.jpg)
គ្រូពេទ្យកំពុងសង្គ្រោះអ្នករបួសដោយសារផ្ទុះគ្រាប់។ រូបថត សហការី
បាត់ដំបងៈ មនុស្សម្នាក់ស្លាប់ និង ៣ នាក់រងរបួស ដោយសារគ្រាប់មិនទាន់ផ្ទុះ (គ្រាប់ B-40) បានផ្ទុះឡើងកាលពីថ្ងៃទី ៥ ខែឧសភា ខណៈពេលដែលពួកគេកំពុងដើររកផ្សិតនៅក្នុងព្រៃរបោះនៅក្នុងភូមិថ្មី ឃុំតាតោក ស្រុកសំឡូត ខេត្តបាត់ដំបង។ យោងតាមការឲ្យដឹងរបស់មន្ត្រីនគរបាល។
លោក កោ ប៊ុនកាំង អធិការនគរបាលស្រុកសំឡូតឲ្យដឹងពីម្សិលមិញថា ក្មេងប្រុសដែលស្លាប់មានអាយុ ១៥ ឆ្នាំ ក្មេងស្រីអាយុ ១៦ ឆ្នាំរងរបួសលើផ្ទៃមុខ ក្មេងប្រុសអាយុ ១៤ ឆ្នាំ រងរបួសដាច់ចុងច្រមុះ និងយុវជនអាយុ ២៥ ឆ្នាំ រងរបួសដាច់ដៃស្ដាំត្រឹមកែងដៃ ហើយភ្លាមៗនោះជនរងគ្រោះទាំង ៣ នាក់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តបាត់ដំបង។
លោក ប៊ុនកាំង បានឲ្យដឹងដោយយោងតាមសម្តីជនរងគ្រោះម្នាក់ថា៖ «ពួកគេបាននាំគ្នាចូលទៅព្រៃរបោះមួយដែលមានចម្ងាយពីភូមិប្រហែល ៦ គីឡូម៉ែត្រនៅចំណុចអូរជ្រៅ ភូមិថ្មី ឃុំតាតោក ដើម្បីរកដកផ្សិតលក់។ ពួកគេបាននាំគ្នាដើរសម្លឹងរកមើលផ្សិត ពេលនោះគ្នាគេម្នាក់ (អ្នកស្លាប់) រើសបានដែក ១ មានរាងមូល ប៉ុន្តែពួកគេមិនស្គាល់ថាជាអ្វីទេហើយជនរងគ្រោះបានយកទៅដំនៅលើគល់ឈើ រីឯពួកគេ ៣ នាក់ទៀតនាំគ្នាឈរមើលចៃដន្យដែកមូលនោះបានផ្ទុះឡើងតែម្តង ក្រោយពីផ្ទុះមកពួកគេមិនដឹងខ្លួនទេហើយមួយសន្ទុះក្រោយមកទើបឃើញមានមនុស្សឈរចោមរោមពួកគេ និងដឹកទៅមន្ទីរពេទ្យតែម្តង»។
លោក ប៊ុនកាំង បានឲ្យដឹងថា ក្រោយហេតុការណ៍សមត្ថកិច្ចបានចុះដល់កន្លែងកើតហេតុ និងពិនិត្យជុំវិញទីតាំងនោះឃើញមានអំបែងគ្រាប់ B-40 ១ គ្រាប់ដែលក្រុមជនរងគ្រោះរើសបានហើយដំលេង។
លោកថ្លែងថា៖ «តាមខ្សែបន្ទាត់ព្រំដែនកម្ពុជា-ថៃប្រមាណជា ១០-២០ គីឡូម៉ែត្រគ្រាប់នៅរាយប៉ាយក្នុងព្រៃ។ សំឡូតជាជម្រកជំរំទ័ពចម្រុះហើយ»។
លោកឲ្យដឹងថា ចំពោះជនរងគ្រោះក្រោយពីដឹកមកដល់ភូមិគេបានយកទៅសង្គ្រោះនៅមណ្ឌលសុខភាពឃុំដែលនៅជិត ប៉ុន្តែដោយស្ថានភាពរបួសធ្ងន់ពេកក្រុមគ្រួសារបាននាំគ្នាដឹកជនរងគ្រោះទៅមន្ទីរពេទ្យបង្អែកខេត្តបាត់ដំបងទៅ។
បន្ទាប់ពីគ្រូពេទ្យព្យាបាលបាន ២-៣ ថ្ងៃមកដល់ពេលនេះឃើញថាស្ថានភាពជនរងគ្រោះទាំង ៣ នាក់បានប្រសើរបន្តិចហើយចំពោះអ្នកដែលទៅដកផ្សិតនោះខ្លះមកពីស្រុកវាលវែងខេត្តពោធិ៍សាត់ និងអ្នកខ្លះមកពីស្រុករតនមណ្ឌល ខេត្តបាត់ដំបងដែលផ្សិតនោះច្រើនតែដុះនៅលើដីថ្មីដែលទើបឆេះភ្លើងហើយ ហើយផ្សិតនោះមានលក្ខណៈមូលៗប៉ុនមេដៃ មេជើងដែលគេលក់ក្នុង ១ គីឡូក្រាមបាន ៧ ទៅ ៨ ម៉ឺនរៀលដែរ ប៉ុន្តែវាដុះក្នុងរយៈ ១០ ថ្ងៃទៅកន្លះខែប៉ុណ្ណោះក្នុង ១ ឆ្នាំម្តង។
លោក ព្រីង បញ្ញារិទ្ធ មន្ត្រីស៊ីម៉ាក់ប្រចាំខេត្តបាត់ដំបង ខេត្តពោធិ៍សាត់ និងខេត្តប៉ៃលិនបានឲ្យដឹងកាលពីម្សិលមិញថា នៅស្រុកសំឡូតក្នុងខេត្តបាត់ដំបងជនដែលរងគ្រោះដោយគ្រាប់មីន ឬគ្រាប់យុទ្ធភណ្ឌមិនទាន់ផ្ទុះមានចំនួនកើនជាងឆ្នាំមុនបន្តិចតែលោកមិនចាំតួលេខទេដោយសារតែប្រជាពលរដ្ឋចេះតែដើរចូលរុករកសត្វនៅក្នុងព្រៃដែលជាកន្លែងអង្គភាពស៊ីម៉ាក់មិនទាន់បានដោះមីន ឬសម្អាតគ្រាប់មីន ខណៈតំបន់តាមព្រំដែនរាជរដ្ឋាភិបាលកម្ពុជាមិនទាន់អនុញ្ញាតឲ្យដោះទេតែពលរដ្ឋចេះតែទៅរកសត្វក្នុងតំបន់ដែលហាមឃាត់។
លោកប្រាប់ថា អង្គភាពស៊ីម៉ាក់បានធ្វើការដោះមីននៅតាមតំបន់ដីភូមិដើម្បីឲ្យប្រជាពលរដ្ឋធ្វើស្រែចម្ការ ហើយខាងស៊ីម៉ាក់ដោះមីនតែតំបន់ក្បែរៗភូមិសិនទេ ចំណែកនៅតំបន់ព្រៃជ្រៅៗគឺមិនទាន់បានបោសសម្អាតនៅឡើយទេ។ រីឯស្រុកវាលវែងដែលមានព្រំប្រទល់ជាប់សំឡូតក៏សម្បូរគ្រាប់មីនច្រើនដែរ៕
