ភ្នំពេញៈ បុរសម្នាក់ស្លាប់ និង ២ នាក់ទៀតរងរបួសក្នុងហេតុការណ៍អគ្គិភ័យឆាបឆេះក្នុងបន្ទប់ជួល ១ កន្លែង នៅសង្កាត់ទឹកថ្លា ខណ្ឌសែនសុខកាលពីថ្ងៃទី ២៣ វិច្ឆិកា ដោយសារជនរងគ្រោះចម្អិនម្ហូប បណ្តាលឱ្យផ្ទុះធុងហ្គាសបង្កជាអណ្ដាតភ្លើង។ គ្រោះអគ្គិភ័យនេះកើតឡើងក្រោយពីសមត្ថកិច្ចជំនាញក៏បានចុះណែនាំពលរដ្ឋជាបន្តបន្ទាប់ឱ្យមានការប្រុងប្រយ័ត្នក្នុងការប្រើប្រាស់ធុងហ្គាស។
លោក សុខ សុផល នាយប៉ុស្ដិ៍នគរបាលរដ្ឋបាលសង្កាត់ទឹកថ្លាឱ្យដឹងពីម្សិលមិញថា សពជនរងគ្រោះ ឈ្មោះ ព្រីម សុខា ភេទប្រុស អាយុ ២១ ឆ្នាំ មុខរបរដើរម៉ៅការបុកគ្រឹះសំណង់ ស្នាក់នៅបន្ទប់ជួលកន្លែងកើតហេតុនៅភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ជនរងគ្រោះមានស្រុកកំណើត ស្រុកស្រីសន្ធរ ខេត្តកំពង់ចាម និងមានប្រពន្ធកំពុងមានផ្ទៃពោះ ៧ ខែ។ ចំណែកជនរងរបួសឈ្មោះ ព្រីម ឃីញ ភេទប្រុសអាយុ ២១ ឆ្នាំ (បងប្អូនភ្លោះ) និងក្មួយជីដូនមួយម្នាក់ស្នាក់នៅជាមួយគ្នាបានរងរបួសរលាកជើងទាំង ២ នាក់។
លោកបន្តថា មុនពេលកើតហេតុជនរងគ្រោះទាំង ៣ នាក់មកពីធ្វើការដូចសព្វមួយដង ហើយបាននាំគ្នាបើកធុងហ្គាសស្ងោរមាន់ធ្វើម្ហូប។ ប៉ុន្ដែមិនទាន់នឹងបានហូបផង ស្រាប់តែផ្ទុះធុងហ្គាសបណ្ដាលឱ្យឆាបឆេះផ្សែងខ្មួលខ្មាញ់ចេញពីបន្ទប់ជួល។ ពេលនោះបុរសជាប្អូន និងក្មួយបានរត់ចេញមកក្រៅ និងស្រែកឱ្យគេជួយ។ ចំណែកបុរសជាបងនៅក្នុងបន្ទប់ទឹកមិនបានចេញមកក្រៅទេ ដោយនៅស្តាយម៉ូតូ ១ គ្រឿង ហើយបម្រុងយកចេញមកក្រៅ។
បើតាមមេប៉ុស្តិ៍រូបនេះ ខណៈដែលប្អូនមិនឃើញបងចេញមកក្រៅក៏ចូលទៅជួយ បន្ទាប់មកបងបានចេញមកក្រៅ រីឯប្អូនដែលចូលទៅជួយបងនោះត្រូវបានភ្លើងឆាបឆេះខ្លោចស្លាប់នៅក្បែរម៉ូតូតែម្ដង។ ចំណែកបុរសជាបង និងក្មួយបានរងរបួសត្រូវបានរថយន្តសង្គ្រោះបន្ទាន់ដឹកទៅសង្គ្រោះនៅមន្ទីរពេទ្យភ្លាម។
លោក សុផល បញ្ជាក់ថា៖ «ក្រោយមកក៏ផ្អើលដល់ប្រជាពលរដ្ឋនាំគ្នារាយការណ៍ជូនសមត្ថកិច្ច ហើយហៅរថយន្តពន្លត់អគ្គិភ័យ ២ គ្រឿងមកជួយអន្តរាគមន៍ ខណៈមកដល់អគ្គិភ័យត្រូវបានរលត់ទៅវិញ។ សមត្ថកិច្ចយើងបានស្រាវជ្រាវ និងធ្វើកំណត់ហេតុប្រគល់សាកសពជូនទៅសាច់ញាតិយកទៅធ្វើបុណ្យតាមប្រពៃណី»។
លោក ហួរ ម៉េងវ៉ាង អធិការនគរបាលខណ្ឌសែនសុខបានបដិសេធធ្វើអត្ថាធិប្បាយជុំវិញករណីនេះ ដោយលោកអះអាងថាកំពុងជាប់រវល់ប្រជុំនៅស្នងការដ្ឋាននគរបាលរាជធានីភ្នំពេញមិនអាចនិយាយទូរស័ព្ទបាន។
ស្នងការរងនគរបាលរាជធានីភ្នំពេញទទួលបន្ទុកអគ្គិភ័យលោក ឈាង ផាន់ណារ៉ា ថ្លែងពីម្សិលមិញថា សមត្ថកិច្ចជំនាញបានចុះធ្វើយុទ្ធនាការអប់រំ និងណែនាំប្រជាពលរដ្ឋក៏ដូចជាអាជីវករលក់ដូរធុងហ្គាសនានានៅតាមតំបន់ ឬគោលដៅដែលងាយរងគ្រោះបំផុត។ ជាពិសេសនៅតំបន់ស្មុគស្មាញ តំបន់ផ្លូវតូចចង្អៀត និងតំបន់សំណង់មិនរៀបរយមួយចំនួនទៀត។
លោកបញ្ជាក់ថា៖ «យើងបានប្រជុំដាក់បន្ថែមផែនការចុះអប់រំ ណែនាំពលរដ្ឋនិងអាជីវករលក់ដូរហ្គាស ព្រោះពេលនេះចូលដល់រដូវលម្ហើយ និងរដូវក្ដៅ ដែលជាពេលវេលាងាយបង្កគ្រោះអគ្គិភ័យខ្លាំងបំផុត។ ដូច្នេះយើងទាមទារឱ្យប្រជាពលរដ្ឋយល់ដឹងពីការទុកដាក់ ការប្រើប្រាស់ធុងហ្គាសឱ្យបានត្រឹមត្រូវ ដើម្បីរួមចំណែកទប់ស្កាត់បញ្ហាអគ្គិភ័យកើតឡើងជាយថាហេតុ»។
លោក ផាន់ណារ៉ា ក៏បានចូលរួមសោកស្ដាយចំពោះហេតុការណ៍អាក្រក់នេះ ដែលបានកើតឡើង ដោយសារតែការប្រើប្រាស់ធុងហ្គាសខុសបច្ចេកទេស។ បើតាមលោកស្នងការរងក្នុងអំឡុងពេលចម្អិនអាហារនោះ ជនរងគ្រោះបានទុកម៉ូតូក្បែរចង្ក្រានបាយ ហើយម៉ូតូមានសាំងដែលធ្វើឱ្យងាយនឹងឆាបឆេះខ្លាំង។
លោក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិបានថ្លែងពីម្សិលមិញថា សមត្ថកិច្ចជំនាញបានចុះធ្វើការអប់រំ ណែនាំប្រជាពលរដ្ឋតាមគោលដៅសំខាន់ៗដែលងាយរងគ្រោះជាបន្តបន្ទាប់ ប៉ុន្ដែលោកមិនបានចាំច្បាស់ពីចំនួនគោលដៅទេ។
លោកបានថ្លែងថា៖ «យើងធ្វើការអប់រំដល់អាជីវករលក់ដូរកំប៉ុង ឬធុងហ្គាសជាហូរហែកន្លងមកហើយ ប៉ុន្ដែមិនដឹងថា ពួកគាត់យកចិត្តទុកដាក់កម្រិតណាទេ។ ខ្ញុំសូមអំពាវនាវឱ្យពលរដ្ឋចូលរួមទប់ស្កាត់ការបង្កអគ្គិភ័យដែលបណ្ដាលមកពីធុងហ្គាស ព្រោះអគ្គិភ័យអាចបង្កគ្រោះមហន្តរាយដល់សង្គមជាតិយើង»៕