ភ្នំពេញៈ ទឹកជំនន់ទន្លេមេគង្គដែលបានហក់ឡើងបង្កការជន់លិចរយៈពេល ២-៣ សប្ដាហ៍កន្លងមកនេះបណ្ដាលឲ្យមនុស្សយ៉ាងហោចណាស់ ១៥ នាក់បានលង់ទឹកស្លាប់ និងដីស្រែប្រមាណ ២៨៥៤២ ហិកតាត្រូវជន់លិចនៅបណ្ដាខេត្ដតាមបណ្ដោយទន្លេមេគង្គ។ នេះបើតាមការអះអាងពីមន្ត្រីជាន់ខ្ពស់គ្រប់គ្រងគ្រោះមហន្តរាយពីម្សិលមិញ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្ដរាយប្រាប់ភ្នំពេញ-ប៉ុស្ដិ៍ថា៖ «ស្រូវប្រមាណ ៣៨០០ ហិកតាត្រូវខូចខាតទាំងស្រុង ព្រោះទឹកជំនន់ ហើយមនុស្សស្លាប់បានកើនឡើងដល់ ១៥ នាក់ហើយគិតត្រឹមថ្ងៃអាទិត្យនេះ។ អ្នកលង់ទឹកភាគច្រើនជាក្មេងៗគឺនៅខេត្ដកំពង់ចាមមានអ្នកលង់ទឹកស្លាប់រហូតដល់ ៩ នាក់ដែលក្នុងនោះមានក្មេងៗប្រហែល ៧-៨ នាក់»។
លោក កែវ វី លើកឡើងថាកាលពីជំនន់ទឹកភ្លៀងនៅតាមខេត្ដជាប់សមុទ្រមួយចំនួន និងទឹកជំនន់បាក់ទំនប់ពីប្រទេសឡាវនៅស្ទឹងត្រែងមិនបានបង្កឲ្យមនុស្សស្លាប់ទេ ទើបតែទឹកជំនន់ទន្លេមេគង្គនេះដែលបង្កឲ្យមានអ្នកស្លាប់កើនឡើងរហូត។
លោកបន្តថា៖ «បើតាមក្រសួងជំនាញទឹកជំនន់នៅតាមបណ្ដាខេត្ដបណ្ដោយទន្លេមេគង្គខាងលើចាប់ផ្ដើមស្រកចុះបណ្ដើរៗហើយ។ បើទឹកស្ថិតនៅកម្រិតដូចសព្វថ្ងៃនេះ យើងមិនមានការព្រួយបារម្ភទេ»។
បើតាមលោក កែវ វី ខេត្ដរងគ្រោះដោយទឹកជំនន់ទន្លេមេគង្គទាំង ៦ គឺមានស្ទឹងត្រែង ក្រចេះ ត្បួងឃ្មុំ កំពង់ចាម កណ្ដាល និងខេត្ដព្រៃវែង ហើយក្នុងចំណោមខេត្តទាំងនេះគឺមានតែខេត្តព្រៃវែងប៉ុណ្ណោះដែលរងការប៉ះពាល់ដីស្រែច្រើនជាងគេរហូតដល់ ១ ៤០០ ហិកតា។
តាមរបាយការណ៍ពីសាលាខេត្តព្រៃវែងកាលពីថ្ងៃទី ៧ ខែសីហាបានឲ្យដឹងថា ទឹកជំនន់បានជន់លិច ៨ ក្រុង-ស្រុក ស្មើនឹង ៤១ ឃុំសង្កាត់។ រួមមានស្រុកពាមរក៍ ព្រះស្តេច ស៊ីធរកណ្តាល កំចាយមារ ពារាំង ពោធិ៍រៀង ក្រុងព្រៃវែង និងស្រុកពាមជរ។
លោក អ៊ុក សំណាង ប្រធានមន្ទីរកសិកម្ម ខេត្ដព្រៃវែងបានឲ្យដឹងថា៖ «ឆ្នាំនេះប្រជាពលរដ្ឋខេត្ដព្រៃវែងយើងបានដាំដុះដំណាំស្រូវលឿនជាងឆ្នាំមុន ដែលការព្រោះស្ទូងបានជាង ៩០ ភាគរយនៃផែនការ ប៉ុន្ដែជាអកុសល ព្រោះការប្រែប្រួលអាកាសធាតុឆ្នាំនេះមានទឹកជំនន់ផង ការរាំងស្ងួតផង»។
របាយការណ៍បញ្ជាក់ថា ក្រៅពីគ្រោះមហន្ដរាយទឹកជំនន់ជាមួយគ្នានេះខេត្ដព្រៃវែងក៏កំពុងប្រឈមនឹងគ្រោះរាំងស្ងួត ប៉ះពាល់ផ្ទៃដីសរុប ៩៥៦១ ហិកតាផងដែរ។
លោក ស៊ឹម ថាវិរៈ អនុប្រធានមន្ទីរកសិកម្មខេត្ដកំពង់ចាមឲ្យដឹងដែរថា ទឹកជំនន់បានជន់លិចឃុំចំនួន ៤២ ឃុំស្មើនឹង ១៦៦ ភូមិនៅកំពង់ចាម។ ប៉ះពាល់ផ្ទះប្រជាពលរដ្ឋចំនួន ២២៣៣៥ គ្រួសារ និងលិចស្រូវសំណាប ៤៥៤៣ ហិកតាលិចពោតចំនួន ៤៦៦ ហិកតា និងដំណាំផ្សេងៗចំនួន ៦២៩,៦ ហិកតា៕