.jpg)
សមត្ថកិច្ច ជួយប្រជាពលរដ្ឋដែលរងគ្រោះដោយទឹកជំនន់ពីការបាក់ទំនប់វារីអគ្គិសនីនៅប្រទេសឡាវទៅកាន់ទីទួលសុវត្ថិភាពនៅស្រុកសៀមប៉ាង ខេត្តស្ទឹងត្រែងកាលពីថ្ងៃម្សិលមិញ។ រូប ក្រសួងធនធានទឹក និងឧតុនិយម
ស្ទឹងត្រែងៈ ពលរដ្ឋប្រមាណជាង ៥ ពាន់នាក់ស្មើនឹងជាង ១២៨៩ គ្រួសារនៅស្រុកសៀមប៉ាង ខេត្តស្ទឹងត្រែងត្រូវបានជម្លៀសដល់ទីទួលសុវត្ថិភាព ខណៈស្រុកមួយនេះមានពលរដ្ឋរស់នៅជាង ២ ម៉ឺននាក់។ នេះបើតាមលោក ម៉ុម សារឿន អភិបាលខេត្ដស្ទឹងត្រែង។
លោកអភិបាលខេត្ដបានប្រាប់ភ្នំពេញប៉ុស្ដិ៍នៅម៉ោងប្រមាណ ៧ យប់មិញថា ពលរដ្ឋសរុបក្នុងស្រុកសៀមប៉ាងមានជាង ២៥០០០ នាក់ ហើយអ្នករងគ្រោះដោយទឹកជំនន់ជាង ៥០០០ នាក់ត្រូវបានជម្លៀសដល់ទីទួល និងទទួលបានការផ្គត់ផ្គង់សម្ភារ ស្បៀងអាហារថ្នាំពេទ្យគ្រប់ៗគ្នា។
លោក សារឿន បានអះអាងថា៖ «ទឹកមិនស្ទុះឡើងដូចមុនទេ។ ពលរដ្ឋរងគ្រោះ យើងបានប្រក់តង់សម្រាប់ពួកគាត់សម្រាន្ត ថ្នាំពេទ្យ មុង ទឹកស្អាត ពិសេសមី បានបញ្ជូនទៅដល់ពួកគាត់ជាបន្ដបន្ទាប់ហើយ» ប៉ុន្តែលោកថា ចំនួនពលរដ្ឋដែលបានជម្លៀសនេះជាតួលេខបណ្ដោះអាសន្នប៉ុណ្ណោះ។
បើតាមក្រសួងធនធានទឹកមកដល់ម៉ោង ៣ និង ១០ នាទីរសៀលម្សិលមិញ ទឹកទន្លេសេកុងក្នុងខេត្តស្ទឹងត្រែងបានបន្តឡើងដល់កម្ពស់ ១២,១០ ម៉ែត្រខណៈកម្រិតប្រកាសអាសន្នមានត្រឹម ១១,៥០ ម៉ែត្រ ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងកាលពីម្សិលមិញដែរថា៖ «ក្នុងពេល ១ ថ្ងៃទៀតចំនួនពលរដ្ឋដែលជម្លៀសទៅទីទួលប្រហែលមានការប្រែប្រួលខ្លះទៀតព្រោះទឹកកំពុងកើនឡើង ខ្ញុំមិនទាន់ទទួលបានចំនួនសរុបនៅឡើយទេថ្ងៃនេះ។ អ៊ីចឹងចាំសរុបតែម្ដងទៅយកចំនួនចាស់ពីម្សិលមិញ ១២៨៩ គ្រួសារ»។
លោក ផែន ប៊ុនធឿន ប្រធានប្រតិបត្តិកម្មវិធីអង្គការភ្លែនអន្តរជាតិខេត្តស្ទឹងត្រែងដែលបានចូលរួមអង្កេតទឹកជំនន់នេះដែរបានឲ្យដឹងថា ក្រៅពីទឹកជំនន់នៅស្រុកសៀមប៉ាងក៏មានភ្លៀងខ្លះៗដែរ តែមិនខ្លាំងទេ ខណៈផ្ទះពលរដ្ឋខ្លះអាចលិចមិនអាចស្នាក់នៅបាន។
លោកបន្ដថា៖ «ខាងក្រុមពួកខ្ញុំបានចុះទៅប្រមូលព័ត៌មាននៅទីនោះ ហើយពួកខ្ញុំនឹងចុះទៅធ្វើបន្ដទៀត ព័ត៌មានដែលប្រមូលបានគឺដាក់ជូនទៅដើម្បីធ្វើការឆ្លើយតប។ គ្រួសារពិតប្រាកដដែលកំពុងរងគ្រោះនៅឃុំសន្ដិភាព និងឃុំ ថ្មកែវគឺមាន ៥៦២ គ្រួសារដែលត្រូវការជំនួយសង្គ្រោះបន្ទាន់ទាក់ទងនឹងតង់ ទឹក និងសម្ភារ ផ្នែកអនាម័យអ្វីផ្សេងៗជាដើម»។
ពលរដ្ឋត្រូវបានជួយសង្គ្រោះទៅទីទួលសុវត្ថិភាព។ រូបថត ក្រសួងធនធានទឹក
បើតាមលោក ប៊ុនធឿន តម្រូវការជាងគេរបស់ពលរដ្ឋរងគ្រោះគឺទឹក ដូច្នេះយើងកំពុងស្នើទៅថ្នាក់លើដើម្បីផ្ដល់ធុងទឹកស្អាត និងតង់បន្ថែម។
បើតាមលោក កែវ វី គម្រោងសម្រាប់គណៈកម្មាធិការជាតិគ្រប់គ្រងគ្រោះមហន្តរាយ រដ្ឋាភិបាលបានត្រៀមផ្គត់ផ្គង់ចំពោះគ្រោះទឹកជំនន់ក្នុង ១ ឆ្នាំ រួមមានអង្គរ ១ ម៉ឺនតោន ស្រូវពូជ ២ ពាន់តោន និងមានគ្រាប់ពូជបន្លែ ៥០ តោន ខណៈកញ្ចប់ថវិកាលុះត្រាមានករណីពិសេសទើបរាជរដ្ឋាភិបាលទម្លាក់ឲ្យប្រើប្រាស់។
លោកថា៖ «ចំនួនខាងលើនេះសម្រាប់ការសង្គ្រោះបន្ទាន់ និងការស្ដារឡើងវិញ ប៉ុន្ដែប៉ុន្មានឆ្នាំនេះ យើងមិនដែលប្រើប្រាស់ទេព្រោះអាជ្ញាធរខេត្ដអាចម្ចាស់ការបានលើខ្ទង់ចំណាយរបស់ពួកគាត់...»។
លោក វី ថា នៅខេត្ដក្រចេះទឹកទន្លេមេគង្គបានឡើងដល់កម្រិតជាង ២០ ម៉ែត្រ និងបានជន់លិចទៅតាមតំបន់ទំនាបមួយចំនួន ប៉ុន្ដែកម្ពស់ទឹកនាថ្ងៃម្សិលមិញ ទើបតែឡើងដល់ ២០,១៦ ម៉ែត្រប៉ុណ្ណោះ ខណៈកម្ពស់ ២២ ម៉ែត្រគឺជាកម្រិតប្រកាសអាសន្នក្នុងខេត្តនេះ។
លោកបន្ថែមថា «ថ្ងៃនេះទឹកទន្លេក្រចេះមានកម្ពស់ ២០,១៦ ម៉ែត្រដល់កម្ពស់ប្រុងប្រយ័ត្ន ២២ ម៉ែត្រនៅច្រើនទៀតដែរទើបលិច ប៉ុន្ដែក្រចេះនេះនៅតំបន់ទំនាបផ្សេងៗ ដាំពោតដាំល្ហុង អីហ្នឹងគឺលិចហើយ»។
លោក វី បានឲ្យដឹងថាដូច្នេះទើបក្រសួងធនធានទឹកណែនាំឲ្យអ្នកនៅតាមទីទំនាបប្រញាប់ ប្រមូលផលមុនទឹកលិចដល់៕
