.jpg)
គម្រោងប្លង់មជ្ឈមណ្ឌលហ្វឹកហ្វឺនកងរាជអាវុធហត្ថភ្នំជំរាយខ្នាតអន្តរជាតិដែលកំពុងត្រូវបានសាងសង់នៅខេត្តកំពង់ឆ្នាំង។ រូបថត FN
កំពង់ឆ្នាំងៈ មជ្ឈមណ្ឌលហ្វឹកហ្វឺនកងរាជអាវុធហត្ថភ្នំជំរាយ ខ្នាតអន្តរជាតិ ដែលកំពុងសាងសង់លើផ្ទៃដីទំហំ ៥ ពាន់ហិកតា ក្នុងស្រុកសាមគ្គីមានជ័យ ខេត្តកំពង់ឆ្នាំង គឺជាទីលានដ៏សំខាន់មួយដែលនឹងចូលរួមក្នុងការពង្រឹងវិស័យការពារជាតិតាមរយៈ ការពង្រឹងសមត្ថភាពកងទ័ព។ នេះជាការអះអាងរបស់អគ្គមេបញ្ជាការរង លោក សៅ សុខា និងលោក ហ៊ុន ម៉ាណែត។
លោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសលោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោក វង្សី វិស្សុត រដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ ថ្លែងបែបនេះក្នុងពេលចុះត្រួតពិនិត្យការងារសាងសង់ហេដ្ឋារចនាសម្ព័ន្ធមជ្ឈមណ្ឌលហ្វឹកហ្វឺននេះកាលពីថ្ងៃទី ២៦ ខែតុលា នៅស្រុកសាមគ្គីមានជ័យ ខេត្តកំពង់ឆ្នាំង។
លោក ហ៊ុន ម៉ាណែត ថ្លែងថា៖ «សារៈសំខាន់នៃមជ្ឈមណ្ឌលហ្វឹកហ្វឺននេះ គឺចូលរួមក្នុងការពង្រឹងវិស័យការពារជាតិតាមរយៈការពង្រឹងសមត្ថភាពកងទ័ព។ បើយើងនិយាយពីការពង្រឹងសមត្ថភាពកងទ័ពគឺត្រូវនិយាយពីការហ្វឹកហ្វឺន ដែលពឹងផ្អែក ១ ផ្នែកធំទៅលើទីតាំងហ្វឹកហ្វឺន និងហេដ្ឋារចនាសម្ព័ន្ធបម្រើឱ្យការហ្វឹកហ្វឺន»។
បើតាមលោក ហ៊ុន ម៉ាណែត មជ្ឈមណ្ឌលហ្វឹកហ្វឺននេះមិនមែនសម្រាប់តែការប្រកួតកីឡាជាតិ និងអន្តរជាតិទេ ប៉ុន្ដែវានឹងក្លាយទៅជាទីលានសម្រាប់ការហ្វឹកហ្វឺនថ្នាក់ជាតិ ដែលបម្រើក្នុងការហ្វឹកហ្វឺនកងយោធពលខេមរភូមិន្ទ។ ថ្ងៃក្រោយកន្លែងនេះ អង្គភាពផ្សេងៗ មិនថាកងរាជអាវុធហត្ថទេ អង្គភាពថ្មើរជើងរបស់កងទ័ពជើងគោក អង្គភាពទ័ពជើងទឹក ជើងអាកាស អាចប្រើប្រាស់ទីតាំងហ្វឹកហ្វឺននេះសម្រាប់រៀននូវយុទ្ធវិធីមួយចំនួនបាន។
មេទ័ពរូបនេះបន្ថែមថា ការអភិវឌ្ឍមជ្ឈមណ្ឌលហ្វឹកហ្វឺនគឺជាការប្រមូលផ្ដុំដ៏មានសារៈសំខាន់ណាស់ ព្រោះកាលពីមុនទីតាំងហ្វឹកហ្វឺន គឺមាននៅតាមអង្គភាពនីមួយៗ។ ប៉ុន្ដែឥឡូវបានរៀបចំជាទីលានហ្វឹកហ្វឺនថ្នាក់ជាតិ។
លោកថា៖ «វាចំណេញទី១ គឺការប្រមូលធនធានទាំងអស់នៅក្នុងការកសាងឱ្យស្ដង់ដាមួយដែលយើងអាចប្រើប្រាស់បាន។ ទី២ គឺប្រមូលផ្ដុំនូវធនធានមូលដ្ឋានសម្រាប់ហ្វឹកហ្វឺន ទាំងគ្រូ ទាំងហេដ្ឋារចនាសម្ព័ន្ធ និងគ្រឿងបំពាក់ ដែលធនធានប្រទេសយើងមិនសម្បូរដូចប្រទេសមហាអំណាចដែលអាចបំពាក់គ្រប់កន្លែងទេ»។
«ដូច្នេះការប្រមូលផ្ដុំនៃការបំពាក់ និងការធានាគឺជាកិច្ចការសំខាន់នៃការធ្វើឱ្យការងារហ្វឹកហ្វឺនសម្រាប់ទូទាំងកងទ័ពរបស់យើងបានជោគជ័យប្រកបដោយប្រសិទ្ធភាពខ្ពស់»។ នេះជាការបញ្ជាក់របស់លោក ហ៊ុន ម៉ាណែត។
សម្រាប់ការកសាងលោក សៅ សុខា ក៏បានអរគុណដល់សប្បុរសជនចំពោះការចូលរួមក្នុងការកសាងមជ្ឈមណ្ឌលនេះឡើងតាំងពីការចាប់ផ្ដើមទីតាំងនេះនៅជាព្រៃនៅឡើយ។ ឥឡូវប្រែក្លាយទៅជាកន្លែងមួយដែលមានការចាប់អារម្មណ៍ និងសម្រាប់ផលប្រយោជន៍យូរអង្វែងរបស់ប្រទេសកម្ពុជា។
លោកមានប្រសាសន៍ថា៖ «សម្រាប់កងរាជអាវុធហត្ថ គឺមានមោទនភាព និងសប្បាយរីករាយ ដោយសារទទួលបានការជឿទុកចិត្ដ។ សារៈសំខាន់នៃការកសាងមជ្ឈមណ្ឌលហ្វឹកហ្វឺន មិនមែនសម្រាប់តែរយៈពេលចំពោះមុខនេះទេ ប៉ុន្ដែគឺសម្រាប់រយៈពេលវែង ហើយនិងយុទ្ធសាស្ដ្រដ៏យូរអង្វែងសម្រាប់ប្រទេសកម្ពុជា»។
ក្នុងឱកាសនោះលោក វង្សី វិស្សុត លើកឡើងដែរថា អ្វីដែលរដ្ឋបានចំណាយមកលើការកសាងហេដ្ឋារចនាសម្ព័ន្ធទីតាំងហ្វឹកហ្វឺននេះពិតជាប្រកបដោយការពេញចិត្ដមានប្រសិទ្ធភាព។ ការសាងសង់ប្រព្រឹត្តទៅតាមផែនការមានគុណភាពខ្ពស់ មានស្ដង់ដាល្អ ដែលជាការរួមចំណែកមួយក្នុងការពង្រឹងគុណភាព សមត្ថភាពកងទ័ព ជាពិសេសកងរាជអាវុធហត្ថ។
លោកថ្លែងថា៖ «ថ្ងៃក្រោយទៅទីតាំងនេះ គឺជាកន្លែងហ្វឹកហ្វឺនមួយធំមានស្ដង់ដាខ្ពស់ដែលអាចជួយឱ្យកងទ័ពរបស់យើងកាន់តែមានគុណភាព សមត្ថភាពសម្រាប់បំពេញបេសកកម្មជូនជាតិ។ ការពារអធិបតេយ្យជាតិ បូរណភាពទឹកដី ការងារការពារសន្តិសុខផ្ទៃក្នុងជាតិ ឬការងារជួយសង្គ្រោះដល់ប្រជាពលរដ្ឋពីគ្រោះមហន្តរាយនានា»។
បើតាមលោក វង្សី វិស្សុត ថវិការដ្ឋសម្រាប់ចំណាយក្នុងការកសាងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជំរាយសរុបប្រមាណ ១៣ លានដុល្លារ។ ក្រៅពីនេះនៅមានថវិកាជំនួយពីដៃគូអភិវឌ្ឍន៍ជាតិ និងអន្តរជាតិជាច្រើនថែមទៀតផងដែរ។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសប្រាប់ភ្នំពេញប៉ុស្ដិ៍ ពីម្សិលមិញថាតាមគម្រោងការស្ថាបនា មជ្ឈមណ្ឌលហ្វឹកហ្វឺននេះ ហេដ្ឋារចនាសម្ព័ន្ធនៅក្នុងនេះទាំងអស់មិនអាចកំណត់ថាឱ្យហើយទាំងស្រុងទេ។ ប៉ុន្ដែអ្វីដែលសម្រាប់ការហ្វឹកហ្វឺនមានដូចជាអគារពហុសិក្សា ថ្នាក់រៀន កន្លែងផលិតទឹកស្អាត និងកន្លែងស្នាក់នៅរបស់នាយទាហាន គឺបានធ្វើរួចរាល់អស់ហើយ។
លោកបានថ្លែងថា៖ «យើងចាប់ផ្ដើមសិក្សាការស្ថាបនា មជ្ឈមណ្ឌលហ្វឹកហ្វឺននេះដំបូងនៅឆ្នាំ ២០០៩ រហូតដល់ឆ្នាំ ២០១៣ គឺយើងចាប់ផ្ដើមសាងសង់ឡើងជាបន្តបន្ទាប់តែម្ដង។ ដូច្នេះ យើងធ្វើយ៉ាងណាឱ្យបានចប់រួចរាល់នៅមុនដំណាច់ឆ្នាំ ២០២៣»៕
វីដេអូ៖
