ចំនួន ៦៨ បំពង់។ បន្ទាប់មកក្រុមពន្លត់អគ្គិភ័យបានបាញ់ពន្លត់ដោយប្រើទឹកអស់ ២ រថយន្ត។
កាលពីម្សិលមិញសាច់ញាតិជនរងគ្រោះម្នាក់គឺលោក តាំង តារា អាយុ ៣៣ ឆ្នាំ រស់នៅភូមិធម្មន័យឲ្យដឹងថា ខាងក្រុមហ៊ុនបាននាំយកថវិកា ១ ០០០ ដុល្លារ ចូលបុណ្យសពជនរងគ្រោះ។ «ខ្ញុំមិននៅក្នុងហេតុការណ៍ភ្លើងឆេះនោះទេ ប៉ុន្តែ ខ្ញុំជឿថាប្អូនប្រុសជីដូនមួយរបស់ខ្ញុំ [ម៉ាឡៃ] មិនដេកទ្រមក់ដល់ថ្នាក់ភ្លើងឆេះផ្អើលអស់មនុស្សក្នុងកាស៊ីណូហើយនៅតែមិនដឹងខ្លួនរហូតដល់ឆេះស្លាប់នោះទេ។ ខ្ញុំចង់ឲ្យសមត្ថកិច្ច ស្រាវជ្រាវបន្ថែមទៀតនៅក្នុងករណីនេះ»។
ជុំវិញករណីនេះលោក ម៉ៅ ច័ន្ទមធុរិទ្ធ ស្នងការខេត្តកំពតថ្លែងថា សមត្ថកិច្ចបានចុះធ្វើកោសល្យវិច័យនៅកន្លែងកើតហេតុដោយត្រួតពិនិត្យនូវកាមេរ៉ាសុវត្ថិភាពហើយពុំឃើញមានសកម្មភាពអ្វីចម្លែកនោះទេ ក្រៅពីឃើញជនរងគ្រោះដើរចូលទៅក្នុងបន្ទប់ដេករបស់គាត់នាវេលាម៉ោង ៣ ទៀបភ្លឺក្នុងដំណើរទ្រេតទ្រោតដូចជាមនុស្ស «ស្រវឹងស្រា»។ បន្ទាប់មកនៅម៉ោង ៤ និង ៣០ នាទីទៀបភ្លឺក៏មានហេតុការណ៍ភ្លើងឆេះតែម្ដង ហើយពេលនោះបុគ្គលិកទាំងអស់បានរត់ចេញ លើកលែងតែជនរងគ្រោះមិនឃើញចេញមកក្រៅ។
លោកបញ្ជាក់ថា៖ «ក្រោយការត្រួតពិនិត្យសមត្ថកិច្ចជំនាញបានសន្និដ្ឋានថា ជនរងគ្រោះអាចស្រវឹងស្រា ហើយដេកលង់ក្នុងដំណេកជ្រុលរហូតដល់ថប់ដង្ហើមស្លាប់ នៅពេលមានអគ្គិភ័យឆាបឆេះខ្លាំងពេញក្នុងបន្ទប់នោះ ទើបបានជាជនរងគ្រោះមិនអាចរត់ចេញមកក្រៅបន្ទប់នោះបាន»៕