ភ្នំពេញៈ សមត្ថកិច្ចបានធ្វើការឃាត់ខ្លួនមនុស្ស ១៦១៣៩ នាក់ និង បង្ក្រាបបាន ៧៩៧៩ ករណីដែលពាក់ព័ន្ធនឹងអ្នកជួញដូរ និងអ្នកប្រើប្រាស់គ្រឿងញៀន បើគិតជាមធ្យមគឺមនុស្សយ៉ាងហោចណាស់ប្រមាណ ៤៤ នាក់ត្រូវបានឃាត់ខ្លួនក្នុង ១ ថ្ងៃ។ យោងតាមគណៈកម្មការទី ៣ នៃយុទ្ធនាការប្រឆាំងគ្រឿងញៀនដែលដឹកនាំដោយលោក ស ខេង រដ្ឋមន្ត្រីក្រសួងមហាផ្ទៃបានបើកយុទ្ធនាការបង្ក្រាបចាប់ពីថ្ងៃទី ១ មករាដល់ថ្ងៃ ទី ២៩ ខែធ្នូ ឆ្នាំ ២០១៨។
របាយការណ៍បានឲ្យដឹងថាលទ្ធផលអនុវត្តច្បាប់រយៈពេល ១២ ខែ (គិតពីថ្ងៃទី ១ ខែមករា ដល់ថ្ងៃ ទី ២៩ ខែធ្នូ ឆ្នាំ ២០១៨ មានចំនួនសរុប ៧៩៧៩ ករណីដោយឃាត់មនុស្ស ១៦១៣៩ នាក់ស្រី ១៣៣៩ នាក់ជនបរទេស ៣១០ នាក់ស្រី ៤៨ នាក់មាន ២៤ សញ្ជាតិ។ ពាក់ព័ន្ធនឹងការជួញដូរ រក្សាទុក កែច្នៃ ចាត់ចែង និងដាំដុះមានចំនួនសរុប ៥០៣៣ ករណីឃាត់ខ្លួន ៩០៤៩ នាក់ស្រី ៩១៣ ហើយទាក់ទឹងនឹងអ្នកដែលប្រើប្រាស់មានសរុបចំនួន ៤៩៤៦ ករណី ឃាត់ខ្លួន ៧០៩៩ នាក់ ស្រី ៤២៦០ នាក់»។
របាយការណ៍បន្ថែមថាសមត្ថកិច្ចបានធ្វើការអនុវត្ដដីកាដោយបានឃាត់ ២៣៩ នាក់ស្រី ៩ នាក់ ហើយបានរឹបអូសសារធាតុញៀនគ្រប់ប្រភេទ ៥៣៣ គីឡូក្រាម និង ២៨៨ កញ្ចប់ កញ្ឆាក្រៀម ៧៤ គីឡូក្រាម និង ១៦៤៩២៥ ដើមនិង សម្ភារដែលចាប់យកមាន រថយន្ដ ៩៤ គ្រឿង ម៉ូតូ ២២៣០ គ្រឿង ទូរស័ព្ទ ៥៩២៤ គ្រឿង ជញ្ជីង ៣៧៦ គ្រឿង អាវុធខ្លី ២៦ ដើម អាវុធវែង ១៣ ដើម ចលនទ្រព្យ និងអចលនទ្រព្យស្នើសុំបង្កកចំនួន ៥ កន្លែងមានដីចម្ការ ១ កន្លែង ដីឡូត៍ ២ កន្លែង និងផ្ទះល្វែង ២ កន្លែង។
នាយឧត្តមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានថែ្លងប្រាប់ភ្នំពេញប៉ុស្តិ៍កាលពីម្សិលមិញថា ចំនួនករណីបង្ក្រាបអ្នកជួញដូរ និងអ្នកប្រើប្រាស់គ្រឿងញៀនមានការថយចុះ ដោយសារតែការចូលរួមពីគ្រប់សមាសភាពនៅក្នុងសង្គម ទាំងការធ្វើសកម្មភាព និងការគាំទ្រពីប្រជាពលរដ្ឋទាំងការផ្តល់ព័ត៌មាន និងការសហការជាមួយសមត្ថកិច្ច និងរាជរដ្ឋាភិបាលបានដាក់ចេញនូវយុទ្ធនាការប្រយុទ្ធប្រឆាំងគ្រឿងញៀនធ្វើឲ្យអ្នកប្រើប្រាស់គ្រឿងញៀនដែលបានលាក់ខ្លួនបានស្ម័គ្រចិត្តមកទទួលសេវាព្យាបាលនៅតាមមន្ទីរពេទ្យ។
លោកថ្លែងថា៖ «យើងព្យាយាមទប់ស្កាត់តាមរយៈការផ្សព្វផ្សាយអប់រំ និងផ្សព្វផ្សាយឲ្យអ្នកប្រើប្រាស់គ្រឿងញៀនដែលលាក់ខ្លួនស្ម័គ្រចិត្តមកទទួលសេវាព្យាបាល»៕