ភ្នំពេញៈ យ៉ាងហោចណាស់មនុស្ស ១៣ នាក់ ត្រូវបានចាប់ និងឃុំខ្លួនជាបណ្ដោះអាសន្នដាក់ពន្ធនាគារតាមបណ្ដាខេត្តមួយចំនួនរួមទាំងរាជធានីភ្នំពេញនៅក្នុងអំឡុងខែកញ្ញាពាក់ព័ន្ធជាមួយសកម្មភាពប្រមូលផ្ដុំមនុស្សគាំទ្រគម្រោងវិលត្រឡប់ចូលមកក្នុងស្រុកវិញនៅថ្ងៃទី ៩ វិច្ឆិកា របស់លោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិ ពួកគេត្រូវបានចោទប្រកាន់ពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិ។
សាលាដំបូងខេត្តឧត្តរមានជ័យ ខេត្តកំពង់ចាម និងខេត្តស្វាយរៀងបានចោទប្រកាន់មនុស្ស ៣ នាក់បន្ថែមទៀត ពីបទ «រួមគំនិតក្បត់» ខណៈពេលដែលអយ្យការអមសាលាដំបូងរាជធានីភ្នំពេញបានចេញដីកាបង្គាប់ឱ្យកងកម្លាំងសមត្ថកិច្ចចាប់ខ្លួនមនុស្សម្នាក់ទៀតដែរ ពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម។
កាលពីដើមខែកញ្ញាមនុស្ស ៩ នាក់ ត្រូវចោទប្រកាន់ និងបញ្ជូនទៅឃុំខ្លួនបណ្តោះអាសន្ននៅពន្ធនាគារពីបទ «រួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិ» ក្រោយពីលោក សម រង្ស៊ី បានអំពាវនាវទៅដល់កងកម្លាំង និងពលរដ្ឋឲ្យចូលរួមគាំទ្រដំណើរវិលត្រឡប់ចូលកម្ពុជាវិញនៅថ្ងៃទី ៩ ខែ វិច្ឆិកា ឆ្នាំ ២០១៩។ មនុស្សទាំងនោះត្រូវបានគេកំណត់ថាជាសកម្មជនរបស់អតីតគណបក្សសង្គ្រោះជាតិ។
ករណីចាប់ និងឃុំខ្លួន ត្រូវបានឲ្យដឹងតាមសេចក្ដីប្រកាសព័ត៌មានដែលចេញផ្សាយដោយមានកាលបរិច្ឆេទខុសៗគ្នា ប៉ុន្តែបានធ្វើនៅក្នុងខែកញ្ញាដូចគ្នាដូចជាសេចក្តីប្រកាសព័ត៌មានរបស់អ្នកនាំពាក្យនៃអយ្យការអមសាលាដំបូងខេត្តឧត្តរមានជ័យបានឲ្យដឹងថា អយ្យការអមសាលាដំបូងខេត្តឧត្តរមានជ័យបានចោទប្រកាន់លើឈ្មោះ ម៉ោញ សារ៉ាត់ ពីបទរួមគំនិតក្បត់តាមមាត្រា ៤៥៣ នៃក្រមព្រហ្មទណ្ឌ។
សេចក្តីប្រកាសព័ត៌មានដដែលនេះបានឲ្យដឹងទៀតថាការចោទប្រកាន់បានធ្វើឡើងបន្ទាប់ពីឈ្មោះ ម៉ោញ សារ៉ាត់ បានផ្តល់បទសម្ភាសដល់វិទ្យុ VOA កាលពីថ្ងៃទី ២៦ ខែ កញ្ញា ឆ្នាំ ២០១៩ អំពីសកម្មភាពកៀរគរប្រជាពលរដ្ឋក្នុងខេត្តឧត្តរមានជ័យដែលទៅធ្វើការនៅប្រទេសថៃឱ្យចូលរួមក្នុងផែនការផ្តួលរំលំរាជរដ្ឋាភិបាលស្របច្បាប់ក្រោមឧបាយកល «ផែនការនៃការវិលត្រឡប់មកកម្ពុជារបស់ឧក្រិដ្ឋជន សម រង្ស៊ី» ដោយអនុវត្តតាមការអំពាវនាវរបស់លោក សម រង្ស៊ី និងបក្ខពួក។
លោក ម៉ោញ សារ៉ាត់ មានផែនការដឹកនាំក្រុមរបស់ខ្លួនធ្វើដំណើរទៅរាជធានីភ្នំពេញដើម្បីចូលរួមសកម្មភាពផ្តួលរំលំរាជរដ្ឋាភិបាលនៃព្រះរាជាណាចក្រកម្ពុជានៅថ្ងៃទី ៩ ខែវិច្ឆិកា ឆ្នាំ ២០១៩ ខាងមុខនេះ។ សេចក្ដីប្រកាសព័ត៌មាននេះបានឲ្យដឹងថាអ្នកពាក់ព័ន្ធនឹងការគាំទ្រ ឬចូលរួមអនុវត្តផែនការប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាលស្របច្បាប់នឹងត្រូវប្រឈមការចោទប្រកាន់ និងបញ្ជូនទៅតុលាការកាត់ទោសតាមច្បាប់ពីបទរួមគំនិតក្បត់ដែលត្រូវផ្តន្ទាទោសពី ៥ ឆ្នាំ ទៅ ១០ ឆ្នាំតាមមាត្រា ៤៥៣ នៃក្រមព្រហ្មទណ្ឌ។
ដោយឡែកអយ្យការអមសាលាដំបូងខេត្តកំពង់ចាមកាលពីថ្ងៃទី ២៦ ខែ កញ្ញា នេះ បានសម្រេចចោទប្រកាន់ឈ្មោះ សឿន ស៊ាង អាយុ ៤៣ ឆ្នាំ ពីបទរួមគំនិតក្បត់ជាមួយលោក សម រង្ស៊ី ដែលការចោទប្រកាន់នេះធ្វើឡើងក្រោយ ឈ្មោះ សឿន ស៊ាង បាន កៀរគរប្រជាពលរដ្ឋក្នុងស្រុកកំពង់សៀម និងស្រុកចំការលើឱ្យចូលរួមក្នុងផែនការផ្តួលរំលំរាជរដ្ឋាភិបាល។ នេះបើយោងតាមសេចក្ដីប្រកាសព័ត៌មាន។
តាមសេចក្ដីប្រកាសព័ត៌មានដដែលនេះបានឲ្យដឹងថា ឈ្មោះ សឿន ស៊ាង បានកៀរគរប្រជាពលរដ្ឋ និងមានផែនការដឹកនាំក្រុមរបស់ខ្លួនធ្វើដំណើរទៅរាជធានីភ្នំពេញដើម្បីចូលរួមសកម្មភាពផ្តួលរំលំរាជរដ្ឋាភិបាលនៃព្រះរាជាណាចក្រកម្ពុជានៅថ្ងៃទី ៩ ខែ វិច្ឆិកា ឆ្នាំ ២០១៩ ខាងមុខនេះ។
ករណីដោយឡែកទៀតដែរយោងតាមសេចក្តីប្រកាសព័ត៌មានរបស់អយ្យការអមសាលាដំបូងខេត្តស្វាយរៀងបានឲ្យដឹងថា អយ្យការអមសាលាដំបូងបានសម្រេចធ្វើការចោទប្រកាន់លើឈ្មោះ ម៉ៅ វិបុល ភេទប្រុស អាយុ ៣៧ ឆ្នាំរស់នៅឃុំគោកព្រីង ស្រុកស្វាយជ្រុំ ខេត្តស្វាយរៀង ពីបទរួមគំនិតក្បត់ និងពីបទញុះញង់ ឱ្យប្រព្រឹត្តបទឧក្រិដ្ឋជាអាទិ៍ដោយយោងតាមមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌនៃកម្ពុជា។
ជនសង្ស័យ គឺពាក់ព័ន្ធនឹងការគាំទ្រ និងការចូលរួមអនុវត្តផែនការការប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាលកម្ពុជាក្រោមឧបាយកលផែនការនៃការវិលត្រឡប់មកកម្ពុជាវិញរបស់ឧក្រិដ្ឋជន សម រង្ស៊ី ដោយបានធ្វើការអំពាវនាវតាមរយៈគណនី Facebook របស់ខ្លួន និងសម្ភាសតាមវិទ្យុអាស៊ីសេរីកាលពីអំឡុងខែសីហា និងខែ កញ្ញា ឆ្នាំ ២០១៩។
ខណៈសាលាដំបូងរាជធានីភ្នំពេញលោក កូយ សៅ ចៅក្រមស៊ើបសួរបានចេញដីកាបង្គាប់ឲ្យឃុំខ្លួនឈ្មោះ យូ ចាន់ធានី ភេទស្រី អាយុ ២៥ ឆ្នាំពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិប្រព្រឹត្តនៅប្រទេសកម្ពុជា និងទីកន្លែងផ្សេងទៀតកាលពីអំឡុងឆ្នាំ ២០១៩ ជាបទល្មើសព្រហ្មទណ្ឌ និងត្រូវផ្តន្ទាទោសតាមបញ្ញត្តិមាត្រា ៤៥៣ មាត្រា ៨៩៨ និងមាត្រា ៤៩៥ នៃក្រមព្រហ្មទណ្ឌ។
ក្រៅពីនេះចៅក្រមបានចេញដីកាបង្គាប់ឱ្យកងកម្លាំងសមត្ថកិច្ចគ្រប់មូលដ្ឋានតាមចាប់បុគ្គលឈ្មោះ សៅ ឧសភា ភេទស្រី អាយុ ២៥ ឆ្នាំក្រោយរងការចោទប្រកាន់ពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមកាលពីអំឡុងឆ្នាំ ២០១៩ ដែលជាបទល្មើសព្រហ្មទណ្ឌ និងផ្តន្ទាទោសតាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។ ចំណាត់ការរបស់តុលាការធ្វើឡើង បន្ទាប់ពីក្រសួងយុត្តិធម៌ព្រមានថា មន្ត្រីរាជការណាដែលចូលរួមធ្វើជាមេដឹកនាំក្នុងការរៀបចំផែនការផ្តួលរំលំរាជរដ្ឋាភិបាលដែលហៅថា «រដ្ឋប្រហារ» ជាមួយលោក សម រង្ស៊ី នឹងត្រូវជាប់គុកអស់ ១ ជីវិត ខណៈរាល់បុគ្គលទាំងឡាយដែលចូលរួមក្នុងគម្រោងការនេះនឹងត្រូវដាក់ពន្ធនាគារពី ៥ ឆ្នាំទៅ ១០ ឆ្នាំ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថាចំណាត់ការរបស់សមត្ថកិច្ច និងតុលាការសំដៅទប់ស្កាត់ការរៀបចំផែនការផ្តួលរំលំរាជរដ្ឋាភិបាលដែលហៅថា «រដ្ឋប្រហារ» ដោយលោក សម រង្ស៊ី ដែលសមត្ថកិច្ច និងតុលាការគឺអនុវត្តទៅតាមច្បាប់នឹងភារកិច្ចរបស់ខ្លួនក្នុងការការពារ និងថែរក្សាសណ្តាប់ធ្នាប់សង្គម និងប្រទេសជាតិ។
លោក ភា ថ្លែងថា៖ «អាជ្ញាធរមានសមត្ថកិច្ច និងតុលាការបានបំពេញតួនាទីរបស់ខ្លួនជាភ្នាក់ងាររបស់រដ្ឋក្នុងការអនុវត្តច្បាប់។ បើសិនរាជរដ្ឋាភិបាល ឬអាជ្ញាធរមានសមត្ថកិច្ចមិនមានវិធានការច្បាប់ទាន់ពេលវេលានោះទេ វានឹងបង្កឲ្យមានបញ្ហាកាន់តែធំឡើង។ បើសិនយើងមិនបង្ការ ឬទប់ស្កាត់កម្ទេចភ្លើងឲ្យបានត្រឹមត្រូវទេ វាអាចនឹងបង្កអគ្គិភ័យ»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិបានថ្លែងថា វិធានការរបស់សមត្ថកិច្ច និងតុលាការចំពោះបុគ្គលដែលធ្វើសកម្មភាព ឬបញ្ចេញមតិផ្សេងៗពាក់ព័ន្ធផែនការរបស់លោក សម រង្ស៊ី គឺ កាន់តែរុញច្រានស្ថានភាពនយោបាយនៅក្នុងប្រទេសកម្ពុជាកាន់តែធ្ងន់ធ្ងរទៅៗ ហើយនឹងធ្វើឲ្យប៉ះពាល់ដល់មុខមាត់ប្រទេសកម្ពុជាផងដែរ។
លោក អ៊ូ ច័ន្ទរ័ត្ន បញ្ជាក់ថា៖ «ការបង្ក្រាបបែបនេះធ្វើឲ្យប៉ះពាល់ដល់ការស្វះស្វែងរកដំណោះស្រាយនយោបាយ ហើយវាឲ្យកម្ពុជាពិបាកនឹងដោះស្រាយជាមួយនឹងអន្តរជាតិ។ ប្រទេសកម្ពុជានឹងទទួលសម្ពាធពីអន្តរជាតិបន្ថែមទៀត ដូច្នេះយើងមិនគួរប្រតិកម្ម និងភ័យខ្លាចដល់ថ្នាក់ហ្នឹងទេ។ វាធ្វើឲ្យប៉ះពាល់ដល់ប្រជាពលរដ្ឋហើយធ្វើឲ្យពួកគេមានការភ័យខ្លាចកាន់តែខ្លាំង»។
ថ្មីៗនេះដែរផ្ទាំងរូបថតនៃថ្នាក់ដឹកនាំអតីតគណបក្សសង្គ្រោះជាតិចំនួន ៨ រូបត្រូវបានបិទនៅព្រំដែនថៃ-ម៉ាឡេស៊ី និងព្រំដែនថៃ-កម្ពុជា បន្ទាប់ពីចៅក្រមស៊ើបសួរនៃសាលាដំបូងរាជធានីភ្នំពេញបានចេញដីកាឲ្យសមត្ថកិច្ចចាប់ខ្លួនមន្ត្រីជាន់ខ្ពស់អតីតគណបក្សសង្គ្រោះជាតិដែលកំពុងនៅក្រៅប្រទេសដោយអ្នកទាំង ៨ រូបត្រូវបានចោទប្រកាន់ពីបទ «រួមគំនិតក្បត់» និង «ញុះញង់ឲ្យប្រព្រឹត្តបទឧក្រិដ្ឋជាអាទិ៍»៕