ភ្នំពេញៈ មនុស្សចំនួន ១៣១ នាក់បានស្លាប់ និងជាង ១១ ម៉ឺនគ្រួសារ ត្រូវបានខាតបង់ទ្រព្យសម្បត្តិ ដោយសារគ្រោះមហន្តរាយដូចជា ទឹកជំនន់ ខ្យល់ព្យុះ និងរន្ទះបាញ់ដែលបានកើតឡើងក្នុងអំឡុងពេល ១០ ខែនាឆ្នាំ ២០១៩។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយប្រាប់ភ្នំពេញប៉ុស្ដិ៍ឲ្យដឹងកាលម្សិលមិញថា៖ «បញ្ហាទឹកជំនន់ជាគ្រោះមហន្តរាយពីធម្មជាតិកើតមានជារៀងរាល់ឆ្នាំ។ កាលពីច្រើនឆ្នាំមុនគ្រោះទឹកជំនន់ធ្វើឲ្យប៉ះពាល់ដល់ប្រជាពលរដ្ឋច្រើន ប៉ុន្ដែបច្ចុប្បន្នពលរដ្ឋមានភាពស៊ាំនឹងបញ្ហា ដូច្នេះផលប៉ះពាល់នៅមានតិចតួចប៉ុណ្ណោះ ព្រោះពលរដ្ឋមានទម្លាប់រស់នៅជាមួយទឹកជំនន់ និងដឹងពីវិធីសាស្ដ្រក្នុងការប្រុងប្រយ័ត្នជាមុន»។
លោក វី ថ្លែងថារយៈពេល ១០ ខែឆ្នាំនេះគ្រោះមហន្តរាយ ទឹកជំនន់ ខ្យល់ព្យុះ និងរន្ទះបាញ់នៅប្រទេសកម្ពុជាបង្កឲ្យមនុស្សចំនួន ១៣១ នាក់ស្លាប់បាត់បង់ជីវិត និងពលរដ្ឋចំនួន ១១៥ ៩៥៧ គ្រួសាររងផលប៉ះពាល់ បាក់ រលំផ្ទះ និងខូចខាតដំណាំ។ ឆ្នាំនេះគ្រោះមហន្តរាយនៅមានលក្ខណៈកាចសាហាវ ប៉ុន្ដែចំនួនអ្នកស្លាប់មានការថយចុះបើប្រៀបធៀបក្នុងអំឡុងពេលដូចគ្នាកាលពីឆ្នាំ ២០១៨ ដែលមានមនុស្សស្លាប់ចំនួន ២១៥ នាក់។
លោកថ្លែងថាការប៉ះពាល់សរុបពីគ្រោះមហន្តរាយផ្សេងៗក្នុងរយៈពេល ១០ ខែឆ្នាំនេះ មនុស្ស ៣០ នាក់ស្លាប់ ដោយទឹកជំនន់ ៨ នាក់ស្លាប់ ដោយសារខ្យល់ព្យុះ និង ៩៣ នាក់ស្លាប់ និង ៨១ របួស ដោយសាររន្ទះបាញ់។ បើប្រៀបធៀបរយៈពេលដូចគ្នាកាលពីឆ្នាំ ២០១៨ បានឲ្យដឹងថា មនុស្ស ៦ នាក់ស្លាប់ ដោយសារខ្យល់ព្យុះ ១០៩ នាក់ស្លាប់ ដោយរន្ទះបាញ់ និងគ្រោះទឹកជំនន់បណ្ដាលឲ្យមនុស្សស្លាប់ចំនួន ៦៣ នាក់។
លោក កែវ វី បានឲ្យដឹងថា គណៈកម្មាធិការជាតិគ្រប់គ្រងគ្រោះមហន្តរាយក៏មានផែនការត្រៀមបម្រុងសម្រាប់ទប់ស្កាត់ និងការពារបញ្ហាគ្រោះមហន្តរាយនៅតាមបណ្ដាខេត្ដនីមួយៗលើផ្នែកសង្គមកិច្ច សុខាភិបាល ស្បៀង និងពូជដំណាំដើម្បីទុកជួយសង្គ្រោះប្រជាពលរដ្ឋ។ ជាមួយគ្នានេះអាជ្ញាធរមូលដ្ឋានតាមបណ្ដាខេត្ដក៏បានចូលរួមបំពេញការងារតាមផែនការបម្រុងទុកបានល្អ និងជួយដល់ពលរដ្ឋរងគ្រោះដោយសារគ្រោះមហន្តរាយបានទាន់ពេលវេលាផងដែរ។
លោក កែវ វី បានឲ្យដឹងថា គណៈកម្មាធិការជាតិគ្រប់គ្រងគ្រោះមហន្តរាយបានបើកស្រូវពូជក្នុងប្រព័ន្ធស្បៀងបម្រុងកម្ពុជាជាង ១ ០០០ តោន ផ្ដល់ជូនពលរដ្ឋរងគ្រោះដោយសារទឹកជំនន់ក្នុងខេត្ដកំពង់ចាម ត្បូងឃ្មុំ ក្រចេះ កំពង់ធំ ព្រះវិហារ និងពលរដ្ឋរងគ្រោះដោយសាររាំងស្ងួតក្នុងខេត្ដ ពោធិ៍សាត់ សៀមរាប បាត់ដំបង បន្ទាយមានជ័យ ខណៈផលប៉ះពាល់ដោយសារទឹកជំនន់ក្នុងវិស័យកសិកម្មស្រូវមានចំនួនជាង ៩ ម៉ឺនហិកតា និងបង្កការខូចខាតសរុបជាង ១៤ ០០០ ហិកតា។
លោក ថេង សារឿន ប្រធានសម្ព័ន្ធសហគមន៍កសិករកម្ពុជា (CCFC) បានឲ្យដឹងថា អាជ្ញាធរពាក់ព័ន្ធគួរតែបង្កើតការផ្ដល់ដំណឹងពីគ្រោះមហន្តរាយដែលអាចនឹងកើតមានឡើងឲ្យបានឆាប់រហ័សទៅដល់ប្រជាពលរដ្ឋដែលរស់នៅតាមបណ្ដាខេត្ដរងគ្រោះជាមុន ដើម្បីឲ្យពលរដ្ឋមានពេលត្រៀមខ្លួនរកកន្លែងសុវត្ថិភាព នៅពេលគ្រោះមហន្តរាយកើតមានឡើង។
លោក ថេង សារឿន ប្រធានសម្ព័នសហគមន៍បានថ្លែងឲ្យដឹងថា៖ «ខ្ញុំចង់ឲ្យរាជរដ្ឋាភិបាលរៀបចំប្រព័ន្ធជូនដំណឹងឲ្យបានរហ័ស ព្រោះការអប់រំផ្សព្វផ្សាយអំពីផលប៉ះពាល់ពីគ្រោះមហន្តរាយតាមរយៈផ្ដល់នូវវិធីសាស្ដ្រនៃការបង្ការជាចំណុចសំខាន់សម្រាប់ប្រជាពលរដ្ឋអនុវត្ដ»៕