.jpg)
រថយន្តធុនតូច និងធុនធំជួបគ្រោះថ្នាក់ចរាចរណ៍បុកគ្នានៅលើកំណាត់ផ្លូវជាតិលេខ ៤ ថ្ងៃទី ២២ សីហា។រូប FB
ភ្នំពេញៈ មនុស្សចំនួន ២១ នាក់ស្លាប់ និង ៧០ នាក់រងរបួសធ្ងន់ស្រាល ដោយសារគ្រោះថ្នាក់ចរាចរណ៍កើតឡើងនៅទូទាំងប្រទេសចំនួន ៥១ លើក អំឡុងពេលនៃការឈប់សម្រាកសងថ្ងៃបុណ្យចូលឆ្នាំខ្មែររយៈពេល ៥ ថ្ងៃកន្លងទៅនេះ។ តួលេខនេះមានការកើនឡើង ១០ លើក ឬស្មើនឹង ២៤ ភាគរយក្នុងនោះទីក្រុងភ្នំពេញកើតឡើងច្រើនជាងគេ។
យោងតាមរបាយការណ៍របស់អគ្គស្នងការដ្ឋាននគរបាលជាតិដែលបានចេញផ្សាយនៅចុងសប្តាហ៍មុននេះឱ្យដឹងថា ចាប់ពីថ្ងៃទី ១៧ ដល់ថ្ងៃទី ២១ ខែសីហាកន្លងមកនេះ ករណីគ្រោះថ្នាក់ចរាចរណ៍នៅទូទាំងប្រទេសមានការកើនឡើងបើប្រៀបធៀបនឹងរយៈពេលដូចគ្នាទៅនឹងឆ្នាំ ២០១៩។ ប៉ុន្តែចំនួននៃអ្នកស្លាប់មាន ២១ នាក់ដែលមានការថយចុះចំនួន ១ នាក់ ឬស្មើនឹង ៥ ភាគរយ បើធៀបនឹងឆ្នាំមុនដែលមានអ្នកស្លាប់ចំនួន ២២ នាក់។
ប្រភពដដែលបានបន្ថែមថា ចំនួនអ្នករងរបួសដោយគ្រោះថ្នាក់ចរាចរណ៍នេះ មានចំនួន ៧០ នាក់ដែលមានការកើនឡើងចំនួន ២០ នាក់ ឬស្មើនឹង ៤០ ភាគរយ។ ករណីគ្រោះថ្នាក់ចរាចរណ៍នេះដែរក៏បានបង្កឱ្យមានការខូចខាតម៉ូតូចំនួន ៥៩ គ្រឿង និងរថយន្តចំនួន ៣០ គ្រឿង។
លោក គង់ រតនៈ នាយកវិទ្យាស្ថានសុវត្ថិភាពចរាចរណ៍ប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្នុងអំឡុងពេលនៃការឈប់សម្រាករយៈពេល ៥ ថ្ងៃកន្លងមកនេះលោកសង្កេតឃើញថា ឥរិយាបថរបស់ប្រជាពលរដ្ឋដែលជាអ្នកប្រើប្រាស់ផ្លូវនៅមិនទាន់ប្រតិបត្តិល្អទៅតាមការកំណត់របស់ច្បាប់ទេ។ ពីព្រោះចំនួនគ្រោះថ្នាក់នៅតែកើតមានឡើងច្រើន។ មុនពេលឈប់សម្រាក ករណីគ្រោះថ្នាក់ចរាចរណ៍មានការថយចុះដែលក្នុង ១ ថ្ងៃពី ៥ ឬ ៦ នាក់មកនៅតែ ៣ ឬ ៤ នាក់។
លោក រតនៈ បន្តថា មុនពេលឈប់សម្រាក សមត្ថកិច្ចមានការរឹតបន្តឹងច្បាប់ច្រើនដែលធ្វើឱ្យគ្រោះថ្នាក់មានការថយចុះ។ ចំណុចនេះបង្ហាញពីប្រសិទ្ធភាពនៃការអនុវត្តច្បាប់មានន័យថា ប្រជាពលរដ្ឋខ្លាចប៉ូលិសជាងខ្លាចច្បាប់។ បើទោះបីជាមានមន្ត្រីប៉ូលិសយាមនៅតាមគោលដៅសំខាន់ៗ ប៉ុន្តែពួកគាត់មិនបានរឹតបន្តឹងច្បាប់នោះទេ គឺគ្រាន់តែឈរដើម្បីជួយសម្រួលចរាចរណ៍ច្រើនជាង។
លោកមានប្រសាសន៍ថា៖ «អ្វីដែលជាកង្វល់របស់ខ្ញុំ នៅពេលដែលមិនមានការពង្រឹងច្បាប់ឱ្យបានហ្មត់ចត់ ឬឱ្យច្បាស់លាស់តឹងរ៉ឹងទេ នោះចំនួននៃការកើនឡើងនៃគ្រោះថ្នាក់នេះមិនមានអ្វីចម្លែកទេ វាជារឿងធម្មតា។ យើងចង់ឃើញមានការអនុវត្តច្បាប់ឱ្យបានស្មើៗគ្នា តម្លាភាព និងធ្វើឱ្យបានជាប់លាប់»។
លោក គង់ រតនៈ បានបញ្ជាក់ថា ឥរិយាបថរបស់ប្រជាពលរដ្ឋខ្មែរដែលមិនសូវមានការគោរពច្បាប់ចរាចរណ៍នេះកើតមានតាំងពីយូរណាស់មកហើយ។ ដូច្នេះហើយការកែប្រែរបស់ពួកគាត់មិនអាចចំណាយពេលវេលាខ្លីក្នុងការកែប្រែដែរ ប៉ុន្តែអ្វីដែលត្រូវធ្វើមុនគេនោះ គឺធ្វើឱ្យប្រជាពលរដ្ឋមើលឃើញថា ប្រព័ន្ធច្បាប់នៃការអនុវត្តមានភាពស្មើៗគ្នាដោយមិនមានអ្នកល្មើសច្បាប់ណាមួយរួចផុតពីច្បាប់នោះទេ។
អគ្គស្នងការដ្ឋាននគរបាលជាតិបានលើកឡើងថា គ្រោះថ្នាក់ចរាចរណ៍ដែលបានកើតឡើងគឺមាននៅរាជធានីភ្នំពេញ ខេត្តពោធិ៍សាត់ ខេត្តបាត់ដំបង ខេត្តកណ្តាល ខេត្តតាកែវ ខេត្តឧត្តរមានជ័យ ខេត្តបន្ទាយមានជ័យ ខេត្តព្រះវិហារ ខេត្តស្វាយរៀង ខេត្តកំពង់ស្ពឺ និងខេត្តក្រចេះ។
តាមរបាយការណ៍ចំពោះការពង្រឹងការអនុវត្តច្បាប់ចរាចរណ៍ផ្លូវគោកគឺត្រូវបានយកចិត្តទុកដាក់ខ្ពស់ ដោយសារសមត្ថកិច្ចគ្រប់គោលដៅបានធ្វើការត្រួតពិនិត្យយានយន្តទាំងនៅតាមចំណតដើមទី តាមដងផ្លូវជាតិ និងគោលដៅសំខាន់ៗនៅក្នុងភូមិសាស្ត្ររាជធានី-ខេត្តដោយបានរកឃើញយានយន្តល្មើស និងផាកពិន័យសរុបចំនួន ៣ ៨៩១ គ្រឿងក្នុងនោះម៉ូតូចំនួន ២ ៨៨២ គ្រឿង៕
