.jpg)
មន្ត្រីនគរបាលព្យាយាមពន្លត់ភ្លើង។ រូបថត នគរបាល
កំពង់ចាមៈ គំនរកម្ទេចក្រណាត់ជាង ៤០០ តោន ដែលស្តុកនៅក្នុងឃ្លាំងមួយកន្លែងនៅក្នុងភូមិអណ្ដូងច្រុះ ឃុំអំពិល ស្រុកកំពង់សៀម ខេត្តកំពង់ចាម ត្រូវបានឆេះអស់ទាំងស្រុង នៅពេលរសៀលថ្ងៃទី ២៧ ខែ កុម្ភៈ ឆ្នាំ ២០២១ ដោយមិនទាន់ដឹងពីមូលហេតុ។
លោក ឯក វ៉ាន់ដន អធិការស្រុកកំពង់សៀមបានប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា ឃ្លាំងស្តុកកម្ទេចក្រណាត់ដែលរងការឆេះខូចខាតនោះមានទំហំទទឹង ៣០ ម៉ែត្រ និងបណ្ដោយ ៤០ ម៉ែត្រ និងមានកម្ពស់ ៦ ម៉ែត្រ ធ្វើពីថ្មប្រក់សង្ក័សី ជាកម្មសិទ្ធិរបស់ពាណិជ្ជករម្នាក់ឈ្មោះ រ៉ាវុធ អាយុ ៤២ ឆ្នាំ មានទីលំនៅក្នុងទីក្រុងភ្នំពេញ។
លោក វ៉ាន់ដន បានបញ្ជាក់ថា៖ «ឃ្លាំង និងកម្ទេចសាច់ក្រណាត់ជាង ៤០០ តោន រួមទាំងឧបករណ៍ សម្ភារប្រើប្រាស់នៅក្នុងឃ្លាំងនោះត្រូវបានឆេះខូចខាតទាំងស្រុង ដែលគិតជាសាច់ប្រាក់អស់ជាង ២០ ម៉ឺនដុល្លារ»។
បើតាមលោក វ៉ាន់ដន មកទល់ពេលនេះក្រុមមន្ត្រីនគរបាលជំនាញនៅមិនទាន់ដឹងពីមូលហេតុនៃការឆេះនេះនៅឡើយទេ ខណៈសមត្ថកិច្ចជំនាញកំពុងស្រាវជ្រាវ។ ទោះជាបែបណាក្ដី ពុំមានពលរដ្ឋណាម្នាក់រងរបួស ឬស្លាប់នៅក្នុងហេតុការណ៍ភ្លើងឆេះនេះឡើយ។
ជុំវិញករណីនេះលោក រ៉ា វុធ ម្ចាស់ទីតាំងឃ្លាំងស្តុកកម្ទេចក្រណាត់ មិនអាចទាក់ទងសុំការពន្យល់បានទេកាលពីម្សិលមិញ។
ចំណែកលោក យ៉ន ឌីន ប្រធានការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលខេត្តកំពង់ចាមបានប្រាប់ ភ្នំពេញ ប៉ុស្តិ៍ថា ដោយសារតែឃ្លាំងស្តុកកម្ទេចក្រណាត់នោះ មានកម្ទេចក្រណាត់ច្រើនសន្ធឹកសន្ធាប់ខ្លាំងពេកបានធ្វើឲ្យកំសួលភ្លើងឆាបឆេះខ្លាំង និងមានផ្សែងក្រាស់ ព្រមទាំងមានក្លិនឈ្ងៀមខ្លាំងពិបាកនៅក្នុងការពន្លត់។
លោក ឌីន ថ្លែងថា៖ «កម្លាំងនគរបាលពន្លត់អគ្គិភ័យយើង មកពីគ្រប់បណ្ដាអង្គភាពសរុប ១៥០ នាក់ បានប្រតិបត្តិការរួមគ្នាពន្លត់អគ្គិភ័យនេះ ដោយប្រើរយៈពេលអស់ ៧ ម៉ោង ទើបអាចពន្លត់ភ្លើងបានសម្រេច»។
បើតាមលោក ឌីន នៅក្នុងប្រតិបត្តិការពន្លត់អគ្គិភ័យនេះកម្លាំងសមត្ថកិច្ចជំនាញបានប្រើរថយន្តអេស្កាវ៉ាទ័រ ១ គ្រឿង ដើម្បីកាយដីកាត់មុខភ្លើង កុំឲ្យឆេះរាលដាលដល់ផ្ទះប្រជាពលរដ្ឋនៅក្បែរនោះ និងបានប្រើរថយន្តពន្លត់អគ្គិភ័យចំនួន ១១ គ្រឿង ដោយប្រើប្រាស់ទឹកអស់ ៤៩៥ ម៉ែត្រគុប៕
