.jpg)
ខ្យល់កន្ត្រាក់ធ្វើឲ្យផ្សារមួយកន្លែងនៅក្រុយប៉ោយប៉ែត រងការខូចខាត កាលថ្ងៃទី ៤ ខែមេសា។ រូបថត ហ្វេសប៊ុក
ភ្នំពេញ៖ មនុស្ស ២០ នាក់ស្លាប់ និង ១០ នាក់បានរបួសធ្ងន់ និងស្រាល និងខូចខាតអគារផ្សេងរាប់ពាន់ខ្នង ដោយហេតុបាតុភូតខ្យល់កន្ត្រាក់ និងរន្ទះបាញ់ក្នុងរយៈពេល ៤ ខែដើមឆ្នាំ ២០២១ ភាគច្រើនបានកើតឡើងនៅតាមបណ្ដាខេត្តជាប់ព្រំប្រទល់ប្រទេសជិតខាង។ យោងតាមការប្រាប់ឲ្យដឹងពីមន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយកាលពីថ្ងៃទី ០២ ខែឧសភា។
លោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ ភ្នំពេញ ប៉ុស្តិ៍ថា ក្នុងចំណោមមនុស្សស្លាប់ និងរងរបួសសរុបទាំង ៣០ នាក់នោះ មាន ២៤ នាក់បានស្លាប់ និងរងរបួសដោយករណីរន្ទះបាញ់ និង ៦ នាក់ទៀតបានស្លាប់ និងរងរបួសដោយករណីខ្យល់កន្ត្រាក់។
លោក កែវ វី បានឱ្យដឹងថា ខេត្តដែលមានករណីរងគ្រោះថ្នាក់ដោយសារបាតុភូតរន្ទះបាញ់នេះ ភាគច្រើនកើនមាននៅតាមបណ្ដាខេត្តក្នុងតំបន់វាលទំនាបកណ្ដាលភាគពាយព្យ និងខេត្តជាប់ជួរភ្នំដងរ៉ែក។ ក្នុងនោះខេត្តបាត់ដំបងត្រូវបានគេកត់ត្រាមានស្លាប់រហូតដល់ ៦ នាក់ និងរបួស ២ នាក់ ដោយករណីរន្ទះបាញ់ គឺច្រើនជាងបណ្ដាខេត្តផ្សេងៗ។
ទន្ទឹមនឹងនេះ លោក កែវ វី ក៏បានប្រាប់ឲ្យដឹងផងដែរថា បាតុភូតខ្យល់កន្ត្រាក់ក្នុងរយៈពេល ៤ ខែដើមឆ្នាំនេះ បានកើតឡើងចំនួន ៦០ លើក ប៉ះពាល់ខេត្តចំនួន ២០ រួមមាន ខេត្តកណ្ដាល កំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ ក្រចេះ មណ្ឌលគិរី រតនគិរី កំពង់ចាម ត្បូងឃ្មុំ ស្វាយរៀង តាកែវ ក្រុងព្រះសីហនុ កោះកុង កំពង់ស្ពឺ កំពង់ធំ និង ខេត្តសៀមរាប។
លោកបានបញ្ជាក់ថា ក្នុងចំណោមខេត្តទាំង ២០ នេះ ខេត្តបន្ទាយមានជ័យរងការខូចខាតច្រើនជាងគេ និងបានបង្កឲ្យកុមារាម្នាក់ស្លាប់ និងមនុស្ស ៥ នាក់ទៀតរងរបួសធ្ងន់ និងស្រាល ដោយករណីរលំផ្ទះសង្កត់លើ។ បានបង្កផលប៉ះពាល់ផ្ទះប្រជាពលរដ្ឋសរុប ១ ២៥៩ ខ្នង ក្នុងនោះផ្ទះតូច-ធំចំនួន ២០៩ ខ្នង បានដួលរលំរងការខូចខាតទាំងស្រុង និង ១ ០៥០ ខ្នងទៀត បានប៉ើងរបើកដំបូលខូចខាតមធ្យម។ លើសពីនេះ បានបង្កការខូចខាតដំបូលអគារសាលារៀនចំនួន ១០ អគារ និងអគាររដ្ឋបាលសាធារណៈចំនួន ១០ អគារ ផ្សារចំនួន ២ និងតូបលក់ដូរសរុបជាង ១០០ តូប។
លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយមបានប្រាប់ ភ្នំពេញ ប៉ុស្តិ៍ នៅល្ងាចថ្ងៃទី ០២ ខែឧសភាថា នៅពេលនេះ ប្រទេសកម្ពុជា កំពុងទទួលនូវឥទ្ធិពលខ្យល់មូសុងនិរតី ដែលនឹងនាំមកនូវរបាយទឹកភ្លៀងក្នុងកម្រិតពីតិចទៅច្រើន ពិសេសបណ្ដាខេត្តក្នុងតំបន់វាលទំនាបកណ្ដាល។ ក្នុងអំឡុងពេលនៃការផ្លាស់ប្ដូររដូវកាលគឺ ពីរដូវប្រាំងមករដូវវស្សានេះ សីតុណ្ហភាពនៅមានកម្ដៅខ្ពស់នៅឡើយ ដូច្នេះវាងាយនឹងបង្កឲ្យមានបាតុភូតខ្យល់កន្ត្រាក់ និងផ្គររន្ទះកើតមានច្រើនក្នុងអំឡុងពេលមេឃរកកលភ្លៀង និងពេលកំពុងភ្លៀង ដែលទាមទារឲ្យមានការប្រុងប្រយ័ត្នខ្ពស់ចំពោះបាតុភូតទាំង ២ នេះ។
លោកបានថ្លែងថា៖ «បាតុភូតធម្មជាតិទាំង ២ នេះ មិនមែនកើតមានតែក្នុងប្រទេសកម្ពុជា យើងទេ។ នៅប្រទេសថៃ វៀតណាម ឡាវ និងភូមា ក៏មានកើតឡើងផងដែរ ហើយច្រើនជាងប្រទេសយើងថែមទៀតផង»។
លោកបានបន្តថា មានវិធីសាស្ត្រងាយៗតាមលក្ខណៈវិទ្យាសាស្ត្រមួយចំនួនអាចការពារ និងទប់ស្កាត់ករណីរន្ទះបាញ់បានដូចជាការប្រើឧបករណ៍ ការពាររន្ទះនៅតាមផ្ទះ ការបិទប្រព័ន្ធអគ្គិសនី និងឧបករណ៍អេឡិចត្រូនិក ដែលងាយចម្លងចរន្តអគ្គិសនីនៅពេលមេឃរកកលភ្លៀង និងកំពុងមានភ្លៀងខ្យល់ខ្លាំង។ ក្នុងករណីនៅលើទីវាល ពេលមេឃកំពុងរកកល់ភ្លៀង និងកំពុងមានភ្លៀងខ្យល់បក់បោកខ្លាំង ត្រូវចាកចេញពីកន្លែងដែលមានដក់ទឹកច្រើន មិនត្រូវចូលទៅជ្រកក្រោមដើមឈើនោះទេ ប៉ុន្តែត្រូវអង្គុយចុះដោយយកដៃខ្ទប់ត្រចៀក។ ប៉ុន្តែសម្រាប់បាតុភូតខ្យល់កន្ត្រាក់ គឺគ្មានមធ្យោបាយការពារ និងទប់ស្កាត់បានទេ ប្រសិនបើសំណង់មិនរឹងមាំ ហើយស្ថិតក្នុងតំបន់វាលនោះ។
លោក ចាន់ យុត្ថា បានថ្លែងថា៖ «យ៉ាងណាក៏ដោយ យើងអាចដឹងពីសញ្ញាណរបស់បាតុភូតទាំង ២ នេះ ជាមុនបានតាមរយៈការពិនិត្យអង្កេតទៅលើចំណុចសំខាន់ ២ រួមមានតំបន់ដែលមានបាតុភូតទាំង ២ នេះកើតឡើង គឺមុនដំបូងមានភាពស្អុះស្អាប់ និងហប់ខ្យល់ បន្ទាប់មកផ្ទៃមេឃមានដុំពពកតូចៗ ដែលមានរាងដូចផ្សិតកើតឡើងច្រើន ដុំពពកនោះនឹងប្រែប្រួលធំឡើងៗរួចប្ដូរពណ៌ពីសមកខ្មៅ ហើយធ្លាក់ចុះដាបមកក្រោម។ លក្ខណៈទាំង ២ នេះហើយ ដែលជំរុញឲ្យមានបាតុភូតខ្យល់កន្ត្រាក់ និងផ្គររន្ទះកើតឡើង»៕
