មជ្ឈមណ្ឌលបន្សាបគ្រឿងញៀនឱកាសខ្ញុំ។ រូបថត សហការី
ភ្នំពេញៈ មជ្ឈមណ្ឌលឱកាសខ្ញុំបានសម្រេចផ្អាកជាបណ្តោះអាសន្នក្នុងការទទួលយកជនរងគ្រោះដែលត្រូវគេបញ្ជូនឱ្យទៅសម្រាកព្យាបាល និងស្តារនីតិសម្បទា ដោយសារតែមានការចង្អៀតណែនខ្លាំង ខណៈបច្ចុប្បន្នមានជនរងគ្រោះកំពុងសម្រាកព្យាបាល និងស្តារនីតិសម្បទារហូតដល់ជាង ២ ០០០ នាក់។
លោកស្រី មុំ ចាន់ដានី ប្រធានមន្ទីរសង្គមកិច្ចរាជធានីភ្នំពេញ និងជាប្រធានមជ្ឈមណ្ឌលឱកាសខ្ញុំបានឱ្យដឹងនៅថ្ងៃទី ១៤ ធ្នូ ថា ការផ្អាកទទួលជនរងគ្រោះដោយសារធាតុញៀនជាបណ្តោះអាសន្ននេះគឺដោយសារការចង្អៀតណែនមិនមានកន្លែងសម្រាកគ្រប់គ្រាន់ ហើយមួយវិញទៀត លោកស្រីចង់ឱ្យជនរងគ្រោះដោយសារធាតុញៀននេះទៅទទួលយកសេវាព្យាបាលនៅតាមមណ្ឌលសុខភាព មន្ទីរពេទ្យបង្អែកនានា ដែលមាននៅតាមរាជធានី-ខេត្ត។
លោកស្រី ចាន់ដានី ថ្លែងថា៖ «ប៉ុន្តែក្នុងករណីចាំបាច់ណាមួយដែលសមត្ថកិច្ចបញ្ជូនជនរងគ្រោះមកក្នុងភាពបន្ទាន់ណាមួយ ខ្ញុំនឹងធ្វើការពិចារណាក្នុងការទទួល ប៉ុន្តែពួកគាត់ត្រូវដាក់ក្នុងបន្ទប់ដាច់ដោយឡែករយៈពេល ១៤ ថ្ងៃ»។
លោកស្រី ចាន់ដានី នឹងសុំគោលការណ៍ធ្វើសមាហរណកម្មអ្នកដែលបានព្យាបាលជាសះស្បើយឱ្យបានវិលត្រឡប់ទៅផ្ទះវិញ ហើយមួយវិញទៀត លោកស្រីនឹងចាំមើលពីវិធានសុខាភិបាល ថាតើព្រឹត្តិការណ៍សហគមន៍ ២៨ វិច្ឆិកា មានភាពប្រសើរឡើងវិញឬយ៉ាងណា?
មជ្ឈមណ្ឌលឱកាសខ្ញុំ បានអញ្ជើញអាណាព្យាបាលឱ្យទៅទទួលយកកូនៗរបស់ពួកគេដែលមានសុខភាពល្អប្រសើរត្រឡប់ទៅផ្ទះវិញ ដោយមានការណែនាំដល់ឪពុកម្តាយអំពីរបៀបអប់រំ និងណែនាំកូនពួកគាត់នៅពេលទៅដល់ផ្ទះ។
បើតាមលោកស្រី ចាន់ដានី មជ្ឈមណ្ឌលឱកាសខ្ញុំនៅមានការខ្វះខាតទីកន្លែងសម្រាប់ជនរងគ្រោះស្នាក់នៅ ដោយសារចំនួនអ្នកកំពុងស្នាក់នៅបន្សាបសារធាតុញៀនមានចំនួនច្រើន។
លោកស្រីបន្តថា៖ «ខ្ញុំបានធ្វើសំណើរាយការណ៍ទៅដល់អភិបាលរាជធានីភ្នំពេញ ដោយខ្ញុំចង់បានអគារ និងបន្ទប់បន្ថែម ជាពិសេសខ្ញុំចង់ធ្វើការបែងចែកចេញពីគ្នារវាងអ្នកមានអាការធ្ងន់ និងស្រាល ដោយសារជនរងគ្រោះប្រើប្រាស់សារធាតុញៀនកម្រិតសុខភាពរបស់គាត់ខុសៗគ្នា»។
លោកស្រីបន្ថែមថា លោកស្រីចង់បានបន្ទប់ និងទីធ្លាធំទូលាយ ដើម្បីឱ្យពួកគាត់មានទីធ្លាសម្រាប់ដាំបន្លែ និងជាពិសេសបន្ទប់ដែលមានជំនាញបំណិនជីវិតដោយក្នុងនោះមានអង្គការដៃគូច្រើនបានជួយគាំទ្រដោយមិនគិតប្រាក់ ប៉ុន្តែបន្ទប់បណ្តុះបណ្តាលមានភាពតូចចង្អៀត ដែលប្រៀបទៅនឹងជនរងគ្រោះផ្តល់ការបណ្តុះបណ្តាលបំណិតជីវិតគឺបានតែ ១០% ប៉ុណ្ណោះ។
លោកស្រីបន្តថា ប្រសិនបើស្ថានភាពជនរងគ្រោះនៅតែមានច្រើនចូលមករហូត មណ្ឌលនេះគឺចាំបាច់ត្រូវការនូវអគារប្រហែលជា ៣ អគារបន្ថែមទៀត ដែលស្មើនឹងប្រមាណជា ២០ បន្ទប់សម្រាប់ស្នាក់នៅ និងរៀននូវវិជ្ជាជីវៈជំនាញផ្សេងៗ។
លោក មាន ចាន់យ៉ាដា អភិបាលរងរាជធានីភ្នំពេញបានផ្ញើលិខិតជូនលោកស្រី មុំ ចាន់ដានី ដែលភ្នំពេញប៉ុស្តិ៍ទទួលបានកាលពីថ្ងៃទី ១៤ ខែធ្នូ ដោយបានអនុញ្ញាតឱ្យមជ្ឈមណ្ឌលឱកាសខ្ញុំផ្អាកទទួលយកជនរងគ្រោះដោយសារធាតុញៀនជាបណ្តោះអាសន្ន។
លោក មាន ចាន់យ៉ាដា បានបញ្ជាក់ក្នុងលិខិតថា៖ «ចំពោះសំណើសុំគោលការណ៍ផ្អាកជាបណ្តោះអាសន្ននូវការទទួលជនរងគ្រោះដែលបញ្ជូនមកព្យាបាល និងស្តារនីតិសម្បទានៅមណ្ឌលសុខភាពឱកាសខ្ញុំ ដោយសារបច្ចុប្បន្នមជ្ឈមណ្ឌលមានជនរងគ្រោះកំពុងស្នាក់នៅសរុបចំនួន ២ ០៧៤ នាក់ ក្នុងនោះស្រីចំនួន ១១៣ នាក់ ដែលធ្វើឱ្យបន្ទប់ស្នាក់នៅនីមួយៗរបស់ជនរងគ្រោះមានលក្ខណៈចង្អៀតខ្លាំងនោះ រដ្ឋបាលរាជធានីភ្នំពេញឯកភាពជាគោលការណ៍»៕
.jpg)
