បាត់ដំបង៖ មនុស្សចំនួន ១៧ នាក់ ត្រូវបានឃាត់ខ្លួនបញ្ជូនទៅតុលាការខេត្ត ពាក់ព័ន្ធនឹងការប្រមូលផ្តុំគ្នាលេងល្បែងភ្នាល់ជល់មាន់តាមប្រព័ន្ធអនឡាញ នៅភូមិចំការសំរោង ២ សង្កាត់ចំការសំរោង ក្រុងបាត់ដំបង។
លោក ណុប ដារ៉ា អភិបាលរងខេត្តបាត់ដំបង ជាប្រធានគណៈកម្មការស្រាវជ្រាវ និងបង្ក្រាបល្បែងគ្រប់ប្រភេទប្រាប់ ភ្នំពេញ ប៉ុស្តិ៍ នៅថ្ងៃទី ៣ ឧសភា ថា ករណីមនុស្សទាំង ១៧ នាក់នេះ ត្រូវបានបញ្ជូនទៅតុលាការនៅថ្ងៃទី ៣ ឧសភា ដើម្បីអនុវត្តទៅតាមនីតិវិធីបន្ត ក្រោយពីឃាត់ខ្លួនបានកាលពីថ្ងៃទី ២ ឧសភា។
លោក ណុប ដារ៉ា បញ្ជាក់ថា លោកបានដឹកនាំផ្ទាល់ក្នុងការចុះទៅបង្រ្កាប និងឃាត់ខ្លួនមនុស្សទាំង ១៧ នាក់នេះ នៅពេលពួកគេកំពុងប្រមូលផ្តុំគ្នាលេងល្បែងភ្នាល់ជល់មាន់តាមអនឡាញ។ ជាមួយគ្នានេះ សមត្ថកិច្ចក៏បានរឹបអូសសម្ភារមួយចំនួនផងដែរ។
លោក ណុប ដារ៉ា បញ្ជាក់ថា លោក ងួន រតនៈ អភិបាលខេត្តបាត់ដំបងបានប្រាប់ឱ្យមានការបង្រ្កាបល្បែងស៊ីសងគ្រប់ទម្រង់ទាំងអស់នៅក្នុងខេត្ត ដើម្បីធ្វើយ៉ាងណាកុំឱ្យមានការជួបជុំ ដែលអាចឈានដល់ការចម្លងនូវជំងឺកូវីដ ១៩ ខណៈដែលរាជរដ្ឋាភិបាលកំពុងប្រយុទ្ធប្រឆាំង និងទប់ស្កាត់នៅក្នុងប្រទេស។
លោក ណុប ដារ៉ា បញ្ជាក់ថា៖ «មេខេត្តឱ្យយើងបង្រ្កាប ហើយយើងមិនបង្ក្រាបយ៉ាងម៉េច! អនុវត្តតាមមេ មេគាត់ឱ្យធ្វើ។ ទាំងសម្ភារ និងមនុស្ស បានបញ្ជូនទៅតុលាការអស់ហើយ លែងស្ថិតនៅក្នុងដែនសមត្ថកិច្ចខ្ញុំហើយ»។
ទោះជាយ៉ាងណា លោកបញ្ជាក់ថា ក្នុងការបង្ក្រាប និងឃាត់ខ្លួននេះ គណៈបញ្ជាការឯកភាពរដ្ឋបាលខេត្តបាត់ដំបង ក៏បានពិនិត្យមើលលើស្ថានភាពជាក់ស្តែងផងដែរ។ បើស្ថានភាពធ្ងន់ធ្ងរ នឹងត្រូវបញ្ជូនទៅតុលាការ ដើម្បីអនុវត្តតាមច្បាប់។ ប៉ុន្តែ បើការលេងល្បែងក្នុងស្ថានភាពតូចតាច គឺនឹងត្រូវឃាត់ខ្លួនយកមកអប់រំណែនាំ។
យោងតាមរបាយការណ៍របស់ស្នងការដ្ឋាននគរបាលខេត្តបាត់ដំបងបង្ហញថា ក្នុងប្រតិបត្តិការចុះបង្រ្កាបល្បែងភ្នាល់ជល់មាន់តាមអនឡាញ សមត្ថកិច្ចបានដកហូតវត្ថុតាងមួយចំនួន រួមមាន ទូរទស្សន៍ LCD ម៉ាក Samsung ពណ៌ខ្មៅ ១ គ្រឿង ឧបករណ៍ផ្ទុកទិន្នន័យ កាមេរ៉ាសុវត្ថិភាព ២ គ្រឿង រថយន្តចំនួន ១ គ្រឿង ម៉ូតូចំនួន ៥ គ្រឿង តុចំនួន ២ កៅអី មួយចំនួន និង កង្ហារ ១ គ្រឿង។
តាមរបាយការណ៍ដដែល ក្រោយពេលឃាត់ខ្លួនសមត្ថកិច្ចបាននាំពួកគេទាំង ១៧ នាក់ មកកាន់ស្នងការដ្ឋាននគរបាលខេត្តធ្វើការសាកសួរ។
បច្ចុប្បន្នការិយាល័យជំនាញកំពុងរៀបចំកសាងសំណុំរឿង ដើម្បីបញ្ជូនអ្នកប្រព្រឹត្ត និងវត្ថុតាងទៅកាន់សាលាដំបូងខេត្តបាត់ដំបងចាត់ការតាមផ្លូវច្បាប់៕