.jpg)
កម្មកររោងចក្រកាត់ដេរដែលធ្វើដំណើរចេញពីភ្នំពេញទៅខេត្តកំពង់ឆ្នាំង ត្រូវសមត្ថកិច្ចចាប់បញ្ជូនទៅធ្វើចត្តាឡីស័ក នៅរសៀលថ្ងៃនេះ។ រូបថត ស្នងការដ្ឋាននគរបាលខេត្តកំពង់ឆ្នាំង
ភ្នំពេញ៖ កម្មកររោងចក្រកាត់ដេរប្រុស និងស្រីចំនួន ៥ នាក់ ត្រូវបានអាជ្ញាធរស្រុកជលគិរី ខេត្តកំពង់ឆ្នាំង ចាប់បញ្ជូនទៅមណ្ឌលចត្តាឡីស័កភ្លាមៗ បន្ទាប់ពីពួកគេនាំគ្នាជិះម៉ូតូចេញពីរាជធានីភ្នំពេញទៅដល់ភូមិ-ឃុំពាមឆ្កោក ស្រុកជលគិរី ខេត្តកំពង់ឆ្នាំង នៅថ្ងៃទី២៦ មេសា។
លោក ហ៊ឹម យ៉ុង អធិការនគរបាលស្រុកជលគិរី បានឱ្យដឹងនៅថ្ងៃទី ២៦ មេសាថា បុគ្គលទាំង ៥ នាក់នោះមាន ឈ្មោះទី១-ទិត្យ មាន ភេទប្រុស អាយុ ២៥ ឆ្នាំ ទី២-សួង វិចិត្រ ទី៣-ស្រិន ម៉ារី ភេទស្រី អាយុ ២២ ឆ្នាំ ទី៤-ទិត្យ ភ័ស ភេទប្រុស អាយុ ២៦ ឆ្នាំ (បងប្អូន ទិត្យ មាន)និងទី៥-សន វីរៈ ភេទប្រុស អាយុ ២៦ ឆ្នាំ ពួកគេរស់នៅក្នុងភូមិ-ឃុំពាមឆ្កោក ស្រុកជលគិរី ខេត្តកំពង់ឆ្នាំង។
លោក យ៉ុង ប្រាប់ថា៖ «ដោយសារតែអាជ្ញាធរយើងមានការប្រុងប្រយ័ត្នខ្ពស់ហើយម៉្យាងទៀត យើងបានអនុវត្តយ៉ាងតឹងរ៉ឹងនូវបទបញ្ជារបស់រាជរដ្ឋាភិបាល ដូច្នេះបើមានមនុស្សចូលស្រុកយើងត្រូវអនុវត្តតាមវិធានសុខាភិបាលភ្លាម»។
លោកបញ្ជាក់ថា នៅព្រឹកថ្ងៃទី ២៦ មេសា មានមនុស្សប្រុស និងស្រី បានធ្វើដំណើរពីរាជធានីភ្នំពេញមកដល់ភូមិពាមឆ្កោក ឃុំពាមឆ្កោក ធ្វើឱ្យអ្នកភូមិមានការភ្ញាក់ផ្អើលគ្រប់ៗគ្នាព្រោះថា អំឡុងពេលបិទខ្ទប់នេះមិនគួរណាអ្នកទាំង ៥ នាក់នេះ ហ៊ានធ្វើដំណើរមកដល់ស្រុកបែបនេះទេ។
លោកថ្លែងថា៖ «ដោយសារតែយើងអនុវត្តវិធានសុខាភិបាលអ៊ីចឹងពួកគាត់ត្រូវតែចូលមណ្ឌលធ្វើចត្តាឡីស័ក។ យើងមិនដឹងថា តើសុខភាពរបស់ពួកគាត់យ៉ាងម៉េចទេ»។
លោកប្រាប់ថា ចាប់តាំងពីអនុវត្តវិធានការបិទខ្ទប់មកនៅក្នុងស្រុកជលគិរី មិនមានមនុស្សរត់មកភូមិកំណើតច្រើនទេ។ បើសិនជាមានក៏ត្រូវអាជ្ញាធរស្រុកនាំទៅធ្វើចត្តាឡីស័កដែរ ព្រោះអាជ្ញាធរខ្លាចមានការចម្លងមេរោគដ៏កាចសាហាវនេះ។
លោកឧត្តមសេនីត្រីយ៍ អៀរ ប៊ុនធឿន អ្នកនាំពាក្យស្នងការដ្ឋាននគរបាលខេត្តកំពង់ឆ្នាំង ប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៦ មេសាដែរថា ចាប់តាំងពីអនុវត្តនូវវិធានការបិទខ្ទប់ និងអនុវត្តតាមវិធានរបស់ក្រសួងសុខាភិបាលមក នៅទូទាំងខេត្តកំពង់ឆ្នាំងហាក់មិនសូវមានបុគ្គលល្មើសនឹងបម្រាមបិទខ្ទប់ខេត្តទេ។ ប៉ុន្តែសមត្ថកិច្ចរឹតបន្តឹងបែបនេះក្តីក៏បទល្មើសនៅតែកើតមានខ្លះៗដែរ ចំនួនតិចតួចទេ តែសមត្ថកិច្ច និងអាជ្ញារធរគ្រប់មូលដ្ឋានអាចគ្រប់គ្រងបាន។
លោកថ្លែងថា៖ «ករណីនេះ ដោយសារពលរដ្ឋលោកយល់ច្បាស់ថា បើប្រព្រឹត្តខុសនឹងច្បាប់ត្រូវមានទោស។ តែមានបុគ្គលមួយចំនួនតូចទេដែលយើងបានចាប់ទៅតុលាការ និងផាកពិន័យ»៕
