កំពង់ចាមៈ ដូនជីម្នាក់បានឆេះស្លាប់នៅក្នុងឧប្បទ្ទវហេតុភ្លើងឆេះសាលាសំណាក់ធម៌មួយក្នុងបរិវេណវត្តសុវណ្ណរង្សី នៅភូមិអង្គរបានទី ៦ ឃុំអង្គរបាន ស្រុកកងមាសកាលពីវេលាម៉ោង ៤ ទៀបភ្លឺ ថ្ងៃអាទិត្យ។
លោក ជា ជួន អធិការស្រុកកងមាសបានប្រាប់ភ្នំពេញប៉ុស្តិ៍កាលពីថ្ងៃចន្ទថា ដូនជីរងគ្រោះឈ្មោះ សន លី អាយុ ៧៦ ឆ្នាំស្នាក់នៅបន្ទប់សាលាសំណាក់ធម៌នៃវត្តសុវណ្ណរង្សី។ លោកបន្តថា តាមការបំភ្លឺរបស់ព្រះចៅអធិការវត្ត និងអ្នកភូមិចំណុះជើងវត្តមុនពេលកើតហេតុ ដូនជីរងគ្រោះស្នាក់នៅក្នុងបន្ទប់សាលាសំណាក់ធម៌នោះតែម្នាក់ឯងប៉ុណ្ណោះ ហើយសាលាសំណាក់ធម៌នោះមិនមានការតភ្ជាប់ខ្សែបណ្ដាញចរន្តអគ្គិសនីប្រើប្រាស់នោះទេ គឺដូនជីរងគ្រោះប្រើប្រាស់ទានអុជបំភ្លឺនៅពេលយប់។
លោកបញ្ជាក់ថា៖ «ក្រោយពេលដឹងថា មានភ្លើងឆេះសាលាសំណាក់ធម៌ ព្រះសង្ឃក្នុងវត្តរួមទាំងអ្នកភូមិចំណុះជើងវត្តបាននាំគ្នាទៅជួយដូនជីរងគ្រោះដែរ តែទ្វារសាលាសំណាក់ធម៌នោះត្រូវបានចាក់គន្លឹះជាប់ពីខាងក្នុង។ ទម្រាំសមត្ថកិច្ចមូលដ្ឋានទៅដល់រកវិធីគាស់ទម្លុះទ្វារចូលទៅខាងក្នុងបាន ដូនជីរងគ្រោះបានឆេះស្លាប់នៅក្នុងបន្ទប់នៃសាលាសំណាក់ធម៌នោះបាត់ទៅហើយ»។ លោក ជួន សន្និដ្ឋានថា គ្រោះអគ្គិភ័យនេះបង្កឡើងដោយសាភ្លើងទៀនដែលដូនជីរងគ្រោះបានដុតបំភ្លឺនៅពេលយប់។
លោក យ៉ន ឌីន ប្រធានការិយាល័យនគរបាលបង្ការ និងពន្លត់អគ្គិភ័យខេត្តកំពង់ចាមប្រាប់ភ្នំពេញប៉ុស្តិ៍ថា៖ «ជាការពិតណាស់ការអុជភ្លើងទានធូបមិនប្រយ័ត្នអាចបង្កឲ្យមានគ្រោះអគ្គិភ័យកើតឡើងបាន ប៉ុន្តែយើងចាំបាច់ត្រូវចុះពិនិត្យស្រាវជ្រាវបន្ថែមទៀតនៅកន្លែងកើតហេតុ ដោយផ្អែកលើបទដ្ឋានបច្ចេកទេសវិទ្យាសាស្ត្រចៀសវាងការសន្និដ្ឋានតែលើបបូរមាត់»។
ការស្លាប់របស់ដូនជីរងគ្រោះឈ្មោះ សន លី នៅពេលនេះបានធ្វើឲ្យតួលេខនៃចំនួនអ្នកស្លាប់ដោយករណីគ្រោះអគ្គិភ័យក្នុងរយៈពេលជិត ២ ខែដើមឆ្នាំ ២០២០ នេះបានកើនដល់ ៦ នាក់។
លោក នេត វន្ថា ប្រធាននាយកដ្ឋានបង្ការទប់សង្កាត់ និង ពន្លត់អគ្គិភ័យនៃអគ្គស្នងការដ្ឋាននគរបាលជាតិបានប្រាប់ភ្នំពេញប៉ុស្តិ៍នៅព្រឹកថ្ងៃចន្ទថា គិតត្រឹមពីដើមខែមករាមកទល់នឹងថ្ងៃទី ២៤ ខែកុម្ភៈ ឆ្នាំ ២០២០ នេះគ្រោះអគ្គិភ័យបានកើតឡើងចំនួន ១២៧ លើកបានសម្លាប់ជីវិតមនុស្សចំនួន ៦ នាក់ និងបង្ករបួសចំនួន ២ នាក់ និងបានបង្កការឆេះខូចខាតផ្ទះប្រជាពលរដ្ឋសរុប ១២០ ខ្នង និង តូបលក់ដូរ សរុប ៤៦ តូប។
លោកថ្លែងថា កត្តាដែលនាំឲ្យកើតមានគ្រោះអគ្គិភ័យច្រើនជាងគេគឺបណ្ដាលមកពីការផ្ទុះឆ្លងចរន្តអគ្គិសនីចំនួន ៤០ ភាគរយ ខណៈផ្ដើមចេញពីកត្តាភ្លើង ចង្ក្រាន ទាន ធូប និង ការបោះចោលនូវកន្ទុយភ្លើងផ្សេងៗដោយខ្វះការប្រុងប្រយ័ត្នចំនួន ៣៩ ភាគរយ និង ២១ ភាគរយទៀត គឺមិនទាន់ដឹងពីមូលហេតុ និងកំពុងស្ថិតក្រោមការស៊ើបអង្កេត៕