.jpg)
លោក ជាម ច័ន្ទសោភ័ណ អភិបាលខេត្តត្បូងឃ្មុំ ថ្លែងក្នុងសន្និសីទកាលពីម្សិលមិញ។ ហ៊ាន រង្សី
ត្បូងឃ្មុំៈ រដ្ឋបាលខេត្ដត្បូងឃ្មុំគ្រោងនឹងសាងសង់ មណ្ឌលថែទាំមនុស្សចាស់ មណ្ឌលស្តារនីតិសម្បទា និងមណ្ឌលភូមិកុមារលើផ្ទៃដីដែលបានត្រៀមទុកទំហំ ២៧ ៣៨០ ម៉ែត្រការ៉េក្នុងឆ្នាំ ២០២១ នៅពេលផុតជំងឺកូវីដ១៩ ដើម្បីបម្រើសុខុមាលភាពសង្គមដល់ប្រជាពលរដ្ឋ។ នេះបើតាមលោកអភិបាលខេត្ត។
ថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្តរបស់រដ្ឋបាលខេត្តត្បូងឃ្មុំ» រៀបចំដោយអង្គភាពអ្នកនាំពាក្យរាជរដ្ឋាភិបាលកាលពីថ្ងៃទី ២៥ មិថុនានៅទីស្តីការគណៈរដ្ឋមន្ត្រី លោក ជាម ច័ន្ទសោភ័ណ អភិបាលខេត្តត្បូងឃ្មុំថ្លែងថា ខេត្ដត្បូងឃ្មុំនឹងរៀបចំមណ្ឌលថែទាំមនុស្សចាស់ មណ្ឌលស្តារនីតិសម្បទា និងមណ្ឌលភូមិកុមារ (SOS) ព្រមទាំងហេដ្ឋារចនាសម្ព័ន្ធផ្សេងៗដើម្បីបម្រើឱ្យសុខុមាលភាពសង្គមលើផ្ទៃដីទំហំ ២៧ ៣៨០ ម៉ែត្រការ៉េ។
បើតាមលោកអភិបាលខេត្តគឺលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាជាអ្នកដែលបានរៀបចំទីតាំងឲ្យមានការសាងសង់មណ្ឌលទាំងនេះ។ លោកក៏បានសម្តែងនូវអំណរគុណដល់លោក វង សូត។
លោក ជាម ច័ន្ទសោភ័ណ ថ្លែងថា៖ «យើងមានទីតាំងរួចហើយ ប៉ុន្ដែចំពោះសំណង់អគារមិនទាន់បានសាងសង់នៅឡើយទេ។ ប៉ុន្ដែមិនយូរទេ ឯកឧត្ដម វង សូត នឹងសាងសង់អគារនេះនៅក្នុងខេត្ដត្បូងឃ្មុំរបស់យើង។ នេះក៏ជាសមិទ្ធផលដ៏ធំមួយទៀតសម្រាប់ខេត្ដត្បូងឃ្មុំរបស់យើងផងដែរ»។
បើតាមលោកអភិបាលខេត្ដ ជនពិការក្រីក្រក្នុងសហគមន៍ក្នុងខេត្ដត្បូងឃ្មុំ ត្រូវបានយកចិត្តទុកដាក់ពីរដ្ឋាភិបាល និងលើកកម្ពស់ផ្នែកជីវភាពជូនជនពិការក្រីក្រក្នុងសហគមន៍បានចំនួន ២០០៩ នាក់ នៅស្រុកពញាក្រែក និងស្រុកមេមត់។ ចំណែកស្រី្តមានផ្ទៃពោះ និងកុមារអាយុក្រោម ២ ឆ្នាំក្នុងគ្រួសារក្រីក្រ ដែលទទួលការឧបត្ថម្ភពីកម្មវិធីឧបត្ថម្ភ សាច់ប្រាក់ជូនស្រី្តមានផ្ទៃពោះ និងកុមារអាយុក្រោម ២ ឆ្នាំចាប់ពីថ្ងៃទី ១ កុម្ភៈ ឆ្នាំ ២០២០ ដល់ថ្ងៃទី ២២ មិថុនា ឆ្នាំ ២០២០ សរុបចំនួន ១ ៥៨៥ នាក់ចំណាយថវិកាប្រមាណ ៥២៧ លានរៀល។
សេចក្ដីប្រកាសព័ត៌មានរបស់ខេត្ដត្បូងឃ្មុំក្នុងសន្និសីទសារព័ត៌មានខាងលើ ឱ្យដឹងថា ខេត្ដនេះមានក្រុង ១ និងស្រុក ៦។ ឃុំ-សង្កាត់ចំនួន ៦៤ និងភូមិចំនួន ៨៧៣ ភូមិ ប្រជាពលរដ្ឋសរុបចំនួន ១៩៦ ០៦៥ គ្រួសារ។
លោក អ៊ុន លំអង ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា បញ្ជាក់ពីម្សិលមិញថាបច្ចុប្បន្នទីតាំងសាងសង់មណ្ឌលថែទាំមនុស្សចាស់ មណ្ឌល ស្តារនីតិសម្បទា គឺទើបតែធ្វើរបងប៉ុណ្ណោះ។ ចំពោះការសាងសង់អគារអាចនឹងពន្យារពេលដល់ឆ្នាំ ២០២១ ឬរហូតដល់ការរីករាលដាលជំងឺកូវីដ ១៩ មានភាពស្ងប់ស្ងាត់ទៅវិញ។
លោកថ្លែងថា៖ «យើងផ្អាកការសាងសង់អគារ មណ្ឌលថែទាំមនុស្សចាស់សិន ពីព្រោះបញ្ហាជំងឺកូវីដ១៩។ មណ្ឌលនេះ យើងសាងសង់ឡើងដើម្បីថែទាំដល់មនុស្សចាស់ដែលពួកគាត់មានជីវភាពខ្វះខាត និងទីទាល់ក្រ ដោយពួកគាត់អាចចូលមកស្នាក់នៅក្នុងមណ្ឌលនេះបាន»។
លោក លំអង ឱ្យដឹងថា មនុស្សចាស់សរុបដែលបានចុះឈ្មោះក្នុងបញ្ជីសមាគមមនុស្សចាស់នៅទូទាំង ៦៤ ឃុំ-សង្កាត់ និង ៨៧៣ ភូមិមានជាង ១ ម៉ឺននាក់។
លោក តូច ចាន់នី អ្នកនាំពាក្យក្រសួងសង្គមកិច្ចអតីតយុទ្ធជន និងយុវនីតិសម្បទាបានថ្លែងពីម្សិលមិញដែរថា ជាទូទៅក្រសួងសង្គមកិច្ចមានទីតាំងដី សម្រាប់ទុកឱ្យសាងសង់ហេដ្ឋារចនាសម្ព័ន្ធផ្សេងក្នុងវិស័យសង្គមកិច្ចតាមបណ្ដាខេត្ដនានា។
លោកថ្លែងថា៖ «បច្ចុប្បន្នក្រសួងកំពុងបន្តសាងសង់មណ្ឌលបណ្ដុះបណ្ដាលអ្នកថែទាំមនុស្សចាស់មានទីតាំងនៅរាជធានីភ្នំពេញ។ ចំពោះមណ្ឌលថែទាំមនុស្សចាស់គឺជាគម្រោងដែលបានស្នើឡើងដោយរដ្ឋបាលខេត្ដមកកាន់ក្រសួង។ ប៉ុន្ដែបច្ចុប្បន្នក្រសួងមិនមានគម្រោងធ្វើមជ្ឈមណ្ឌលនេះនៅគ្រប់រាជធានីខេត្ដនៅឡើយទេ»៕
