.jpg)
លោក អ៊ូ ច័ន្ធរ័ត្ន ម្នាក់ក្នុងចំណោម ៥ នាក់ ដែលបាលដាក់ពាក្យស្នើសម្បទា។ ហេង ជីវ័ន
ភ្នំពេញៈ មនុស្សទី ៤ ត្រូវបានផ្តល់ឲ្យនូវសម្បទាឡើងវិញខណៈមនុស្ស ៥ នាក់បន្ថែមទៀតបានដាក់សំណើកាលពីថ្ងៃចន្ទដែលបើទោះបីនេះជារបត់នយោបាយថ្មីមួយក្តី ប៉ុន្តែក្រុមអ្នកវិភាគនិយាយថា ការផ្តល់សម្បទានយោបាយតែមួយ គឺមិនគ្រប់គ្រាន់ ដើម្បីរក្សា «គម្រោងអនុគ្រោះពន្ធសម្រាប់ការនាំចូលអ្វីៗគ្រប់យ៉ាងលើកលែងតែអាវុធ (EBA)» របស់សហភាពអឺរ៉ុបទេ។
លោក សាយ ឈុំ ប្រមុខរដ្ឋស្តីទី កាលពីថ្ងៃចន្ទបានផ្តល់សម្បទានយោបាយដល់លោក រៀល ខេមរិន្រ្ទ អតីតតំណាងរាស្រ្តគណបក្សសង្គ្រោះជាតិ តាមសំណើរបស់លោក។ នេះបើយោងតាមព្រះរាជក្រឹត្យចុះហត្ថលេខាកាលពីថ្ងៃចន្ទ។
លោក ខេមរិន្ទ្រ គឺជាអ្នកទី ៤ ដែលត្រូវបានផ្តល់ឲ្យនូវការស្តារសម្បទាបែបនេះ ចាប់តាំងពីច្បាប់វិសោធនកម្មបានចូលជាធរមាន កាលពីខែមករា។
ច្បាប់វិសោធនកម្ម បានត្រួសត្រាយផ្លូវ សម្រាប់អ្នកនយោបាយដែលត្រូវបានហាមពីនយោបាយឲ្យអាចត្រឡប់ចូលសង្វៀននយោបាយវិញ ដោយមិនចាំបាច់រង់ចាំរយៈពេល ៥ ឆ្នាំ។
លោក ខេមរិន្ទ្របានប្រាប់ភ្នំពេញប៉ុស្តិ៍ កាលពីថ្ងៃចន្ទថា៖ «ខ្ញុំរីករាយដែលទទួលបានសម្បទាឡើងវិញ។ ខ្ញុំបានរៀបចំឈ្មោះគណបក្សថ្មី និងឡូហ្គោរួចហើយ។ ប៉ុន្តែខ្ញុំមិនអាចបង្ហាញទៅសាធារណជននាពេលឥឡូវបានទេ។ ខ្ញុំរង់ចាំរហូតដល់មានការសម្រេចពីក្រសួងមហាផ្ទៃ។ គណបក្សនេះ នឹងចូលរួមដោយអ្នកស្នេហាជាតិដែលស្រឡាញ់ និងទុកចិត្តខ្ញុំ»។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងថា មនុស្ស៥នាក់ទៀត បានដាក់សំណើសុំស្តារសម្បទារួមមានអតីតតំណាងរាស្រ្ត ៤ នាក់ គឺ លោក អ៊ូ ច័ន្ទរ័ត្ន លោក ជីវ កត្តា លោកស្រី ទេព សុទ្ធី លោក កង គឹមហាក់ និងលោក ច័ន្ទ សិលា។ លោកថ្លែងថា កាលពីពេលថ្មីៗនេះ មនុស្ស ២៦ នាក់បានព្រលយថា ពួកគេនឹងធ្វើសំណើដែរ ប៉ុន្តែ ៧ នាក់រួចហើយបានដាក់សំណើ ហើយប្រហែល ១៩ នាក់ទៀត នឹងធ្វើនាពេលក្រោយ។
លោក អ៊ូ ច័ន្ធរ័ត្ន បានបដិសេធធ្វើអត្ថាធិប្បាយ អំពីមូលហេតុនៃការស្នើសុំសម្បទាកាលពីថ្ងៃចន្ទ។ ប៉ុន្តែ លោកស្រីទេព សុទ្ធី បានថ្លែងថា លោកស្រីមានគោលដៅ ៣ ចំពោះការស្នើសុំសិទ្ធិនយោបាយវិញនេះ។
លោកស្រីថ្លែងថា៖ «ទី១ [យើង]ចង់រក្សា EBA សម្រាប់កម្ពុជា។ ទី២ យើងចង់ឃើញការសម្រុះសម្រួល និងការផ្សះផ្សាជាតិ។ ខ្ញុំមិនមែនជាមនុស្សស្វែងរកបញ្ហាទ»។
លោកស្រីថ្លែងថា ប្រសិនបើ EBA បាត់បង់ វានឹងពិបាកទទួលបានវិញ។ «វាក៏នឹងផ្តល់ឲ្យខ្ញុំនូវសិទ្ធិមនុស្សផងដែរ។ ចាប់ពីពេលឥឡូវ រហូតដល់ឆ្នាំ ២០២២ វាអាចទៅរួចសម្រាប់ខ្ញុំ ក្នុងការប្រកួតប្រជែងនៅក្នុងការបោះឆ្នោតនាពេលក្រោយ។ ខ្ញុំមិនដឹងទេឥឡូវនេះ ប៉ុន្តែខ្ញុំត្រូវតែធ្វើឲ្យខ្លួនឯងមានសិទ្ធិ»។
អ្នកវិភាគនយោបាយ លោក ឯម សុវណ្ណារ៉ា បានថ្លែងថា ការផ្តល់សិទ្ធិនយោបាយតែមួយមិនគ្រប់គ្រាន់ក្នុងការរក្សា EBA នោះទេ ដោយសារសហភាពអឺរ៉ុប ទាមទារលក្ខខណ្ឌដទៃៗទៀតជាច្រើន រួមមានការធ្វើវិសោធនកម្មច្បាប់ស្តីពីគណបក្សនយោបាយ ច្បាប់ស្តីពីសហជីព និងការដោះលែងលោក កឹម សុខា មេដឹកនាំអតីតគណបក្សប្រឆាំង។ «ប្រសិនបើពួកគេទាំងអស់គ្នា ដាក់សំណើ វានឹងបង្ហាញថា លម្ហប្រជាធិបតេយ្យមានលក្ខណៈទូលំទូលាយ ក្នុងប្រទេសកម្ពុជា។ ប៉ុន្តែជាមួយនឹងចំនួនតិចតួចនេះ វានឹងមិនទាក់ទាញធ្វើឲ្យសហភាពអឺរ៉ុប បន្ទន់ជំហរបស់ពួកគេ លើការរក្សា EBA សម្រាប់កម្ពុជានោះទេ»។
លោកបានថ្លែងថា បើទោះបីជាមានការធ្វើសំណើបន្តបន្ទាប់ និងការផ្តល់សម្បទាបន្តបន្ទាប់ក៏ដោយ ក៏នេះមិនទាន់ជាការផ្សះផ្សាជាតិដែរ។ «ការផ្សះផ្សាជាតិ ត្រូវការការសន្ទនារវាងគណបក្សកាន់អំណាច និងអតីតគណបក្សប្រឆាំង។ ប៉ុន្តែបច្ចុប្បន្ននេះ គណបក្សទាំង ២ កំពុងប្រឈមមុខដាក់គ្នា»។
លោកថា ដីកាបង្គាប់ឲ្យចាប់ខ្លួនមេដឹកនាំ ៨ នាក់របស់អតីតគណបក្សសង្គ្រោះជាតិ ដែលត្រូវបានចេញកាលពីពេលថ្មីៗបង្ហាញថា៖ «ស្ពានសម្រាប់គណបក្សទាំង ២ មិនបើកចំហទេ»។
អ្នកវិភាគនយោបាយ លោក ឡៅ ម៉ុងហៃបានថ្លែងថា រដ្ឋាភិបាល នៅតែចៀសវាងមិននិយាយអំពីការឆ្លើយតបទៅនឹងលក្ខខណ្ឌដែលកំណត់នៅក្នុង EBA។
លោកបានថ្លែងដោយសំដៅទៅដំណើរទស្សនកិច្ចរបស់សហភាពអឺរ៉ុប មកកម្ពុជានាសប្តាហ៍នេះថា៖ «វានឹងត្រូវតែដោះស្រាយអ្វី ដែលត្រូវបានមើលឃើញយ៉ាងទូលំទូលាយថា ជាបញ្ហាសំខាន់ គឺការដោះលែងលោក កឹម សុខា នៅពេលជួបជាមួយគណៈប្រតិភូសហភាពអឺរ៉ុប»៕
