ភ្នំពេញៈ កម្លាំងគណៈបញ្ជាការឯកភាពខណ្ឌមានជ័យ និងព្រះរាជអាជ្ញារងអមសាលាដំបូងរាជធានីភ្នំពេញបានបើកប្រតិបត្តិការទ្រង់ទ្រាយធំបង្ក្រាបគ្រឿងញៀនមួយកន្លែង ដោយបានឃាត់ខ្លួនមនុស្សប្រុស-ស្រីចំនួន ២៥ នាក់ព្រមទាំងដកហូតថ្នាំញៀន ២១ កញ្ចប់កាលពីព្រឹកថ្ងៃទី ១៨ ខែកញ្ញា។
លោក ឌី រ័ត្នខេមរុណ អភិបាលរងខណ្ឌមានជ័យប្រាប់អ្នកសារព័ត៌មាន បន្ទាប់ពីប្រតិបត្តិការនោះថាការបង្ក្រាបគ្រឿងញៀនទ្រង់ទ្រាយធំនេះធ្វើឡើងក្រោមការបញ្ជាផ្ទាល់ពីលោក ពេជ្រ កែវមុន្នី អភិបាលខណ្ឌមានជ័យ និងលោកស្រី ម៉ាកនី ព្រះរាជអាជ្ញារង និងមានការចូលរួមពីមន្ត្រីនគរបាលអធិការដ្ឋានខណ្ឌមានជ័យ មន្ត្រីកងរាជអាវុធហត្ថខណ្ឌ និងមន្ត្រីនគរបាលប៉ុស្តិ៍សង្កាត់ស្ទឹងមានជ័យ ២។ កម្លាំងសរុបចំនួន ១២០ នាក់ចុះប្រតិបត្តិការបង្ក្រាបនៅទីលានចាក់សំរាមចាស់ស្ថិតក្នុងសង្កាត់ស្ទឹងមានជ័យ។
លោកបញ្ជាក់ថា៖ «ក្រុមនេះតែងតែឆ្លៀតឱកាសចែកចាយគ្រឿងញៀននៅតំបន់ចាក់សំរាមនេះ ដូច្នេះហើយដោយសារតែថ្ងៃនេះមានការឯកភាពពីអភិបាលខណ្ឌបង្កើតគណៈកម្មការ ហើយបានបើកប្រតិបត្តិការទ្រង់ទ្រាយធំនេះដោយបានឃាត់ខ្លួនមនុស្សប្រុស-ស្រី ២៥ នាក់ ស្រី ៦ នាក់ព្រមទាំងដកហូតថ្នាំញៀន ២១ កញ្ចប់ក្នុងនោះ ២ កញ្ចប់ធំ។ ឧបករណ៍ប្រើប្រាស់គ្រឿងញៀនមួយចំនួន និងម៉ូតូ ២ គ្រឿង»។
លោកបន្ថែមថា បន្ទាប់ពីឃាត់ខ្លួនអ្នកពាក់ព័ន្ធហើយសមត្ថកិច្ចក៏បានធ្វើការរុះខ្ទមអស់ ៥ និងដុតកម្ទេច ១ ខ្ទមដោយសារតែខ្ទមទាំងនេះត្រូវបានប្រើប្រាស់ដើម្បីធ្វើការចែកចាយគ្រឿងញៀន។
លោកបន្តថា៖ «យើងរុះរើមិនឲ្យកើតមាននៅលើទីតាំងនេះទៀតទេ ដោយសារតែកន្លងមកក្រុមចែកចាយគ្រឿងញៀននេះបានធ្វើការចែកចាយនៅផ្លូវ ៦០ ម៉ែត្រ ហើយអាជ្ញាធរខណ្ឌតែងតែចុះបង្ក្រាបនៅតាមបណ្តោយផ្លូវ ៦០ ម៉ែត្រ»។
លោក ឌី រ័ត្នខេមរុណ ឲ្យដឹងថា បន្ទាប់មកសមត្ថកិច្ចធ្វើការសាកសួរនៅប៉ុស្តិ៍ប៉ូលិស ដើម្បីវែកមុខសញ្ញា ថាតើមានអ្នកពាក់ព័ន្ធណាខ្លះជាអ្នកចែកចាយ និងអ្នកណាខ្លះជាអ្នកប្រើប្រាស់។ សមត្ថកិច្ចនឹងបញ្ជូនអ្នកទាំងនោះទៅកាន់សាលាដំបូងរាជធានីភ្នំពេញដើម្បីចាត់វិធានការទៅតាមច្បាប់។
លោកបញ្ជាក់ថា៖ «យើងមិនទាន់ដឹងនៅពេលណាដែលយើងនឹងបញ្ជូនពួកគេទៅកាន់តុលាការនោះទេ ពីព្រោះវាមានចំនួនច្រើនពេក។ ពេលណាយើងស៊ើបសួរចប់ យើងនឹងបញ្ជូនទៅហើយ។ នីតិវីធីនៃការឃាត់ខ្លួនមិនលើសពី ៤៨ ម៉ោងនោះទេ»។
លោកអះអាងថាក្នុងមនុស្សប្រុស-ស្រីចំនួន ២៥ នាក់ ដែលសមត្ថកិច្ចឃាត់ខ្លួនក្នុងប្រតិបត្តិការបង្ក្រាបគ្រឿងញៀននោះពុំមានក្មេងក្រោមអាយុនោះទេ។
លោក មាស សុវណ្ណ ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា គាំទ្រចំពោះការបង្ក្រាបនេះ។ លោកថាការបង្ក្រាបខាងលើនេះគឺជាផ្នែកមួយនៃបទបញ្ជារបស់អាជ្ញាធរជាតិប្រឆាំងគ្រឿងញៀនដែលបានដាក់ចេញនាពេលកន្លងមក។
លោកថ្លែងថា៖ «ឥឡូវនេះថ្នាក់ដឹកនាំគ្រប់លំដាប់ថ្នាក់ ទាំងថ្នាក់ជាតិ និងក្រោមជាតិ គឺមានផែនការប្រយុទ្ធប្រឆាំងគ្រឿងញៀន ហើយសហការគ្នាដើម្បីបង្ក្រាបគ្រឿងញៀន។ សមត្ថកិច្ចត្រូវធ្វើការផ្សព្វផ្សាយ ដើម្បីជួយទប់ស្កាត់ និងបញ្ជ្រាបការយល់ដឹងពីផលប៉ះពាល់នៃគ្រឿងញៀន»។
លោកក៏ស្នើឲ្យសមត្ថកិច្ចខិតខំបន្ថែមក្នុងការទប់ស្កាត់ទីផ្សារនាំចេញចែកចាយដែលនាំឲ្យមានការប្រើប្រាស់គ្រឿងញៀន និងជួយផ្សព្វផ្សាយដល់សហគមន៍ពីការព្យាបាល និងស្ដារនីតិសម្បទា។
ជាមួយគ្នានេះយោងតាមគេហទំព័រអគ្គស្នងការដ្ឋាននគរបាលជាតិឲ្យដឹងថា ការបង្ក្រាបគ្រឿងញៀនទូទាំងប្រទេសនៅថ្ងៃទី ១៧ កញ្ញានេះបានចំនួន ២៩ ករណី ឃាត់ខ្លួនជនសង្ស័យចំនួន ៤៦ នាក់ ដែលមានស្រី ៣ នាក់។ ក្នុងចំណោមជនសង្ស័យទាំងនោះមានមុខសញ្ញាជួញដូរគ្រឿងញៀនចំនួន ២៩ នាក់ និងអ្នកប្រើប្រាស់ ១៧ នាក់ ។
គេហទំព័របន្ថែមថា វត្ថុតាងដែលចាប់សរុបថ្ងៃទី ១៧ កញ្ញារួមមាន មេតំហ្វេតាមីន (ICE) ទម្ងន់ ៣៧.២៩ ក្រាម និង ៤៣ កញ្ចប់តូច៕