មណ្ឌលគិរីៈ បុរសម្នាក់ក្នុងចំណោម ៣ នាក់ត្រូវបានចាប់ខ្លួនបញ្ជូនទៅតុលាការខេត្តមណ្ឌលគិរី ក្រោយពីបានឆែកឃើញសាច់សត្វទន្សោងព្រៃក្រៀមទម្ងន់ ៧៦ គីឡូក្រាម កំពុងដឹកចេញពីដែនជម្រកសត្វព្រៃលំផាត់ក្នុងភូមិរវាក់ ឃុំរយ៉ ស្រុកកោះញែក និងរឹបអូសបានអាវុធ AK ស្វ័យបត់ ១ ដើម។
លោក ម៉ម វ៉ាន់ដា អ្នកនាំពាក្យអយ្យការអមសាលាដំបូងខេត្តមណ្ឌលគិរីប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យឈ្មោះ ព្រុត កាដុល ត្រូវបានព្រះរាជអាជ្ញារងធ្វើការចោទប្រកាន់ពីបទប្រើប្រាស់អាវុធជាតិផ្ទុះដែលធ្វើឲ្យខូចខាតដល់ធនធានធម្មជាតិ។
លោកថ្លែងថា៖ «ឥឡូវនេះ ជនសង្ស័យត្រូវបញ្ជូនបន្តទៅចៅក្រមស៊ើបសួរទៀតដើម្បីសម្រេចចោទប្រកាន់ចុងក្រោយ»។
លោក កែវ សុភ៌គ ប្រធានមន្ទីរបរិស្ថានខេត្តមណ្ឌលគិរីបានឲ្យដឹងថា ជនសង្ស័យឈ្មោះ ព្រុត កាដុល អាយុ ២៩ ឆ្នាំ និងឈ្មោះមនុស្ស ២ នាក់ទៀត ដែលកំពុងគេចខ្លួនត្រូវបានបញ្ជូនទៅសាលាដំបូងខេត្តមណ្ឌលគិរីកាលពីថ្ងៃទី ៧ កញ្ញា។ មនុស្សទាំង ៣ នាក់ត្រូវបានចោទប្រកាន់ពាក់ព័ន្ធនឹងបទល្មើសជួញដូរសាច់សត្វព្រៃ។
លោក សុភ៌គ បានថ្លែងថា៖ «បើតាមខ្ញុំដឹងគឺខាងអយ្យការកំពុងតែចាត់ការលើសំណុំរឿងនេះហើយ។ ចំពោះអ្នកគេចខ្លួន ២ នាក់ ខ្ញុំសុំមិនបញ្ចេញឈ្មោះទេ»។
លោករំឭកប្រាប់ថា ករណីនេះកាលពីថ្ងៃទី ៥ ខែ កញ្ញា ឆ្នាំ ២០២០ វេលាម៉ោង ១៥ និង ៤០ នាទី មន្ត្រីឧទ្យានុរក្ស ប្រចាំការនៅស្នាក់ការអូររវាក់ក្នុងដែនជម្រកសត្វព្រៃលំផាត់ ខេត្តមណ្ឌលគិរី បានចុះល្បាតស្រាប់តែប្រទះឃើញជនសង្ស័យចំនួន ៣ នាក់ កំពុងជិះម៉ូតូ ២ គ្រឿង ដោយមានដឹកការុងដែលសង្ស័យថា អាចជាប់ពាក់ព័ន្ធនឹងបទល្មើសសត្វព្រៃ។ ពេលដេញទាន់ស្រាប់តែបុរស ២ នាក់បានផ្តួលម៉ូតូចោល ហើយរត់គេចខ្លួនចូលក្នុងព្រៃបាត់ រីឯម្នាក់ទៀតរត់មិនទាន់ក៏ត្រូវមន្ត្រីអនុរក្សចាប់បាន។ ក្រោយពីចាប់ខ្លួនបានឆែកឆេរក្នុងការុង ឃើញមានសាច់សត្វទន្សោងព្រៃក្រៀមទម្ងន់ ៧៦ គីឡូក្រាម និងម៉ូតូម៉ាកវ៉េវចំនួន ២ គ្រឿងទៀតត្រូវបានរក្សាទុកនៅមន្ទីរបរិស្ថាន ខេត្តមណ្ឌលគិរី ដែលជាវត្ថុតាងនៃបទល្មើស។
លោក សុភ៌គ បានឲ្យដឹងទៀតថា ករណីបទល្មើសដោយឡែកមួយទៀត មន្ត្រីឧទ្យានុរក្ស ប្រចាំស្នាក់ការមេម៉ង់ និងបុគ្គលិកអង្គការ WWF ផ្នែកអនុវត្តច្បាប់ បានចុះល្បាតនៅចំណុចផ្លូវទៅខ្ញែងស្ថិតក្នុងភូមិខ្ញែង ឃុំចុងផ្លាស់ ស្រុកកែវសីមា ខេត្តមណ្ឌលគិរីបានប្រទះឃើញជនសង្ស័យចំនួន ២ នាក់ ជិះម៉ូតូ ១ គ្រឿង ចេញពីព្រៃកាលពីថ្ងៃទី ៦ ខែកញ្ញា ខណៈនោះក្រុមមន្ត្រីឧទ្យានុរក្ស និងមន្ត្រីអង្គការ WWF បានស្ទាក់ឃាត់ជនសង្ស័យបានទាំង ២ នាក់ ហើយពួកគេបានសារភាពថា ពួកគេចេញពីក្នុងព្រៃដើម្បីទៅមើលអន្ទាក់ ដែលពួកគេបានដាក់ចំនួន ២២ ខ្សែ ដើម្បីចាប់សត្វព្រៃ។
លោកបានឲ្យដឹងទៀតថា ក្រោយពីរឹបអូសយកវត្ថុតាង និងធ្វើការពិន័យអន្តរការណ៍ ពួកគេត្រូវបានដោះលែងឲ្យមានសេរីភាពវិញ៕