.jpg)
កម្លាំងជំនាញបន្តរុករកស្ត្រីអង់គ្លេសបាត់ខ្លួនដល់ថ្ងៃទី ៤ កាលពីថ្ងៃទី ២៩ តុលា នៅខេត្តព្រះសីហនុ។ រូប សហការី
ព្រះសីហនុៈ មនុស្សជាង ២០ នាក់ ត្រូវបានមន្ត្រីនគរបាលចុះទៅសាកសួរ និងហៅមកសួរនៅស្នងការដ្ឋានខេត្តព្រះសីហនុជាបន្តបន្ទាប់ជុំវិញករណីបាត់ខ្លួនស្ដ្រីជនជាតិអង់គ្លេសនៅកោះរ៉ុង ខេត្តព្រះសីហនុ។ មន្ត្រីបានលើកឡើងថា ថ្វីដ្បិតមានប្រតិបត្តិការរុករកអស់ជាច្រើនថ្ងៃរួមទាំងសាកសួរមនុស្សមួយចំនួនក្ដី ប៉ុន្តែមិនទាន់ទទួលបានតម្រុយអ្វីថ្មីពាក់ព័ន្ធនឹងការបាត់ខ្លួនស្ដ្រីអង់គ្លេសនោះទេ។
លោក ជួន ណារិន្ទ ស្នងការនគរបាលខេត្តព្រះសីហនុបានប្រាប់ភ្នំពេញប៉ុស្ដិ៍ពីម្សិលមិញថា ចាប់តាំងពីមានស្ដ្រីជនជាតិអង់គ្លេសបាត់ខ្លួននៅកោះរ៉ុងតាំងពីថ្ងៃទី ២៤ តុលា មកគឺមានមនុស្សជាង ២០ នាក់ ត្រូវបានសាកសួរ ដើម្បីស្វែងរកពន្លឺជួយទៅដល់ប្រតិបត្តិការរុករករបស់កម្លាំងសមត្ថកិច្ច។ ប៉ុន្តែពួកគេទាំងនោះមិនមែនជាជនសង្ស័យជុំវិញការបាត់ខ្លួនស្ដ្រីនោះឡើយ ។
លោកបញ្ជាក់ថា៖ «យើងគ្រាន់សាកសួរពួកគាត់ ដូចជាអ្នកណាធ្លាប់ឃើញ (ស្ដ្រីជនជាតិអង់គ្លេសបាត់ខ្លួន) របៀបម៉េច ធ្លាប់ជួបរបៀបម៉េច ដើម្បីធ្វើជាពន្លឺសម្រាប់កម្លាំងសមត្ថកិច្ចយើង។ យើងមិនមែនទៅសំដៅពាក់ព័ន្ធនឹងប្រព្រឹត្តបទល្មើស ឬមួយក៏ករណីអីផ្សេងទេ។ ប៉ុន្តែឱ្យតែយើងមានតម្រុយ និងពន្លឺគឺចង់ដឹង ចង់ឮ ដើម្បីយកព័ត៌មានដើម្បីធ្វើការងារស្រាវជ្រាវតែប៉ុណ្ណឹងទេ»។
លោក ណារិន្ទ បន្ថែមថាពុំមានជនណាម្នាក់ត្រូវបានឃាត់ខ្លួនជាបណ្ដោះអាសន្នជុំវិញការសង្ស័យធ្វើឱ្យបាត់ខ្លួនស្ដ្រីជនជាតិអង់គ្លេសនេះនៅឡើយទេ។ លោកបន្តថា សមត្ថកិច្ចនឹងបន្តចុះសាកសួរមនុស្សមួយចំនួនទៀតដើម្បីប្រមូលយកព័ត៌មានបន្ថែម ខណៈប្រតិបត្តិការរុករករយៈពេល ៦ ថ្ងៃនៅពុំទាន់ទទួលបានតម្រុយអ្វីនៅឡើយ ។
បើតាមស្នងការរូបនេះកម្លាំងរុករក មានចំនួនរាប់រយនាក់ក្នុងនោះមានកម្លាំងគណៈបញ្ជាការខេត្តមានជាង ១០០ នាក់ អ្នកជំនាញមុជទឹក ៦ នាក់ និងកម្លាំងស្ម័គ្រចិត្តដែលមានទាំងជនជាតិខ្មែរ និងបរទេសជាច្រើនរយនាក់ផ្សេងទៀត។ កម្លាំងទាំងនេះត្រូវបានបែងចែកជាក្រុមៗ ដើម្បីបន្តចុះទៅរុករកនៅតាមព្រៃ និងតាមផ្ទៃសមុទ្ររួមទាំងនៅតាមតំបន់ផ្ទៃថ្មជាដើម។
ជាមួយគ្នានោះមធ្យោបាយរុករកគឺមានអូប័រធំៗរបស់លោកឧកញ៉ា ទៀ វិចិត្រ ចំនួន ៦ គ្រឿង ពីលម្ហសមុទ្រ ១ គ្រឿង និងអូប័រតូចធំរបស់គណៈបញ្ជាការខេត្តចំនួន ១២ គ្រឿងផ្សេងទៀត ទាំងកូនយន្តហោះដ្រូនចំនួន ២ គ្រឿង ខណៈអគ្គស្នងការនគរបាលជាតិក៏បានបញ្ជូនសុនខហិតក្លិនចំនួន ៣ ក្បាល កាលពីថ្ងៃទី ២៩ តុលា ដើម្បីចូលរួមក្នុងកិច្ចប្រឹងប្រែងរកស្ដ្រីបាត់ខ្លួននេះ។
អ្នកទេសចរជនជាតិអង់គ្លេសឈ្មោះ Amelia Bambridge អាយុ ២១ ឆ្នាំ ត្រូវបានអាជ្ញាធរអះអាងដំបូងថា បានបាត់ខ្លួនកាលពីវេលាម៉ោង ៣ ទៀបភ្លឺថ្ងៃទី ២៤ តុលា ក្រោយពីស្ដ្រីរូបនេះត្រូវបានគេឃើញលើកចុងក្រោយធ្វើដំណើរតែម្នាក់ឯងចេញពីកម្មវិធីជប់លៀងមួយនៅភោជនីយដ្ឋានឈ្មោះ Police Beach ដើម្បីត្រឡប់ទៅកាន់សណ្ឋាគារស្នាក់នៅវិញឈ្មោះ Nest Beach Club ដែលមានចម្ងាយពីគ្នាប្រហែល ១ គីឡូម៉ែត្រ ។
ក្រោយពីការបាត់ខ្លួន អាជ្ញាធរបានរកឃើញកាបូបតូចរបស់នាងដែលខាងក្នុងមានទូរស័ព្ទ កាបូបលុយ និងកាតធនាគារនៅលើផ្ទាំងថ្មជាប់មាត់ទឹកសមុទ្រ ខណៈខាងសណ្ឋាគារក៏បានរាយការណ៍ថា នាងមិនបានមកចុះឈ្មោះដើម្បីចាកចេញពីសណ្ឋាគារឡើយ និងបានបន្សល់ទុកលិខិតឆ្លងដែន និងសម្ភារប្រើប្រាស់ដូចជា សម្លៀកបំពាក់នៅក្នុងបន្ទប់សណ្ឋាគារ។
កាលពីថ្ងៃ ២៧ តុលា គ្រួសាររបស់ស្ដ្រីបាត់ខ្លួនចំនួន ៥ នាក់ បានធ្វើដំណើរដល់ខេត្តព្រះសីហនុ ដើម្បីតាមរុករកនាង។
លោក នួន ប៊ុនថុល អភិបាលក្រុងកោះរ៉ុងលើកឡើងដែរថាពីតំបន់ឆ្នេរសមុទ្រដែលជាកន្លែងសង្ស័យបាត់ខ្លួនចូលទៅព្រៃគឺមានចម្ងាយប្រហែល ៥ ទៅ ៦ គីឡូម៉ែត្រ ត្រូវអាជ្ញាធរចូលទៅរុករក។ ឯក្រុមអ្នកមុជទឹកក៏មុជរាវរកនៅក្នុងទឹកចម្ងាយប្រហែល ៦ គីឡូម៉ែត្រ និងរួមទាំងការល្បាតលើផ្ទៃនៅជុំវិញកោះថែមទៀត ប៉ុន្តែនៅពុំទាន់រកឃើញពន្លឺអ្វីនោះទេ។
លោកបន្តថាក្រៅពីប្រតិបត្តិការល្បាតលើផ្ទៃទឹកត្រូវបានពង្រីកឱ្យបានចម្ងាយ ៣០ ទៅ ៤០ គីឡូម៉ែត្រ នៅជុំវិញកោះក្នុងនោះអាជ្ញាធរក៏បានផ្សព្វផ្សាយដល់គ្រប់សហគមន៍នេសាទទាំងអស់ជួយតាមរក ខណៈអាជ្ញាធរខេត្តកោះកុងក៏ត្រូវបានជូនដំណឹងឱ្យចុះពិនិត្យនៅតាមតំបន់ឆ្នេរសមុទ្រផងដែរ ។
លោកថ្លែងថា៖ «នៅពេលដែលពួកគាត់ចុះនេសាទហ្នឹង សុំឱ្យពួកគាត់ជួយពិនិត្យមើល ហើយបើឃើញ សុំឱ្យគាត់រាយការណ៍មកសមត្ថកិច្ច»។
នៅថ្ងៃទី ២៩ ប្អូនស្រីរបស់ Amelia Bambridge ឈ្មោះ Georgie Bambrigde បានសរសេរបង្ហោះនៅតាមទំព័រហ្វេសប៊ុកអំពាវនាវទៅដល់អ្នកដែលបានទៅលេងកោះរ៉ុងជួយផ្ដល់ដំណឹងអំពីការបាត់ខ្លួនបងស្រីរបស់នាង ប្រសិនបើទទួលបានតម្រុយអ្វីមួយ ខណៈ Amelia ពុំមានទូរស័ព្ទ លិខិតឆ្លងដែន ឬលុយនៅជាប់នឹងខ្លួននោះ។
នាងបាននិយាយថា៖ «នាង (Amelia) បានរៀបចំគម្រោងដំណើរកម្សាន្តរយៈពេល ២ ឆ្នាំ ដ៏ប្រុងប្រយ័ត្នបំផុត បន្ទាប់ពីទៅលេងឪពុកនៅក្នុងប្រទេស វៀតណាម។ អំឡុងស្នាក់នៅរយៈពេលខ្លីនៅកោះរ៉ុង នាងបានជួបជាមួយមិត្តភក្ដិមួយចំនួនដែលបានឃើញនៅក្នុងកាមេរ៉ាសុវត្ថិភាព ខណៈកំពុងធ្វើដំណើរឆ្ពោះទៅ (ពិធីជប់លៀង) នៅ Police Beach នៅវេលាម៉ោង ២ ព្រឹក និងមិនបានឃើញត្រឡប់មកវិញនោះទេ»។
ជាមួយគ្នានេះអភិបាលក្រុងកោះរ៉ុងលោក នួន ប៊ុនថុល បានបញ្ជាក់ដែរថា អាជ្ញាធរកំពុងសង្ស័យអំពីមូលហេតុដែលកាបូបនាងស្ថិតនៅលើផ្ទាំងថ្មជាប់ទឹក ខណៈវីដេអូនៅក្នុងកាមេរ៉ាសុវត្ថិភាពមិនបានឃើញនាងត្រឡប់មកពីកម្មវិធីជប់លៀងវិញ៕
