.jpg)
មណ្ឌល ស្ដានីតិសម្បទា និង បន្សាប គ្រឿងញៀននឹងត្រូវបើកផ្តល់សេវាឡើងវិញ ក្រោយពីបិទបញ្ចប់ព្រឹត្តិការណ៍ ២០ កុម្ភៈនៃការរីករាលដាលជំងឺកូវីដ១៩ ។ ហេង ជីវ័ន
ភ្នំពេញ៖ គ្រប់មណ្ឌលស្ដានីតិសម្បទា និងបន្សាបគ្រឿងញៀនទាំងអស់នឹងត្រូវបើកផ្តល់សេវាស្តារនីតិសម្បទាអ្នកញៀនគ្រឿងញៀនឡើងវិញ ក្រោយពីបិទបញ្ចប់ព្រឹត្តិការណ៍ ២០ កុម្ភៈនៃការរីករាលដាលជំងឺកូវីដ១៩ ដែលមិនទាន់អាចដឹងថានឹងត្រូវបញ្ចប់នៅពេលណា។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទានៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់ភ្នំពេញប៉ុស្តិ៍នៅ ថ្ងៃទី ០៥ ខែឧសភាថា ចាប់តាំងពីមានព្រឹត្តិការណ៍ ២០ កុម្ភៈ នៃការឆ្លងរីករាលដាលនៃជំងឺកូវីដ១៩មក គ្រប់មណ្ឌលស្ដារនីតិសម្បទា និង បន្សាបគ្រឿងញៀនទាំងអស់ក្នុងប្រទេសកម្ពុជាត្រូវបានបិទខ្ទប់ មិនទទួល អ្នកញៀន និង អ្នកប្រើប្រាស់គ្រឿងញៀន ថ្មីនោះទេ។
ចំណែកក្រុមគ្រួសារសាច់ញាតិអ្នកដែលត្រូវបានបញ្ជូនទៅកាន់មណ្ឌលទាំងនោះ ក៏មិនត្រូវបានអនុញ្ញាតឲ្យចូលជួបសួរសុខទុក្ខផងដែរ។
លោកថ្លែងថា៖ «ការបិទខ្ទប់មិនទទួលអតិថិជនថ្មី និងមិនអនុញ្ញាតឲ្យមានការចូលជួបសួរសុខទុក្ខនេះ គឺដើម្បីបង្ការទប់ស្កាត់ការរីករាលដាលនៃជំងឺកូវីដ១៩ ដល់អ្នកដែលកំពុងទទួលនូវសេវាបន្សាបគ្រឿងញៀន នៅក្នុងមណ្ឌលស្ដារនីតិសម្បទា និងបន្សាបគ្រឿងញៀនទាំងអស់របស់យើង»។
លោកបានបន្តថា៖ «នៅពេលប្រមុខរដ្ឋាភិបាល បិទបញ្ចប់នូវព្រឹត្តិការណ៍ ២០ កុម្ភៈដ៏គ្រោះថ្នាក់នៃការឆ្លងរាលដាលជំងឺកូវីដ១៩ នេះ គ្រប់មណ្ឌលទាំងអស់នឹងត្រូវបើកឲ្យទទួលអតិថិជនថ្មី និង ការជួបសួរសុខទុក្ខសាច់ញាតិឡើងវិញ»។
ក្រុមគ្រួសារបានសម្ដែងក្ដីបារម្ភអំពីការហូបចុករបស់កូន និងសមាជិកគ្រួសារពួកគាត់ ដែលកំពុងស្នាក់នៅក្នុងមណ្ឌលបន្សាបគ្រឿងញៀនទាំងនោះ។
អ្នកស្រី គៀត ថា អាយុ ៥៦ ឆ្នាំមានទីលំនៅក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ បានប្រាប់ភ្នំពេញប៉ុស្តិ៍ថា ដោយសារមិនអាចទ្រាំមើលកូនប្រុសរបស់គាត់ម្នាក់ ញៀនគ្រឿងញៀនខ្លាំងពេក គាត់បានសម្រេចចិត្ត ស្នើសុំមន្ត្រីនគរបាលក្នុងមូលដ្ឋាន ជួយអន្តរាគមន៍ចាប់បញ្ជូនកូនប្រុស ម្នាក់ ទៅកាន់មណ្ឌលឱកាសខ្ញុំ ដើម្បីជួយអប់រំ និង បន្សាបគ្រឿងញៀន។
មកទល់ពេលនេះ កូនប្រុសអ្នកស្រីបានស្នាក់នៅក្នុងមណ្ឌលនោះអស់រយៈពេលជិត ៣ ខែហើយ។
កន្លងមក ខាងមណ្ឌលបានអនុញ្ញាតឲ្យអ្នកស្រីបានជួបសួរសុខទុក្ខកូន បានម្ដងទៅ ២ ដងក្នុងមួយខែ ប៉ុន្តែក្រោយព្រឹត្តិការណ៍ ២០ កុម្ភៈ ដែលមានឆ្លងរីករាលដាលជំងឺកូវីដ១៩ជាសហគមន៍មក ខាងមណ្ឌលបានបិទមិនឲ្យអ្នកស្រី ចូលទៅជួបសួរសុខទុក្ខទៀតទេ ព្រោះគេបារម្ភខ្លាចឆ្លងជំងឺកូវីដពីសាច់ញាតិ ដែលទៅសួរសុខទុក្ខ។
អ្នកស្រីបានបន្តថា៖ «មិនដឹងថាពេលនេះ កូនប្រុសរបស់ខ្ញុំមានអាហារហូបចុកគ្រប់គ្រាន់ ឬយ៉ាងណា នោះទេ ព្រោះខ្ញុំឥឡូវក៏ជួបបញ្ហាខ្វះខាតក្នុងជីវភាពដែរ មិនបានផ្ញើអ្វីទៅឲ្យកូនខ្ញុំដូចមុននោះទេ។ ខ្ញុំសង្ឃឹមថា កូនប្រុសខ្ញុំម្នាក់ហ្នឹង នឹងក្លាយជាកូនល្អ ពលរដ្ឋល្អ ដោយវៀរចាកពីគ្រឿងញៀន ក្រោយពីត្រឡប់ចេញពីមណ្ឌលនេះ»។
អ្នកស្រី ចាន់ ដានី នាយិការមណ្ឌលឱកាសខ្ញុំ បានប្រាប់ភ្នំពេញប៉ុស្តិ៍ថា មកទល់ពេលនេះ មណ្ឌលមានរបបអាហារគ្រប់គ្រាន់ សម្រាប់ផ្ដល់ជូនអ្នកដែលកំពុងស្នាក់នៅ ដើម្បីទទួលសេវាស្ដារនីតិសម្បទា និងបន្សាបគ្រឿងញៀនទាំងអស់នៅក្នុងមណ្ឌលនេះ មិនឲ្យមានខ្វះខាតនោះទេ។
អ្នកស្រីថ្លែងថា៖ «នៅទីនេះយើងមានរបបអាហារ ៣ ពេលសម្រាប់ពួកគាត់ ថ្វីដ្បិតតែវាមិនបានឆ្ងាញ់រាល់ថ្ងៃ ប៉ុន្តែក៏សមរម្យដែរ មិនខ្វះខាតនោះទេ។ សូមអាណាព្យាបាលទាំងអស់កុំបារម្ភអំពីរឿងនេះ»។
បើតាមអ្នកស្រី ដានី ដោយសារតែមណ្ឌលឱកាសខ្ញុំស្ថិតក្រោមការគ្រប់គ្រងរបស់រដ្ឋបាលរាជធានី ភ្នំពេញ និង មន្ទីរសង្គមកិច្ចរាជធានីភ្នំពេញ ដូចនេះគ្រប់ការចំណាយទាំងអស់ នៅក្នុងមណ្ឌលដែលរាប់បញ្ចូលទាំងរបបអាហារ ថ្នាំព្យាបាល និងថ្នាំបន្សាបគ្រឿងញៀន សម្រាប់អ្នកដែលមកទទួលសេវ៉ា កាត់ផ្ដាច់គឿងញៀននៅទីនេះ រួមទាំងសម្ភារៈប្រើប្រាស់នៅក្នុងមណ្ឌល សម្រាប់បណ្ដុះបណ្ដាលស្ដារនីតិសម្បទាក៏ដូចជាថ្លៃទឹកភ្លើង គឺជាបន្ទុករបស់រដ្ឋ។
ថ្មីៗនេះខាងមណ្ឌលក៏ទទួលបានការឧបត្ថម្ភជា អង្ករ គ្រឿងបរិភោគឧបភោគ និងម៉ាស់ការពារការឆ្លងជំងឺកូវីដ១៩ និងអាល់កុលជាច្រើនពីអាជ្ញាធររាជធានីភ្នំពេញផងដែរ។
ប៉ុន្តែសម្រាប់មណ្ឌលស្ដារនីតិសម្បទា ព្យាបាលអ្នកញៀនគ្រឿងញៀន ឌីធីអេ ដែលជាមណ្ឌលឯកជនដ៏ធំមួយមានទីតាំងក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ការចំណាយទាំងអស់ គឺអាស្រ័យលើការជួយឧបត្ថម្ភគាំទ្រពីអាណាព្យាបាលរបស់ជនដែលត្រូវបានបញ្ជូនទៅអប់រំ ព្យាបាល បន្សាបគ្រឿងញៀន។ ដូច្នេះ ធ្វើឲ្យជួបការលំបាកខ្លះខាងផ្នែកហិរញ្ញវត្ថុ ក្នុងអំឡុងពេលនៃការរីករាលដាលនៃជំងឺកូវីដ១៩ ក្នុងព្រឹត្តិការណ៍ ២០ កុម្ភៈ។
លោក ហង្ស ប្រសើរ នាយកចាត់ការទូទៅនៃមណ្ឌលស្ដារនីតិសម្បទា ព្យាបាលអ្នកញៀនគ្រឿងញៀន ឌីធីអេ បានប្រាប់ភ្នំពេញប៉ុស្តិ៍ថា នៅពេលនេះ អ្នកដែលកំពុងស្នាក់នៅ ដើម្បីទទួលយកសេវាព្យាបាល និងបន្សាបគ្រឿងញៀនក្នុងមណ្ឌលរបស់លោកមានជាង ៣០០ នាក់ ។
ប៉ុន្តែអាណាព្យាបាលរបស់ពួកគេមួយចំនួនបានស្នើសុំពន្យារពេលការបង់ថ្លៃសេវាមកខាងមណ្ឌលរបស់លោកជាបណ្ដោះអាសន្ន ដោយសារមានបញ្ហាក្នុងជីវភាព ក្រោយពីរដ្ឋាភិបាលបានប្រកាសបិទខ្ទប់ រាជធានីភ្នំពេញ និងក្រុងតាខ្មៅ ដើម្បីបង្ការទប់ស្កាត់ ការរីករាលដាលនៃជំងឺកូវីដ១៩។
លោកប្រសើរបានថ្លែងថា៖ «ជាការពិតយើងមានបញ្ហាខ្លះផ្នែកហិរញ្ញវត្ថុ ដោយសារអាណាព្យាបាលខ្លះស្នើសុំពន្យារការបង់ថ្លៃសេវា ប៉ុន្តែយើងនៅតែរក្សាការផ្ដល់អាហារ ៣ ពេល ក្នុងមួយថ្ងៃដល់កូនៗ និង សាច់ញាតិរបស់ពួកគាត់ ដែលកំពុងស្នាក់នៅព្យាបាល និង បន្សាបគ្រឿងញៀន នៅទីនេះមិនឲ្យខ្វះខាតនោះទេ»។
បើតាមលោក ប្រសើរ ក្នុងអំឡុងពេលនេះ ថ្វីដ្បិតតែមានការហាមឃាត់សាច់ញាតិចូលជួប សួរសុខទុក្ខ ដោយផ្ទាល់ដូចមុន ប៉ុន្តែការជួបប្រាស្រ័យទាក់ទងតាមប្រព័ន្ធ Online Telegram WhatsApp និង Messenger នៅតែបើកចំហ ដើម្បីឲ្យអាណាព្យាបាលអាចទាក់ទងសួរសុខទុកកូនក្មួយ ឬ មិត្តភក្ដិរបស់ពួកគេដែលកំពុងស្នាក់នៅព្យាបាល និង បន្សាបគ្រឿងញៀននៅក្នុងមណ្ឌលនេះដដែល។
លោក ប្រសើរ បានបន្ថែមថា៖« តាមរយៈការអនុវត្តទាំងអស់គ្នានូវវិធានការ ៣ កុំ ៣ ការពារ របស់រដ្ឋាភិបាល និង គោលការណ៍ណែនាំនានារបស់ក្រសួងសុខាភិបាល និងអាជ្ញាធរមូលដ្ឋានព្រឹតិ្តការណ៍ ២០ កុម្ភៈ នឹងត្រូវបិទបញ្ចប់ក្នុងពេលឆាប់ៗខាងមុខនេះ ហើយយើងនឹងអាចជួបជុំប្រាស្រ័យទាក់ទងក្រុមគ្រួសាររបស់យើងដូចពីមុនឡើងវិញ និង សូមឆ្លើយថាទេ ចំពោះគ្រឿងញៀន»។
យោងតាមទិន្នន័យពីនាយកដ្ឋាននីតិកម្ម អប់រំ និងស្តានីតិសម្បទានៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនក្នុងរយៈពេល ៣ ខែដើមឆ្នាំ ២០២១ នេះចំនួនអ្នកដែលស្ម័គ្រចិត្ត ចូលទទួលយកសេវាព្យាបាល និងបន្សាបគ្រឿងញៀននៅក្នុងមណ្ឌលស្ដារនីតិសម្បទា និង បន្សាបគ្រឿងញៀននៅទូទាំងប្រទេសមានចំនួនសរុប ៩ ២៦៧ នាក់។
មណ្ឌលស្ដារនីតិសម្បទា និង បន្សាបគ្រឿងញៀននៅទូទាំងប្រទេសកម្ពុជា មានចំនួន ១៨ មណ្ឌល ក្នុងនោះ ១១ មណ្ឌលបង្កើតឡើងដោយរដ្ឋ ៣ មណ្ឌលបង្កើតឡើងដោយឯកជន និង ៤ មណ្ឌលទៀត បង្កើតឡើងដោយអង្គការក្រៅរដ្ឋាភិបាល។
ក្រៅពីនេះក៏មានមណ្ឌលសុខភាព និង មន្ទីរពេទ្យសម្រាប់ផ្ដល់សេវាព្យាបាល និង បន្សាបគ្រឿងញៀនក្នុងសហគមន៍ទូទាំងប្រទេសចំនួន ៤៥០ កន្លែងផងដែរ៕
