ភ្នំពេញៈ រយៈពេល ៦ ខែឆ្នាំ ២០២០ នេះ ករណីគ្រោះអគ្គិភ័យបានកើនឡើងខ្ពស់ជាងឆ្នាំមុនចំនួន ២៦២ លើក និងបានបណ្ដាលឲ្យជនរងគ្រោះ ១១ នាក់ស្លាប់ និង ២៨ នាក់ទៀតរងរបួសដោយភាគច្រើននៃករណីអគ្គិភ័យត្រូវបានកើតឡើងដោយទូស្សេឆ្លងចរន្តអគ្គិសនី។ នេះបើយោងតាមការអះអាងរបស់មន្ត្រីនគរបាលជាន់ខ្ពស់ម្នាក់នៅនាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃកាលពីម្សិលមិញ។
លោក នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យក្រសួងមហាផ្ទៃ បានប្រាប់ភ្នំពេញប៉ុស្តិ៍ថា នៅក្នុងឆមាសទី ១ ឆ្នាំ ២០២០ នេះគ្រោះអគ្គិភ័យបានកើតឡើងចំនួន ៦៩១ លើក និងបណ្ដាលឲ្យមានជនរងគ្រោះ ១១ នាក់ស្លាប់ និង ២៨ នាក់ទៀតរងរបួសធ្ងន់ និងស្រាលព្រមទាំងបានបង្កការឆេះខូចខាតផ្ទះអស់ចំនួន ៥១៩ ខ្នងតូប ២២៥ តូប និងឧបករណ៍ប្រើប្រាស់មួយចំនួនធំ។ ខណៈកាលពីឆមាសទី ១ ឆ្នាំ ២០១៩ មានគ្រោះអគ្គិភ័យកើតឡើងចំនួន ៤២៩ លើក និងបណ្ដាលឲ្យមានជនរងគ្រោះ ១០ នាក់ស្លាប់ និង ៤៦ នាក់ទៀតរងរបួសធ្ងន់ និងស្រាល។
លោកបានថ្លែងឲ្យដឹងទៀតថា៖ «មានកត្តា ៣ យ៉ាងដែលបង្ក និងជំរុញឲ្យកើតមានគ្រោះអគ្គិភ័យឡើង។ ក្នុងនោះបង្កឡើងពីកត្តាផ្ទុះឆ្លងចរន្តអគ្គិសនី ៤១% កត្តាប្រើប្រាស់ភ្លើងដោយខ្វះការប្រុងប្រយ័ត្ន ៣៩% និង ២០% កំពុងស្ថិតក្នុងការស៊ើបអង្កេតស្រាវជ្រាវនៅឡើយ»។
លោក វន្ថា បានថ្លែងឲ្យដឹងបន្តថានៅក្នុងឆមាសទី ១ ឆ្នាំ ២០២០ នេះកម្លាំងនគរបាលផ្នែកបង្ការ និងពន្លត់អគ្គិភ័យនៅក្នុងក្របខ័ណ្ឌទូទាំងប្រទេស បានចេញប្រតិបត្តិការជួយអន្តរាគមន៍បាញ់ទឹកពន្លត់អគ្គិភ័យជូនប្រជាពលរដ្ឋ និងវិស័យឯកជនដោយទទួលបានជោគជ័យបានចំនួន ៥៧៣ លើក ប្រើប្រាស់ទឹកអស់ ១ ២៣៨ រថយន្ត ស្មើនឹង ៥ ៣៩២ ម៉ែត្រគុប ហើយអាជ្ញាធរមូលដ្ឋាន និងប្រជាសហគមន៍ចេញជួយពន្លត់ទាន់ពេលវេលាបានចំនួន ១១ លើក ខណៈករណីភ្លើងឆេះធំៗដែលមិនអាចគ្រប់គ្រងបានចំនួន ៥០ លើក។
ទន្ទឹមនឹងនេះលោក វន្ថា បានលើកឡើងផងដែរអំពីបញ្ហាប្រឈមរបស់មន្ត្រីនគរបាលផ្នែកបង្ការ និងពន្លត់អគ្គិភ័យផងដែរថា៖ «បច្ចុប្បន្នយើងនៅខ្វះឧបករណ៍ប្រើប្រាស់សម្រាប់បង្ការ និងពន្លត់អគ្គិភ័យ ដូចជាខ្វះជណ្ដើរខ្ពស់ៗសម្រាប់បំពាក់លើរថយន្តបង្ការ និងពន្លត់អគ្គិភ័យ ខ្វះសម្លៀកបំពាក់ការពារកម្តៅសម្រាប់ពាក់ចូលទៅពន្លត់អគ្គិភ័យ និងសង្គ្រោះជនរងគ្រោះ ខ្វះដបខ្យល់ SCBA សម្រាប់ពាក់ចូល ពន្លត់អគ្គិភ័យទ្រង់ទ្រាយធំ»។
ជុំវិញគ្រោះអគ្គិភ័យនេះផងដែរលោក សេង ចិន្តា អធិការស្រុកសាមគ្គីមានជ័យ ខេត្តកំពង់ឆ្នាំង កំពុងធ្វើការស្រាវជ្រាវរកមូលហេតុឲ្យបានច្បាស់លាស់ផងដែរ ក្រោយពីអ្នកភូមិបានប្រទះឃើញសពស្ត្រីម្នាក់ឈ្មោះ ជា ថន អាយុ ៥៦ ឆ្នាំឆេះស្លាប់នៅក្បែររោងចាំចម្ការរបស់គាត់ ដែលស្ថិតនៅក្នុងភូមិក្រាំងកន្ទ្រោល ឃុំពាម ស្រុកសាមគ្គីមានជ័យ ខេត្តកំពង់ឆ្នាំង កាលពីរសៀលថ្ងៃទី ២១ ខែ មិថុនា ឆ្នាំ ២០២០។
លោកបានថ្លែងថា៖ «រហូតមកទល់ពេលនេះ យើងនៅមិនទាន់អាចសន្និដ្ឋានបានទេថា ករណីនេះជាករណីឃាតកម្ម ឬគ្រោះអគ្គិភ័យនោះបង្កឡើងដោយជនរងគ្រោះខ្លួនឯងឡើយ បើទោះយើងពិនិត្យឃើញទ្រព្យសម្បត្តិរបស់គាត់ទាំងអស់មិនបាត់បង់ក្ដី»៕